ނޮވެލްޓީ: ފޮތް ލިސްޓަށް ކޮލިޓީ ތަކެތި، ފަސޭހަ ތަޖުރިބާއެއް

ފޮތް ލިސްޓަށް ފޮތް ނެގުމަކީ ހުރިހާ ބެލެނިވެރިން ވެސް ދުރާލާ ރާވައިގެން ކުރާ ކަމެކެވެ. އެކަން ކުރާ އިރު އެންމެ ބޮޑު އިސްކަމެއް ދެނީ އެންމެ ރަނގަޅު ހިދުމަތެއް ދޭ ބުކްޝޮޕެއް ހިޔާރު ކުރުމަށެވެ. އެންމެ މަތީ ފެންވަރުގެ ތަކެތި ލިބުމުގެ އިތުރަށް، ވީހާ ވެސް ފަސޭހަ އިން ފޮތް ލިސްޓަށް ފޮތް ހަމަކޮށްލެވުމަކީ ކޮންމެ ބެލެނިވެރިއަކަށް ވެސް އަހަރުގެ ބޮޑު ބަންދުގައި އެންމެ މުހިއްމު އެއް ކަންތަކެވެ.

ގާތްގަނޑަކަށް 30 އަހަރު ކުރިން ވުޖޫދަށް އައި ނޮވެލްޓީ ބުކްޝޮޕުން ވަނީ ހުރިހާ ދިވެހިންގެ ވެސް އިތުބާރު ހޯދައިފަ އެވެ. އެ އިތުބާރަށް ކުޑަ ވެސް އުނިކަމެއް އައިސްފައި ނުވާ އިރު، ކޮންމެ އަހަރެއްގެ ވެސް ސްކޫލު ބަންދާ ދިމާކޮށް ކަސްޓަމަރުން ބަލައިގަންނާނެ ފަދަ ހިދުމަތްތަކެއް، އިތުބާރާ އެކު ދިނުމަށް ނޮވެލްޓީން ހާއްސަ ސަމާލުކަމެއް ދެ އެވެ.

މި ފަހަރު ވެސް ނޮވެލްޓީން އެ ޔަގީންކަން ދެ އެވެ. އެ ބުކްޝޮޕުން ކަސްޓަމަރުންނަށް ފޯރުކޮށްދެނީ އެންމެ ކޮލިޓީ ރަނގަޅު ސްޓޭޝަނަރީޒް އެވެ. އޭގެ ތެރޭގައި ފޭބާ ކާސްލް، ސެލޯ އަދި އާޓްލައިން ފަދަ ދުނިޔޭގެ އެންމެ މަޝްހޫރު ބްރޭންޑުތައް ހިމެނޭ އިރު، އެ ތަކެތި ރާއްޖެ ގެންނަނީ ވެސް ސީދާ ސިންގަޕޫރާއި ދުބާއީ ފަދަ ތަންތަނުގައި ހުންނަ އެ ކުންފުނިތަކުގެ ފެކްޓްރީ އައުޓްލެޓްތަކުންނެވެ. މީގެ އިތުރުން، ނޮވެލްޓީން ގެންގުޅެނީ "ނޯ ކޮމްޕްރޮމައިޒް"ގެ ނަން ދީފައިވާ އެ ބުކްޝޮޕްގެ އަމިއްލަ މޮނިޓަ ފޮތް ބްރޭންޑެކެވެ.

"އަޅުގަނޑުމެންގެ އަމިއްލަ ފޮތްތައް ވެސް ތައްޔާރުކޮށްފައި ހުންނާނީ އެންމެ ފެންވަރު ރަނގަޅު ކަރުދާހުން އަދި ގަނޑު ކަނޑައިގެން ނުދާނެ ގޮތަށް،" ނޮވެލްޓީގެ މާކެޓިން މެނޭޖަރު އިރުފާން އިސްމާއިލް ވިދާޅުވި އެވެ.

އެ ކޮލީޓީ ތަކެތި، މާ ބޮޑު ބުރައަކާ ނުލާ ކަސްޓަމަރުންނަށް ފޯރުކޮށްދިނުމަކީ ވެސް ނޮވެލްޓީން ހާއްސަ ސަމާލުކަމެއް ދޭ ކަމެކެވެ. އެ ގޮތުން، ކަސްޓަމަރުން ފޮތް ލިސްޓް ހިފައިގެން ދާ އިރު ހުންނަނީ ފޮތް ލިސްޓަށް ތަކެތި ނަގައި، ވަކި ކުރުމަށް ފަހު ބަންދުކޮށްފަ އެވެ. އެހެންވެ، ކަސްޓަމަރުން ފިހާރައިގައި ހޭދަކުރަންޖެހޭ ވަގުތު ވަރަށް ބޮޑުތަން ކުޑަވެ އެވެ. އަދި އެ ތަކެތި ބަންދުކޮށްފައި ހުންނަނީ ތިމާވެއްޓާ ރަށްޓެހި ފޮތި ކޮތަޅުގައި ކަމަށް ވުމުން، އުފުލަން ވެސް ވަރަށް ބޮޑަށް ފަސޭހަވެގެން ދެ އެވެ.

ކަސްޓަމަރުންނަށް ފަސޭހަ ކުރުމުގެ ގޮތުން ނޮވެލްޓީން ވަނީ ފަރީދީ މަގުގައި ހުންނަ މައި ފިހާރައިގެ އިތުރުން، އެ ކުންފުނިން ހިންގާ ޕޭޕާވޯލްޑާއި އިސްކަންދަރު ސްކޫލު ކުރިމަތިން ވާ ގޮތަށް ހުންނަ ފަރިވާ ފިހާރަ އިން ވެސް ފޮތް ލިސްޓަށް ފޮތް ނަގައި ދޭ ގޮތަށް ހަމަޖައްސައިފަ އެވެ. އެ ދެ ފިހާރަ އިން ވެސް ދެނީ، މައި ތަނުން ދޫކުރާ ގޮތަށް ފޮތި ކޮތަޅުގައި ބަންދުކޮށް، އުފުލަން ފަސޭހަވާނެ ގޮތަށެވެ.

ކަސްޓަމަރުންނަށް އިތުރަށް ފަސޭހަކޮށްދިނުމަށް، ހުޅުމާލެ އާއި ވިލިމާލެ ހިމެނޭ ގޮތަށް މާލެ ސަރަހައްދުގެ ކޮންމެ ގެ އަކަށް ވެސް ފޮތް ލިސްޓަށް ހިލޭ ތަކެތި ޑެލިވަކޮށް ދެ އެވެ. އެ ހިދުމަތް، 3318831 އަށް ގުޅުމުން ލިބޭނެ އެވެ. އޭގެ އިތުރުން، ރަށްރަށަށް ގެންދާ ފަރާތްތަކަށް، ކޮންމެ ފޮތް ލިސްޓެއްގެ ތަކެތި ވަކިން ފޮއްޓެއްގައި ބަންދުކުރުމަށް ފަހު، ބޯޓަށް ގެންގޮސް ދެ އެވެ. އަދި ނާލު ވެސް ދައްކައި ދެ އެވެ.

"ކަސްޓަމަރުންގެ ފަރާތުން ލިބޭ ކޮމެންޓްސް ވަރަށް ރަނގަޅު. އަޅުގަނޑުމެން ވިއްކާ ހުރިހާ އެއްޗެއްގެ ކޮލިޓީ އާއި ދޭ ހިދުމަތް ވަރަށް ބޮޑަށް ބަލައިގަނޭ،" އިރުފާން ވިދާޅުވި އެވެ.

ކޮލިޓީ ތަކެތި ކަސްޓަމަރުންނަށް ފޯރުކޮށްދިނުމާ ހަމައިން ނޮވެލްޓީން ދުލެއް ނުކޮށްލަ އެވެ. އެ ގޮތުން، ނޮވެލްޓީން ގަންނަ އެއްވެސް މުދަލެއްގައި މައްސަލައެއް އުޅޭ ނަމަ، އެ އެއްޗެއް އެއްވެސް އަގަކާ ނުލާ ބަދަލުކޮށް ދެ އެވެ. އަދި ކަލްކިއުލޭޓަރަށް އެއް އަހަރުގެ ވޮރެންޓީ ވެސް ދެ އެވެ.

އެ ހުރިހާ ކަމަކާ އެކު، ނޮވެލްޓީން ވިޔަފާރި ކުރާ ފަރާތްތަކަށް ހާއްސަ އިނާޔަތްތަކެއް ވެސް ދެ އެވެ. އެ ގޮތުން، ގަނޑުކޮށް ތަކެތި ނަގާ ވިޔަފާރިވެރިންނަށް ދޭ ޑިސްކައުންޓުން ފެށިގެން، ކުރިމަގުގައި ކުރާ ވިޔަފާރިތަކަށް ދޭ އިނާޔަތްތައް ވެސް ފާހަގަކޮށްލެވެ އެވެ. އެ ކަންކަމުގެ ބޭނުމަކީ، ނޮވެލްޓީ އަށް ކުރާ އިތުބާރު ދެމެހެއްޓުމެވެ. އެކަން ނޮވެލްޓީން އަންނަނީ ސާބިތު ވެސް ކޮށްދެމުންނެވެ.