އެމްޑީޕީގެ އިންތިޚާބު: ވަޒީރުން ގޮނޑި ކާމިޔާބު ކުރައްވައިފި

ފިނޭންސް މިނިސްޓަރު އިބްރާހީމް އަމީރާއި އިކޮނޮމިކް މިނިސްޓަރު ފައްޔާޒް އިސްމާއިލް އަދި ޔޫތު މިނިސްޓަރު އަހުމަދު މަހްލޫފު، އެމްޑީޕީގެ އެތެރޭގެ އިންތިހާބު ކާމިޔާބު ކުރައްވައިފި އެވެ.

އެމްޑީޕީގެ އެތެރޭގެ އިންތިހާބުގެ ވަގުތީ ނަތީޖާ ދައްކާ ގޮތުން މި ތިން ވަޒީރުން ވެސް އިންތިހާބު ކާމިޔާބު ކުރެއްވީ ބޮޑު ތަފާތަކުންނެވެ. ތ. އަދި ލ. އަތޮޅު ހިމެނޭ މެދު ދެކުނު ޕްރޮވިންސަށް އަމީރު އިންތިހާބުވެވަޑައިގެންނެވިއިރު ލ. ގަމު ދާއިރާ ކާމިޔާބު ކުުރެއްވީ މިނިސްޓަރު ފައްޔާޒެވެ. އަދި މެދު އުތުރު ޕްރޮވިންސްގެ ރައީސްކަން ލިބިވަޑައިގަތީ މަހްލޫފަށެވެ. ބައެއް ރަށްރަށުން ވޯޓުލީ މީހުންގެ 100 ޕަސެންޓް ކާމިޔާބު ކުރެއްވީ މަހްލޫފެވެ. މި ތިން ބޭފުޅުން ވެސް ނިސްބަތް ވަނީ ރައީސް އިބްރާހީމް މުހައްމަދު ސޯލިހުގެ ފެކްޝަނަށެވެ.

ވަޒީރުން މަގާމުތަކަށް އިންތިހާބުވެފައި މިވަނީ ވަރުގަދަ ކެމްޕެއިނަކަށް ފަހު އެވެ. އެމްޑީޕީގެ މެމްބަރުންގެ ތާއީދު ހޯއްދެވުމަށް މި ބޭފުޅުން ވަނީ އެކި ރަށްރަށަށް ވަޑައިގެންފަ އެވެ.

ރައީސްގެ ފެކްޝަންގެ ތިން ވަޒީރަކު އިންތިހާބު ކާމިޔާބު ކުރެއްވިއިރު ރައީސް ފެކްޝަންގައި ހިމެނިވަޑައިގަންނަވާ އިތުރު ބޭފުޅުންތަކެއް ވެސް މި އިންތިހާބު ކާމިޔާބުކުރެއްވި އެވެ. އޭގެ ތެރޭގައި ވާދަވެރިކަން ބޮޑުވި އަލިފުށީ ދާއިރާގެ މަޖިލިސް މެމްބަރު މުހައްމަދު ރަޝީދު (ބިގޭ) ހިމެނިވަޑައިގަންނަވަ އެވެ. އޭނާއާ ވާދަކުރެއްވީ އަލިފުއްޓަން ނިސްބަތްވާ އަދި ރައީސް މުހައްމަދު ނަޝީދަށް ތާއީދު ކުރައްވާ އިނގުރައިދޫ ދާއިރާގެ މެންބަރު ހަސަން އަހުމަދު (ހަސަންޓޭ) އެވެ. ރޯޑް ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރު މޫސާ އަލި މަނިކު (މޫކޭ) ވަނީ މަޑުއްވަރީ ދާއިރާގެ ރައީސްކަން ކާމިޔާބު ކުރައްވައިފަ އެވެ.

އޭގެ އިތުރުން ވެސް މި އިންތިހާބުގައި ސަރުކާރުގެ ކުންފުނިތަކުގެ ތެރެއިން ވާދަކުރެއްވި ބޭފުޅުން ވެސް ކުރި ހޯއްދެވި އެވެ. އޭގެ ތެރޭގައި ފެނަކައިގެ މެނޭޖިން ޑިރެކްޓަރު އަހުމަދު ސައީދު އާއި އެސްޓީއޯގެ މެނޭޖިން ޑިރެކްޓަރު ހުސެއިން އަމްރު، ހިމެނިވަޑައިގަންނަވަ އެވެ.

މި އިންތިހާބުގެ އެންމެ ވާދަވެރި ގޮނޑި ކާމިޔާބު ކުރެއްވީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނުންނެވެ. ރައީސްގެ ފެކްޝަންގައި ހިމެނޭ އަދި ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީންއާ ވާދަކުރައްވާ މާލޭގެ ރައީސްގެ ގޮނޑި ކާމިޔާބުކުރެއްވީ މާލޭގެ ކުރީގެ މޭޔަރު ޝިފާ މުހައްމަދެވެ.