އަލީ ވަހީދު، ތިން ދުވަސް ތެރޭ ހާޒިރު ނުވެއްޖެ ނަމަ އަސްހަދަށް ފިޔަވަޅު އަޅަނީ

ޝަރީއަތް ހިނގަނިކޮށް ރާއްޖެއިން ބޭރަށް ވަޑައިގެން އުޅުއްވާ ކުރީގެ ޓޫރިޒަމް މިނިސްޓަރު އަލީ ވަހީދު ތިން ދުވަހުގެ ތެރޭގައި ކޯޓަށް ހާޒިރު ނުވެއްޖެ ނަމަ އޭނާގެ ބަދަލުގައި ކޯޓުގައި ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީއަށް ފިޔަވަޅު އަޅަން ކްރިމިނަލް ކޯޓުން ނިންމައިފި އެވެ.

ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާ ކުރި މައްސަލައެއްގައި އަލީ ވަހީދުގެ މައްޗަށް ދައުވާކޮށް ޝަރީއަތް ފެށި ފަހުން، އޭނާ ކޯޓުގެ ހުއްދައާ އެކު މިދިޔަ ފެބުރުއަރީ މަހު ބޭސްފަރުވާއަށް ކަމަށް ވިދާޅުވެ ބޭރަށް ވަޑައިގަތް ގޮތަށް ހުންނެވީ އިނގިރޭސިވިލާތުގަ އެވެ.

ކްރިމިނަލް ކޯޓުން އޭނާގެ ޕާސްޕޯޓު ދޫކޮށްލީ އަސްހަދު ޖާމިނުކޮށެވެ. އެ އެއްބަސްވުމުގައި އޮތީ ފަރުވާއަށް ފަހު، ހަތަރު މަސް ތެރޭ އަލީ ވަހީދު ވަޑައިނުގެންފި ނަމަ އަސްހަދު ޒިންމާ ނަގާ ގޮތަށެވެ.

އަލީ ވަހީދަށް ކުރި ދައުވާތަކުގެ އަޑުއެހުމެއް މިއަދު ކްރިމިނަލް ކޯޓުގައި ބޭއްވީ އަސްހަދު ހާޒިރުކޮށްގެންނެވެ. ކުރިން ސިއްރުން ކުރިއަށްގެންދިޔަ މި މިއަދު ކްރިމިނަލް ކޯޓުން ވަނީ ލައިވްކޮށްފަ އެވެ.

މިއަދުގެ އަޑުއެހުމުގައި މައްސަލަ ބައްލަވާ ގާޒީ ހަސަން ސައީދު ވިދާޅުވީ، 72 ގަޑިއިރުގެ ތެރޭގައި އަލީ ވަހީދު ކޯޓަށް ހާޒިރުނުވެއްޖެ ނަމަ ކޯޓުގެ ހުރުމަތް ރައްކާތެރިކުރުމުގެ ގަވައިދުގެ ދަށުން އަސްހަދަށް ފިޔަވަޅު އަޅާނެ ކަމަށެވެ. އެ ދެ މީހުންނަށް ފިޔަވަޅު ނާޅައި ދޫކޮށްނުލެވޭނެ ކަމަށާއި އެއީ ކޯޓުގެ ގަދަރު ހިފަހައްޓަން ކަމަށް ވިދާޅުވި އެވެ.

އަސްހަދު ވިދާޅުވި ގޮތުގައި ޖާމިނުވެ އެއްބަސްވި ގޮތަށް ހަތަރު މަސް ތެރޭގައި އޭނާ އަލީ ވަހީދު ކޯޓަށް ހާޒިރު ކުރި އެވެ. އޭނާ އެހެން ވިދާޅުވީ މީގެ ކުރިން އަލީ ވަހީދު އޮންލައިންކޮށް ޝަރީއަތުގައި ބައިވެރިވެފައިވާތީ އެވެ.

އަލީ ވަހީދު ހާޒިރު ނުވެއްޖެ ނަމަ ބަންދުކޮށްގެން ކޯޓަށް ހާޒިރު ކުރުމަށްޓަކައި ހައްޔަރު އަމުރެއް ނެރޭނެ ކަމަށް ވެސް ގާޒީ ހަސަން ސައީދު ވިދާޅުވި އެވެ.

އިނގިރޭސިވިލާތުގައި ހުންނަވައިގެން ޝަރީއަތުގައި ބައިވެރިވުމުގެ ފުރުސަތު ކްރިމިނަލް ކޯޓުން މީގެ ކުރިން ވަނީ އަލީ ވަހީދަށް ދީފަ އެވެ. އެގޮތަށް ކުރިން އަޑުއެންތަކެއް ވެސް ބޭއްވި އެވެ.

އެކަމަކު އެ ނިންމުން ދައުލަތުން ސުޕްރީމް ކޯޓުގައި އިސްތިއުނާފު ކުރުމުން އެ މައްސަލަ ބަލައި ނިމެންދެން، އޭނާގެ ޝަރީއަތް އޮންލައިންކޮށް ނުބާއްވަން ސުޕްރީމް ކޯޓުން ވަނީ އަމުރެއް ވެސް ނެރެފަ އެވެ. އެ މައްސަލަ ވެސް ކުރިއަށްނުގެންދެވި ވަނީ އަލީ ވަހީދު ސުޕްރީމް ކޯޓަށް ހާޒިރު ނުވެގެންނެވެ. މީގެ ކުރިން ސުޕްރީމް ކޯޓުން ޗިޓު ފޮނުވުމުން އަޑުއެހުމަށް ހާޒިރުނުވުމުން އެ ކޯޓުން ވަނީ އޭނާ ކޯޓުގެ ހުރުމަތް ކެނޑީ ކަމަށް ބަލައި ދެ މަހާއި 12 ދުވަހަށް ޖަލަށް ލާން ހުކުމްކޮށްފަ އެވެ.