ކްލަބްމެޑް ފިނޮޅުގެ ކޮންމެ މުވައްޒަފަކަށް ސާވިސް ޗާުގެ ގޮތުގައި މިދިޔަ މަހު 20،000ރ.

މިދިޔަ އޮކްޓޯބަރު މަހުގެ ސާވިސް ޗާޖުގެ ގޮތުގައި ކްލަބްމެޑް ފިނޮޅު ވިލާސް އިން ކޮންމެ މުވައްޒަފަކަށް 1،304 ޑޮލަރު (20،107ރ.) ބަހައިފި އެވެ.

ރިސޯޓް ވޯކާސް މޯލްޑިވްސްގެ ފޭސްބުކް ޕޭޖުން އާއްމު ކޮށްފައިވާ ތަފާސްހިސާބުތައް ދައްކާ ގޮތުން، މިދިޔަ މަހު ތިން ރިސޯޓަކުން ވަނީ 1،000 ޑޮލަރަށް ވުރެ ބޮޑުކޮށް ސާވިސް ޗާޖު ބަހައިފަ އެވެ. މީގެ ތެރެއިން ކްލަބްމެޑް ފިނޮޅަކީ އެންމެ ބޮޑު ސާވިސް ޗާޖެއް ބެހި ރިސޯޓެވެ.

މި ލިސްޓުގައި ދެވަނައިގައި އޮތީ ވަލްޑޯފް އެސްޓޯރިއާ އެވެ. އެ ރިސޯޓުން ސާވިސް ޗާޖުގެ ގޮތުގައި 1،062 ޑޮލަރު (16،376ރ.) ބަހާފައިވާއިރު ތިންވަނައިގައި އޮތް އަޔާޑާ މޯލްޑިވްސް އިން ބެހީ މުވައްޒަފަކަށް 1،049.27 ޑޮލަރު (16،179ރ.) އެވެ.

ތާޖު އެގްޒޯޓިކާގެ ކޮންމެ މުވައްޒަފަކަށް ސާވިސް ޗާޖުގެ ގޮތުގައި ދިނީ 834 ޑޮލަރު (12،860ރ.) އެވެ. ފަސްވަނައިގައި އޮތް ހުރަވަޅި އައިލެންޑް ރިސޯޓާއި ކުޑަދޫ ރިސޯޓުން ދިނީ 817.91 ޑޮލަރު (12،612ރ.) އެވެ.

މިދިޔަ މަހުގެ 58 ރިސޯޓެއްގެ ސާވިސް ޗާޖުގެ މައުލޫމާތު ރިސޯޓް ވޯކާސް ޕޭޖަށް ވަނީ ހިއްސާ ކޮށްފަ އެވެ. މީގެ ތެރެއިން ގިނަ ރިސޯޓުތަކުން ވަނީ 500 ޑޮލަރު (7،710ރ.) އަށް ވުރެ ބޮޑު ސާވިސްޗާޖެއް ބަހައިފަ އެވެ.

ސާވިސް ޗާޖު ލިސްޓުގައި އެންމެ ފަހަތުގައި އޮތީ ޖޭއޭ މަނަފަރު ރިސޯޓެވެ. އެ ރިސޯޓުން މިދިޔަ މަހު ސާވިސް ޗާޖުގެ ގޮތުގައި ކޮންމެ މުވައްޒަފަކަށް ދިނީ 222 ޑޮލަރު (3،423ރ.) އެވެ.

ޓޫމިނިސްޓްރީގެ ތަފާސްހިސާބުތައް ދައްކާގޮތުގައި ކޮވިޑް-19 އަށް ފަހު 160 ރިސޯޓެއްގެ އޮޕަރޭޝަންސް ވަނީ ފަށައިފަ އެވެ.