ހުކުމް ތަންފީޒު ފަސްކުރަން އެންގި ހައި ކޯޓުގެ ނިންމުން ސުޕްރީމް ކޯޓުން ބާތިލްކޮށްފި

މަދަނީ ހުކުމް ތަންފީޒުކުރުން ފަސްކުރުމާ މެދު ހައި ކޯޓުން ގޮތެއް ނިންމަންދެން، އެ ހުކުމެއް ތަންފީޒު ކުރުން ފަސްކުރަން ޖެހޭނެ ކަމަށް ހައި ކޯޓުން އިއްޔެ ނިންމި ނިންމުން ސުޕްރީމް ކޯޓުން މިއަދު ބާތިލްކޮށްފި އެވެ.

ސުޕްރީމް ކޯޓުން ކުރިން ނިންމާފައިވާ ގޮތުން މަދަނީ މައްސަލަތަކުގައި ހުކުމް ތަންފީޒު ކުރުން ފަސް ކުރެވޭނީ އިސްތިއުނާފް މަރުހަލާގައި މަތީ ކޯޓަކުން އެގޮތަށް އެންގުމުންނެވެ. ނަމަވެސް ހައި ކޯޓުގެ ފަނޑިޔާރުންގެ މަޖިލީހުން އިއްޔެ ނިންމީ އެ ކޯޓުގައި އިސްތިއުނާފް ކުރާ މައްސަލަތަކުގައި ހުކުމް ތަންފީޒު ކުރުން ފަސްކުރުމުގެ އަމުރެއް ނެރުމާ މެދު އެ ކޯޓުން ގޮތެއް ނިންމަންދެން ވެސް، އެ ހުކުމެއް ތަންފީޒު ކުރުން ފަސްކުރަން ޖެހޭނެ ކަމަށެވެ.

ހައި ކޯޓުގެ ނިންމުން ބާތިލްކޮށް، ސުޕްރީމް ކޯޓުން މިއަދު ނެރުނު ޕްރެކްޓިސް ޑައިރެކްޝަންގައިވަނީ ހުކުމް ތަންފީޒު ކުރަން އަމުރު ނުކުރާހާ ހިިނދަކު، އެ ހުކުމެއް ތަންފީޒު ކުރެވޭނެ ކަމަށާއި އަދި ހުކުމް ތަންފީޒު ކުރަން އަމުރު ކުރެވޭނީ މައްސަލާގައި ހިމެނޭ ފަރާތުން އެކަމަށް އެދުމުން ކަމަށެވެ.

އެ ޑައިރެކްޝަންގައިވަނީ ފައިސާއެއް ދައްކަން ކޮށްފައިވާ ހުކުމް ތަންފީޒު ކުރަން ފަސްކުރަން އަންގާއިރު، ދަށު ކޯޓުގެ ހުކުމާ އެއްގޮތަށް ކޯޓަށް ފައިސާ ދައްކަމުން ދިއުމަށާއި އެކަމަކު އިސްތިއުނާފް މައްސަލަ ނިމެންދެން ފައިސާ ދޫނުކޮށް ހިފަހައްޓަން އެންގުމުގެ ބާރު އިސްތިއުނާފް ކޯޓަށް އޮންނާނެ ކަމަށެވެ.

އެ ޑައިރެކްޝަނަށް އަމަލުކުރަން ފެށުމާ އެކު، ހައި ކޯޓުގެ އާންމު ސިޓީ ބާތިލްވީ ކަމަށް އެ ޑައިރެކްޝަންގައިވެ އެވެ.