ނަސީރު އަނެއްކާ ވެސް ފިނޭންސް މިނިސްޓަރުގެ އެޑްވައިޒަރަކަށް

ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމުގައި ހުންނެވި ކުރީގެ ގަވަރުނަރު އަހުމަދު ނަސީރު އަނެއްކާ ވެސް ފިނޭންސް މިނިސްޓަރުގެ އެޑްވައިޒަރުގެ މަގާމަށް ބަދަލުކޮށްފި އެވެ.

ފިނޭންސް މިނިސްޓްރީގެ ވެބްސައިޓުން އެނގޭ ގޮތުން އޭނާ މިހާރު ހުންނެވީ އެ މިނިސްޓްރީގެ އެޑްވައިޒަރުގެ މަގާމުގަ އެވެ.

ފިނޭންސް މިނިސްޓަރުގެ އެޑްވައިޒަރަކަށް ނަސީރު އަލުން މި ހަމަޖެއްސީ ފިނޭންސް މިނިސްޓަރަކަށް މޫސާ ޒަމީރު މިދިޔަ މަހުގެ 30 ގައި ބަދަލުކުރެއްވުމާ އެކު އެވެ. އެންމެ ފަހުން ނަސީރު ހުންނެވީ ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމުގަ އެވެ.

އާ ސަރުކާރު ވެރިކަމަށް އައިސް މިދިޔަ އަހަރުގެ ޑިސެމްބަރު މަހު ވެސް ނަސީރަށް ފުރަތަމަ ދެއްވީ އޭރުގެ ފިނޭންސް މިނިސްޓަރު މުހައްމަދު ޝަފީގުގެ އެޑްވައިޒަރުގެ މަގާމެވެ. މިނިސްޓަރު ފެންވަރުގައި އެ މަގާމުގައި ހުންނަވަނިކޮށް މިދިޔަ އޭޕްރީލް މަހު އޭނާ ފޮރިން މިނިސްޓްރީ ބަދަލުކުރެއްވީ އެވެ.

ފިނޭންސް މިނިސްޓްރީގައި މިހާރު މިނިސްޓަރުގެ އިތުރުން ސިޔާސީ މަގާމުތަކުގައި 11 ބޭފުޅަކު ތިއްބަވަ އެވެ. އެއީ އެޑްވައިޒަރު ނަސީރުގެ އިތުރުން ތިން ސްޓޭޓް މިނިސްޓަރުންނާއި 8 ޑެޕިއުޓީ މިނިސްޓަރުންނެވެ.