އިންތިހާބަކާ ނުލައި އެމްޑީޕީގެ ގައުމީ މަޖިލީހުގެ ހަ ގޮނޑި ކަށަވަރުވެއްޖެ

ވާދަވެރިކަން ބޮޑުވެފައިވާ އެމްޑީޕީގެ ގައުމީ މަޖިލީހަށް އިންތިހާބަކާ ނުލައި ހަ ބޭފުޅަކު ހޮވިފައިވާ ކަން އެ ޕާޓީން އާއްމުކުރި ލިސްޓުން ދައްކައިފި އެވެ.

ގައުމީ މަޖިލީހުގެ އިންތިހާބު ބާއްވަން ނިންމާފައި ވަނީ، މި މަހުގެ 25 ގަ އެވެ. ޕާޓީގެ އެތެރޭގެ ކޯޅުން ބޮޑުވެފައި ވަނިކޮށް ބާއްވާ މި އިންތިހާބަށް ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް މުހައްމަދު ނަޝީދުގެ ފެކްޝަނުން އަންނަނީ ވާދަވެރި ކެމްޕޭނެއް ކުރަމުންނެވެ.

އެމްޑީޕީން ރޭ ވަނީ އެ އިންތިހާބުގައި ވޯޓަކާ ނުލައި ހޮވުނު 165 މެމްބަރުންގެ ނަން އިއުލާނުކޮށްފަ އެވެ. އޭގެ ތެރޭގައި ގައުމީ މަޖިލީހަށް ހޮވިވަޑައިގަތް ހަ ދާއިރާގެ ރައީސުން ވެސް ހިމެނެ އެވެ.

ދާއިރާ ރައީސުންގެ ގޮތުގައި ގައުމީ މަޖިލިސް ކަށަވަރުވީ:

- ޅ. ހިންނަވަރު، މޫންލައިޓް، އާދަމް ޔޫސުފް / ހިންނަވަރު ދާއިރާ

- ލ. މައިބައިދޫ، ވައިމަތީގެ، އަހްމަދު ޝުހާދު/ އިސްދޫ ދާއިރާ

- ހއ. ހޯރަފުށި، ހުސްނުހީނާގެ، އަރުޝަދު އަޝްރަފް/ ހޯރަފުށީ ދާއިރާ

- ށ. ކޮމަންޑޫ، ވިލުދޮޅި، މުހައްމަދު ޖަލާލް/ ކޮމަންޑޫ ދާއިރާ

- ފުވައްމުލައް، ގޮމަތަނަގެ، އިބްރާހިމް ސައީދު މުހައްމަދު/ ފުވައްމުލަކު އުތުރު ދާއިރާ ރައީސް

މުހައްމަދު ޒިޔާދު (ޒިޔައްޓެ)/ މާފަންނު އުތުރު ދާއިރާ ރައީސް

އެމްޑީޕީގެ ގައުމީ މަޖިލީސް އެކުލެވިގެން ވަނީ އެ ޕާޓީ ވެރިކަމުގައި އޮންނަ ނަމަ ރައީސުލްޖުމްހޫރިއްޔާ އާއި ވަޒީރުންގެ މަޖިލީހުގެ އެމްޑީޕީގެ މެމްބަރުންނާއި ޕާޓީގެ ލީޑަޝިޕާއި ޕާލަމެންޓްރީ ގްރޫޕްގެ މެމްބަރުންނާއި ދާއިރާތަކުގެ ރައީސުންނާއި އަންހެނުންގެ ރޫހާއި ޒުވާނުންގެ ހިތްވަރު އަދި އިސްލާމްދީނުގެ މަޝްވަރާ މަޖިލީހުގެ ރައީސް ހިމެނޭ ގޮތުންނެވެ.

އެމްޑީޕީގެ ގައުމީ މަޖިލީހުގެ އިންތިހާބުގައި ވޯޓުލުމުގެ ހައްގު ލިބިފައިވާ 93،000 އަށް ވުރެ ގިނަ މެންބަރުން އެބަތިއްބެވެ. އަދި އެކި ދާއިރާތަކަށް 733 ކެނޑިޑޭޓުން ވާދަ ކުރެ އެވެ.

ގައުމީ މަޖިލީހުގެ ކެމްޕޭންގެ ވާދަވެރިކަން ބޮޑުވެފައި އޮތީ ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް ނަޝީދާ ދެމެދުގަ އެވެ. ދެ ބޭފުޅުންގެ ވެސް އަމާޒަކީ އެ ފެކްޝަނަކުން ވާދަކުރާ ގިނަ މެމްބަރުން ގައުމީ މަޖިލީހުގެ ގިނަ ގޮނޑިތައް ކާމިޔާބުކޮށް ކޮންޓްރޯލް ހޯއްދެވުމެވެ.

މި އިންތިހާބުގައި ބަރުލަމާނީ އަދި ރިޔާސީ ކެމްޕޭންގެ ވެސް ފޯރިގަދަ އެވެ.

ގައުމީ މަޖިލީހުގެ އިންތިހާބުގައި ވާދަ ކުރައްވާ ކެނޑިޑޭޓުންގެ ތެރެއިން ނަޝީދު ތާއީދު ކުރައްވަނީ ބަރުލަމާނީ ނިޒާމަށް ތާއީދުކުރައްވާ ކެންޑިޑޭޓުންނަށެވެ. މި އިންތިހާބާ ދިމާކޮށް، ހިންގާ ބަރުލަމާނީ ޕެޓިޝަންގައި ސޮއިކުރަން ރައީސް އިބްރާހިމް މުހައްމަދު ސޯލިހާ އެކު ތިއްބެވި މެމްބަރުން ވަނީ ދެކޮޅު ހަދައިފަ އެވެ.

އެމްޑީޕީގެ ޗެއާޕާސަން ހަސަން ލަތީފު ވިދާޅުވެފައި ވަނީ އިންތިހާބު ކުރިމަތިވި އިރު ޕާޓީގެ ތެރޭގައި ހިޔާލު ތަފާތުވުންތަކާއި ވާދަވެރިކަން ބޮޑުވެފައި އޮތަސް އިންތިހާބު ނިމުމާ އެކު ޕާޓީ އަނެއްކާވެސް އެކަތިގަނޑަކަށް ވާނެ އެވެ. އެމްޑީޕީއަކީ ވާދަވެރިކަމުގެ ތެރޭގައި ސިޔާސީ މަސައްކަތަށް ފަރިތަ ޕާޓީއެއް ކަމަށް ވެސް އޭނާ ވިދާޅުވެފައިވެ އެވެ.