ބޮޑު ކާމިޔާބީން މި ފެނުނީ އޮތް އިތުބާރު: މަހްލޫފް

އެމްޑީޕީގެ ދާއިރާތަކުގެ އިންތިހާބުގައި ވާދަކުރެއްވުމުގެ ފުރުސަތު ހަނި ގޮތަކަށް ލިބިވަޑައިގަތް ނަމަވެސް ބޮޑު ތަފާތަކުން އިންތިހާބު ކާމިޔާބު ކުރެއްވުނީ ދާއިރާގެ ރައްޔިތުންނަށް އޭނާއާ މެދު ފުރިހަމަ އިތުބާރު އޮތުމުން ކަމަށް ޔޫތު މިނިސްޓަރު އަހްމަދު މަހްލޫފް މިރޭ ވިދާޅުވެއްޖެ އެވެ.

މަހްލޫފް ވާދަކުރެއްވީ ކ، އއ، އދ އަދި ވ ހިމެނޭ މެދު އުތުރު ޕްރޮވިންސަށެވެ. މި ހަތަރު އަތޮޅުގެ 32 ރަށުގެ ތެރެއިން ގާތްގަނޑަކަށް ހުރިހާ ރަށަކުން ވެސް ބޮޑު އަޣުލަބިއްޔަތެއް މަހްލޫފް ހޯއްދެވި އެވެ. އޭނާއާ އެންމެ ގާތުން ވާދަކުރެއްވީ ގުރައިދޫ އަލީ ޝާހީން އެވެ.

މަހްލޫފް ވިދާޅުވި ގޮތުގައި ދާއިރާގެ ރައްޔިތުން މި އިންތިހާބުގައި ދިން މެސެޖަކީ ވަޒީރުކަމުގައި އަދި މި ވެރިކަން ގެނައުމަށް ވެސް އޭނާ ކުރެއްވި މަސައްކަތް ބަލައިގަންނަ ކަމެވެ. ކެމްޕޭނަށް ކުރެއްވި ދަތުރުތަކުގައި ވެސް އޭނާއާ މެދު ކަންކުރަމުން އަންނަ ގޮތާ މެދު ހިތްހަމަނުޖެހުންތަކެއް ހުރި ކަމަށް ގިނަ ބަޔަކު ބުނި ކަމަށް މަހްލޫފް ވިދާޅުވި އެވެ.

"އިތުބާރާއި ލޯތްބަކީ ގަދަބާރުން އަތުލެވޭނެ އެއްޗެއް ނޫން. ހުރަސްތައް ކުރިމަތިކުރިޔއަސް މި ފެނުނީ އަޅުގަނޑު ކޮށްދިން މަސައްކަތް ބަލައިގަންނަ ކަން،" މަހްލޫފް ވިދާޅުވި އެވެ.

"އަޅުގަނޑު ސަސްޕެންޝަންގައި ހުރީމަ ރައްޔިތުން ކަންބޮޑުވޭ. ކެމްޕޭންގައި އަދި ވޯޓުން ވެސް އެ ދިނީ އެ މެސެޖް."

ވަޒީރުކަމުން މަހްލޫފް ސަސްޕެންޑްކުރީ އެމްއެމްޕީއާރުސީގެ ހިޔާނާތުގެ މައްސަލައިގައި އޭނާގެ މައްޗަށް ދައުވާ އުފުލަން ޕްރޮސިކިއުޓަ ޖެނެރަލްގެ އޮފީހަށް ފޮނުވުމުންނެވެ. އެ މައްސަލަ ދިރާސާކުރަމުން އަންނަ ކަމަށް ބުނެ ޕީޖީ އޮފީހުގައި އޮތީ ތާށިކޮށްފަ އެވެ.

މި މައްސަލައާ ހެދި އެމްޑީޕީން މަހްލޫފް ވާދަކުރަން ފުރަތަމަ ފުރުސަތެއް ނުދިނެވެ. އެކަމަކު އެ ނިންމުމާ މެދު ހިތްހަމަނުޖެހިގެން އިސްތިއުނާފް ފަނޑިޔާރުންގެ މަޖިލީހަށް ހުށަހެޅުމުން އެ ކޮމިޓީގެ ނިންމީ އޭނާ އަށް ވާދަކުރެވެން ޖެހޭނެ ކަމަށެވެ. މި ނިންމެވުމާ މެދު އެމްޑީޕީގެ ޗެއާޕާސަން ހަސަން ލަތީފް ހިތްހަމަޖެހިވަޑައިނުގަންނަވާ ކަން ނޫސްވެރިންގެ ބައްދަލުވުމެއްގައި ވަނީ ހާމަކުރައްވައިފަ އެވެ.