މިތުން އާއި ކަރަންއާ އެކު ކަލާޒްގެ "ހުނަރުބާޒް" ގެ ޖަޖަކަށް ޕަރިނީތީ

ކަލާޒް ޗެނެލުން ދައްކަން ފަށަން ތައްޔާރު ވަމުން އަންނަ އާ ރިއަލިޓީ ޝޯ "ހުނަރުބާޒް: ދޭޝް ކީ ޝާން" ގެ ތިން ވަނަ ޖަޖަކަށް ޕަރިނީތީ ޗޯޕްޅާ ސޮއިކޮށްފި އެވެ.

އެ ޝޯގެ އަނެއް ދެ ޖަޖުންނަކީ މަޝްހޫރު އެކްޓަރު މިތުން ޗަކްރަބަތީ އާއި ޑައިރެކްޓަރު/ޕްރޮޑިއުސަރު ކަރަން ޖޯހަރެވެ. އެ ދެ މީހުންނާ އެކު "ހުނަރުބާޒް" ގެ ޖަޖުންގެ ޕެނެލެކުން ޕަރިތީނީ އަށް ފުރުސަތު ލިބުނު އިރު، މިއީ ޓީވީ ޝޯއެއްގެ ޖަޖެއްގެ ގޮތުގައި އޭނާ ފެންނާނެ ފުރަތަމަ ފަހަރެވެ. ޕަރިނިތީ އެ ޝޯގައި ބައިވެރިވާން ނިންމި އިރު އޭނާގެ އަތުގައި މި ވަގުތު ހުރި ފިލްމުތަކުގެ ތެރޭގައި ސޫރަޖް ބަރަޖަތިއާގެ "އޫޗާއީ" އާއި ރަންބީރް ކަޕޫރްގެ "އެނިމަލް" ހިމެނެ އެވެ.

"ހުނަރުބާޒް" އިން ލިބުނު ފުރުސަތާ ބެހޭ ގޮތުން ޕަރިނީތީ ބުނީ މިތުން އާއި ކަރަން ކަހަލަ ވަރުގަދަ ދެ ލެޖެޑުންނާ އެކީ "ހުނަރުބާޒް" ގައި މަސައްކަތް ކުރަން ލިބުމަކީ ވަރަށް ބޮޑު ފަހުރެއް ކަމަށެވެ.

"އަހަންނަކީ އަބަދު ވެސް އޯޑިއަންސާ ކުރިމަތިލައި އޯޑިއަންސާ އިންޓަރެކްޓް ކުރަން ވަރަށް ޝައުގުވެރިވާ މީހެއް. ހުނަރުބާޒަކީ އެފަދަ ޕްލެޓްފޯމެއް." ފިލްމު "ލޭޑީސް ވާސަސް ރިކީ ބާލް" އިން 2011 ގައި ބޮލީވުޑަށް ނުކުތް ބަތަލާ ބުންޏެވެ.

މަޝްހޫރު ބަތަލާ ޕްރިޔަންކާ ޗޯޕްރާއާ ދެބޭންގެ ދެދަރި ޕަރިނީތީ ބުނީ މީގެ ކުރިން ވެސް ބައެއް ޓީވީ ޝޯތަކުގައި ބައިވެރިވާން ފުރުސަތު ލިބުނު ކަމަށެވެ. އެކަމަކު ކުރިން ލިބުނު އެއްވެސް ހުށަހެޅުމަކީ ގަޔާވި އެއްޗެއް ނޫން ކަމަށް ބުންޏެވެ.

"އެކަމަކު ކަލާޒްގެ ހުނަރުބާޒަކީ އަހަންނަށް ވަރަށް ކަމުދާ ކަހަލަ ޝޯއެއް. މީގައި އަދި އުފާވާ ކަމަކީ މިތުން އާއި ކަރަން ކަހަލަ ތަޖުރިބާކާރު ދެ ލެޖެންޑުންނާ އެކު މަސައްކަތް ކުރަން ލިބުނީމަ." ޕަރިނީތީ ބުންޏެވެ.

ދައްކަން ފަށާނެ އިރެއް އަދި އިއުލާން ނުކުރާ މި ޝޯ އަކީ އާދަޔާހިލާފު އެކި ކަހަލަ ހުނަރު ހުންނަ މީސްމީހުންގެ ހުނަރުތައް ދައްކައިލަން ހާއްސަ ޝޯއެކެވެ.

ކަރަން އަކީ ކުރިން ވެސް ކަލާޒްގައި ހަމަ މިކަހަލަ އެހެން ޝޯއެއްގައި ވެސް ޖަޖް ކަން ކޮށްފައިވާ މީހެކެވެ. އެއީ މިހާރު 9 ވަނަ ސީޒަން ދައްކަން ހަމަޖެހިފައިވާ އިންޑިއާސް ގޮޓް ޓެލެންޓް (އައިޖީޓީ) އެވެ. އޭގެ ޖަޖުންނަކީ ޝިލްޕާ ޝެޓީ އާއި ލަވަކިޔުންތެރިޔާ ބާދުޝާގެ އިތުރުން ކިރަން ކޭރެވެ.