މާލޭގައި މިނީބަހުގެ ހިދުމަތް ނުފެށެނީ ބަޖެޓް ނުދޭތީ: މިނިސްޓަރު

މާލޭގައި މިނީ ބަހުގެ ހިދުމަތް ފެށުމަކީ ރައީސް އިބްރާހީމް މުހައްމަދު ސޯލިހުގެ ސަރުކާރުގެ ފުރަަތަމަ 100 ދުވަހުގެ ތެރޭގައި ފުއްދަން ވެވަޑައިގެންނެވި ވައުދެއް ކަމަށް ވިޔަސް، އެކަން އަދިވެސް ނުފެށެނީ ބޭނުންވާ ވަރަށް ބަޖެޓް ނުލިބޭތީ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރަކު ކުރެއްވި ސުވާާލަކަށް ޖަވާބު ދެއްވަމުން މިިނިސްޓަރު ވިދާޅުވީ މިނީބަހުގެ ހިދުމަތް ފަށަން ބަޖެޓް ނުލިބުުމުން، އެހީދޭ ޖަަމާއަތްތަކުގެ އެހީ ހޯދަން ވެސް މަސައްކަތް ކުރައްވާފައިވާނެ ކަމަށެވެ. މިނީ ބަހުގެ ހިދުމަތަށް އަންނަ އަހަރުގެ ބަޖެޓްގައި 16 މިލިޔަން ރުފިޔާާ ޖަހާފައި އޮތަސް އެއީ އެކަމަށް އެކަށީގެންވާ އަދަދެއް ނޫން ކަމަށް ވެސް އޭނާ ވިދާޅުވި އެވެ.

"ހަތަރު ބަސް ނޫނީ ފަސް ބަސް ގަނެގެންނެއް އަޅުގަނޑުމެންނަކަށް [މާލޭގެ ބަސް ދަތުރުގެ] މަސައްކަތެއް ނުފެއްޓޭނެ،" އޭނާ ވިދާޅުވި އެވެ.

މާލޭގައި މިނީ ބަހުގެ ދަތުރުތައް ފެށުމަކީ ސަރުކާރުގެ ފުރަތަމަ 100 ދުވަހުގެ ތެރޭގައި ފުއްދަން ޖެހޭ ވައުދުތަކުގެ ތެރެއިން، ޓްރާންސްޕޯޓް މިނިސްޓްރީއާ ހަވާލުވެ، ނުނިމި އޮތް ހަމަ އެކަނި ކަންތައް ކަމަށް ވެސް ނަހުލާ ވިދާޅުވި އެވެ. މިނިސްޓްރީން އެކަމަށް ގިނަ މަސައްކަތްްތަކެއް ކޮށްފައި ވާނެ ކަމަށް ވެސް ވިދާޅުވި އެވެ.

"ވަޒީރެއްގެ ގޮތުގައި އަޅުގަނޑުމެން އައްޔަން ކުރިޔަސް އަޅުގަނޑުމެެންނަށް މަސައްކަތްތައް ކުރެވޭނީ އަދި އަަޅުގަނޑުމެންނާ ހަވާލުކުރާ ޒިންމާތައް އަދާކުރެވޭނީ އަޅުގަނޑުމެންނަށް އެ މަސައްކަތަކަށް ބަޖެޓް ލިބިގެން ކަމަށް ވާތީ، އަދި އެކަމަށް އަޅުގަނޑުމެންނަށް މިހައިތަނަށް ބަޖެޓް ލިބިފައި ނުވާތީ އެކަން ނުވެ އޮތީ،" އެމްޑީޕީގެ ޗެއާޕާސަން އަދި މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ކުރެއްވި ސުވާލަށް ޖަވާބު ދެއްވަމުން ނަހުލާ ވިދާޅުވި އެވެ.

އޭނާ ވިދާޅުވީ މިނީ ބަހުގެ ހިދުމަތަށް ބަޖެޓް ލިބެން އޮތީ "ބުރިބުރިކޮށްގެން" [އެކި ފަހަރު މަތިން] ކަމަށާއި، އެގޮތަށް އެކަމަށް ބޭނުންވާ ފައިސާ ހަަމަވުމުން މަސައްކަތް ފަށްޓަވާނެ ކަމަށެވެ.