އަހަރެއްހާ ދުވަސް ފަހުން ޕްރައިވަޓައިޒޭޝަން ބޯޑުގެ ރައީސަކަށް އާސިމް

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ރައީސަކަށް އެތަނުގެ ނައިބު ރައީސްގެ ގޮތުގައި ހުންނެވި އާސިމް މުހައްމަދު އައްޔަންކުރައްވައިފި އެވެ.

ކުންފުނިތައް ޒިންމާދާރުކުރުވައި ހިންގުން ހަރުދަނާ ކުރަން ބާރު އެޅުމުގެ ޒިންމާ މަތިކޮށްފައިވާ ޕީސީބީގައި ރައީސަކު ނެތްތާ އަހަރަކަށް ވުރެން ގިނަ ދުވަސް ވެއްޖެ އެވެ. އެތަނުގެ ރައީސަކަށް ހުންނެވި ހަސަން ވަހީދު ވަނީ އޮކްޓޯބަރު، 2020 ގައި އިސްތިއުފާ ދެއްވައިފަ އެވެ.

އެ މުއްދަތުން ފެށިގެން މިއަދާ ހަމައަށް ވެސް ޕީސީބީގައި އިސް ދައުރެއް އާސިމް އަދާކުރައްވާފައިވެ އެވެ.

އޭނާގެ އިތުރުން އެ ބޯޑުގައި މިހާރު ތިއްބަވަނީ ރުޝާހާ އަހަމްދު ޝަރީފް އާއި އަލީ ސުޖާއު އާއި އައިޝަތު ޝާޒްލީ އާއި އަލީ ޝަފީއު އާއި އަހްމަދު ޝަރީފް ޔޫސުފް އެވެ.

މި ސަރުކާރުގައި މިހާރު ތިއްބެވި މެމްބަރުންނާ އެކު ބޯޑު އެކުލަވާލީ ކުރިން ތިއްބެވި މެމްބަރުން އެކަށީގެންވާ ގޮތެއްގައި ޒިންމާ އަދާނުކުރާ ކަމަށް މަޖިލީހުން ފާސްކޮށް، އަލުން ބޯޑު އައްޔަންކުރަން ރައީސަށް ލަފާ އެރުވުމުންނެވެ. އެ ބޯޑަށް މެމްބަރުން އައްޔަންކުރުމާއި ވަކިކުރުމުގެ ބާރު އޮތީ ރައީސަށެވެ. އެކަމަކު މަޖިލީހުގެ ރުހުން ހޯދަން ޖެހެ އެވެ.

ޕީސީބީ ކުރިން ހިންގި ގޮތުގެ މައްޗަށް ކުރި އޮޑިޓަށް ފަހު ނެރުނު ރިޕޯޓުން އެނގުނީ ބޯޑުގައި ރަނގަޅު އޮނިގަނޑެއް ހަދާފައި ނެތުމުން އިދާރީ ހިންގުމަށް ބޭނުންވާނެ ގާބިލް މުވައްޒަފުން ބޭނުންވާ އަދަދަށް ނުލިބުމާއި ބޯޑުގެ މައްޗަށް މަތިކޮށްފައިވާ މަސްއޫލިއްޔަތުތައް އަދާނުކުރެވުމާއި އިދާރީ ގޮތުން ހިންގަން ޖެހޭ ކަންކަން ނުކުރެވުމާއި ގާނޫނު އެންމެ ފުރިހަމަ ގޮތަށް ތަންފީޒު ނުކުރެވޭ ކަމަށެވެ.

އެ ރިޕޯޓުގައިވާ ގޮތުން ސަރުކާރުގެ ކުންފުނިތަކާއި ސަރުކާރު ބައިވެރިވާ ކުންފުނިތަކާއި ވިޔަފާރި އުސޫލުން ހިންގާ ސަރުކާރުގެ ތަންތަނުގެ ތެރެއިން ފައިދާ ނުވާ ތަންތަނާ މެދު އަޅާނެ އިސްލާހީ ފިޔަވަޅެއް ބޯޑުން ކަނޑައަޅާފައި ނެތެވެ. ބައެއް ކުންފުނިތައް ދިރާސާކޮށް ހިންގުން ހަރުދަނާ ކުރުމަށް ދޭން ޖެހޭ ލަފާ ބޯޑުން ދިނަސް، ހުރިހާ ކުންފުނިތައް ދިރާސާ ކުރާނެ ގާބިލް ކަމެއް ނެތް ކަމަށް ވެސް ރިޕޯޓުގައިވެ އެވެ.

މި ރިޕޯޓަށް ފަހު އާ މެމްބަރުން ޕީސީބީއަށް އައްޔަންކޮށް، އެތަނުގެ ހިންގުން ވަނީ ކުރިއަށް ވުރެން ހަރުދަނާކޮށްފަ އެވެ.