މޫސުމަށް އަންނަ ބަދަލުތަކުގެ ހަގީގީ ގެއްލުން މިހާރު އިހުސާސްވޭ: ޝާހިދު

މޫސުމަށް އަންނަ ބަދަލުތަކުގެ ވާހަކަ 1980 ގެ އަހަރު ތަކުން ފެށިގެން ރާއްޖެ އިން އައީ ދައްކަމުން ކަމަށާއި އެ ބަދަލުތަކުގެ ގެއްލުން މިހާރު ފެންނަމުންދާ ކަމަށް އދ. ގެ އާއްމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު މި ހަފުތާގައި ވިދާޅުވެއްޖެ އެވެ.

ކެނޭޑިއަން ބްރޯޑްކާސްޓިން ކޯޕަރޭޝަން (ސީބީސީ)ގެ ރޭޑިއޯ އަށް ދެއްވި އިންޓަވިއުއެއްގައި އޭނާ ވިދާޅުވީ، މޫސުމަށް އަންނަ ބަދަލުތަކުގެ ހަގީގީ އަސަރުތައް ރާއްޖޭގެ އިތުރުން މުޅި ދުނިޔޭގައި ވެސް މިހާރު އިހުސާސްވަަމުންދާ ކަމަށެވެ. އެ ބަދަލުތަކުން ރާއްޖެ އަަށް ލިބޭ އެންމެ ބޮޑު އެއް ގެއްލުމަކީ އޭނާ ވިދާޅުވި ގޮތުގައި ރާއްޖޭގެ ގޮނޑުދޮށްތައް ހަލާާކުވުމެވެ.

"މިއަދު އަޅުގަނޑުމެނަށް އާދެވިފައި މި ތިބީ ހަގީގަތުގައި އަޅުގަނޑުމެންގެ ގޮނޑުދޮށްތައް [ގިރާލައިގެން] ގެންދާ ތަން، އަޅުގަނޑުމެންގެ [ގައުުމުގެ] މުރަކަތައް މަރުވާތަން ފެންނަ ހިސާބަށް އަދި މޫސުމަށް އަންނަ ބަދަލުތައް މުޅި ދުނިޔޭގައި ވެސް، ހާއްސަކޮށް ކުދި ޖަޒީރާ ގައުމުތަކުގައ އިހުސާާސް ކުރެވޭ ހިސާބަކަށް،" ޝާހިދު ވިދާޅުވި އެވެ.

އަންނަ އާދީއްތަ ދުވަހު ސްކޮޓްލޭންޑްގެ ގްލާސްގޯގައި ފަށާ ކޮޕް 26 ސަމިޓްގެ ކުރިން ގައުމުތަކުގެ އެއްބާރުލުން ހޯއްދަވަން ޝާހިދު ބާއްވަވާ ބައްދަލުވުމެއް މާދަމާ ފަށާނެ އެވެ.

އެއީ ޝާހިދު ވިދާޅުވި ގޮތުގައި މޫސުމަށް އަންްނަ ބަދަލުތަކުގެ މައްްސަލައިގައި ހުރި ތަފާތުތައް ނައްތައިލެވޭނެ ގޮތްތައް ބަލަން ބާއްވާ ބައްދަލުވުމެކެވެ. މޫސުމަށް އަންނަ ބަދަލުތަކުގެ ގެއްލުން ކުޑަކުރުމާއި މެދު އެންމެނަށް އުއްމީދުދޭ ބައްދަލުވުމަކަށް އެ ބައްދަލުވުން ހަދަން އެދިވަޑައިގަންނަވާ ކަމަށް ވެސް އޭނާ ވިދާޅުވި އެވެ.

މޫސުމަށް އަންނަ ބަދަލުތަކުގެ ގެއްލުން ކުޑަކުރުމަށް، ދުނިޔެ ހޫނުވާ މިންވަރު ކުޑަކުރަން މަސައްކަތް ކުޑަކުރަން ޖެހެ އެވެ. އެގޮތުން ސިނާއީ ޒަމާނުގެ ކުރިން ދުނިޔޭގެ ފިނިހޫނުމިން ހުރި ވަރަށް ވުރެ ފިނިހޫނުމިން މަތިވާ ވަރު 1.5 ޑިގްރީ ސެލްސިއަސް އަށް ވުރެ ކުޑަކުރުމަކީ ބައިނަލްއަގްވާމީ އަމާޒެކެވެ. އެ އަމާޒަށް ވާސިލުވެވޭ ގޮތަށް ދުނިޔޭގެ ވެރިން މަސައްކަތް ކުރެއްވުމަށް ޝާހިދު ވަނީ މީގެ ކުރިން ވެސް ތަކުރާރުކޮށް ގޮވައިލައްވައިފަ އެވެ.