އަރަބިއްޔާގެ ދަރިވަރުންނަށް ބާޖަމާލުއްދީން ބިން ހަމަޖައްސައިދީފި

އަރަބިއްޔާ ސްކޫލްގެ ދަރިވަރުންނަށް، ކުރީގެ ބާޖަމާލުއްދީން ސްކޫލް ބިން ސަރުކާރުން ހަމަޖައްސައިދީފި އެވެ.

މީގެ އަށް އަހަރުކުރިން ބޭނުންކުރަން ފެށި އަރަބިއްޔާ އިމާރާތުގެ ތަނބުތަކުގައި ރެނދުލައި، ވަރަށް ބޮޑަށް ހަލާކުވުމުން އެޑިއުކޭޝަން މިނިސްޓްރީން ނިންމާފައި ވަނީ އަންނަ މަހުގެ 16 ގައި ފަށާ ދެ ވަނަ ޓާމަށް ވަގުތީ ގޮތުން އެ ދަރިވަރުން އިއްޒުއްދީން ސްކޫލަށް ބަދަލުކުރާށެވެ.

އެއާއެކު، މިހާރު އެ ސްކޫލް މިހާރު ހިންގާ އިމާރާތަށް ދިމާވެފައިވާ ޖާގައިގެ ދަތިކަން ހައްލުކުރުމަށް، މާލެއިން ބޮޑު ބިމެއް ހަމަޖައްސައިދެމުން އަންނަ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ އިއްޔެ ވިދާޅުވެފައިވެ އެވެ. އެކަން މި ހަފްތާގެ ތެރޭގައި ހަމަޖެހޭނެ ކަމަށް ވިދާޅުވި ނަމަވެސް އިތުރު ތަފްސީލެއް ނުދެއްވަ އެވެ. އޭގެ އިތުރުން، ހުޅުމާލޭގައި އަރަބި މީޑިއަމަށް ކިޔަވައިދޭ ސްކޫލެއް ގާއިމްކުރަން ވެސް ސަރުކާރުން ނިންމާފައިވެ އެވެ.

އިމާރާތުގެ މައްސަލައިގައި އަރަބިއްޔާގެ ޕޭރެންޓު ޓީޗާސް އެސޯސިއޭޝަން (ޕީޓީއޭ) އިން މިއަދު ވަނީ ރައީސް އިބްރާހިމް މުހައްމަދު ސޯލިހުއާ ވެސް ބައްދަލުކުރައްވައިފަ އެވެ.

އެ ބައްދަލުވުމުގައި ބައިވެރިވެވަޑައިގެންނެވި ޕީޓިއޭގެ ނައިބު ރައިސް އައިޝަތު ޝާދިޔާ "މިހާރު" އަށް ވިދާޅުވީ އިއްޒުއްދީން ސްކޫލްގެ ދަރިވަރުންނާ ހިއްސާވެގެން ކިޔަވައިދެވޭނެ ކަމަށް ރައީސް ވެސް ގަބޫލުނުކުރައްވާ ކަމަށެވެ. އެކަމަކު، އަރަބިއްޔާގެ ދަރިވަރުންނަށް ދިމާވެފައިވާ މައްސަލައަށް އަދި ވެސް ވަގުތީ ހައްލެއް ނުފެންނަ ކަމަށް ރައީސް ވިދާޅުވެފައިވާކަން އޭނާ ފާހަގަކުރެއްވި އެވެ.

"ވަގުތީ ހައްލެއް ހޯއްދަވައިދެއްވާނެ ކަމަށް އެ މަނިކުފާނު ވިދާޅުވީ،" ޝާދިޔާ ވިދާޅުވި އެވެ.

އެކަމަކު އެ ސްކޫލަށް ދާއިމީ ހައްލެއްގެ ގޮތުގައި، ބާޖަމާލުއްދީން ހުރި ބިމުގައި އާ އިމާރާތެއް އަޅައި ކިޔަވައިދޭން ނިންމާފައިވާ ކަމަށް ރައީސް ވިދާޅުވެފައިވާ ކަމަށް، ޕީޓީއޭއިން ބުންޏެވެ.

އަރަބިއްޔާގެ ބެލެނިވެރިން ބުނާގޮތުން، 800 އެއްހާ ދަރިވަރުން ކިޔަވަމުން އަންނަ ސްކޫލްގެ ދަރިވަރުން އިއްޒުއްދީނަށް ބަދަލުކުރުމުން ޖާގައިގެ ދަތިކަން ވަރަށް ބޮޑަށް ދިމާވާނެ އެވެ.

އަރަބިއްޔާ ސްކޫލު މިހާރު ހިންގަނީ 11،000 އަކަފޫޓުގެ ބިމުގައި، 46 ކްލާސްރޫމް ހުންނަ ހަތް ބުރީގެ އިމާރާތެއްގައި ދެ ދަންފަޅިއަށެވެ. އެކަމަކު އިއްޒުއްދީނަކީ ވިއްސަކަށް ކްލާސްރޫމް ހުންނަ 8،000 އަކަފޫޓުގެ ސްކޫލެކެވެ. "...މިއީ އެއްގޮތަކަށް ވެސް ބެލެނިވެރިން ތަހައްމަލްކުރަން ބޭނުންވާ ކަންތައްތަކެއް ނޫން. ޝެއާކޮށްގެން އެތަނަށް ދާކަށް ބެލެނިވެރިން އެއްގޮތަކަށް ވެސް ބޭނުމެއް ނުވޭ. ބެލެނިވެރިންގެ ފަރާތުން މި އެދުނީ މިނިސްޓަރުގެ އަރިހުގައި އަދި އެއްފަހަރު މިކަން ރިވިއުކޮށްދީފައި މިއަށްވުރެ ރަނގަޅު ހައްލެއް ހޯއްދަވައިދެއްވާށޭ،" ކަންބޮޑުވުން ފާޅުކޮށް ވާހަކަދެއްކި ޕީޓީއޭގެ ހަޒާންދާރު ޔޫސުފް އަބްދުﷲ އިއްޔެ ވިދާޅުވި އެވެ.

އެ ބެލެނިވެރިންގެ ކަންބޮޑުވުންތަކަށް މިނިސްޓަރު ތަކުރާރުކޮށް ވިދާޅުވަމުން ގެންދަވަނީ އަރަބިއްޔާގެ ދަރިވަރުންނަށް ދެރަގޮތެއް ނުވާނެ ކަމަށެވެ. އެ މައްސަލަތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން އޭނާ ދިޔައީ ދެއްވަމުންނެވެ.

ބާޖަމާލުއްދީންގެ ނަމުން މަޝްހޫރު އިމާރާތުގައި އެންމެ ފުރަތަމަ ހިންގީ ޖަމާލުއްދީން ސްކޫލެވެ. އެ ތަން ވަރަށް ބޮޑަށް ބާވެ، ހަލާކުވުމުން ޖަމާލުއްދީން ސްކޫލްގެ ދަރިވަރުންނަށް އެ އިމާރާތާ ޖެހިގެން އާ ސްކޫލެއް ހަދައިދީ ދަރިވަރުން ބަދަލުކުރި އެވެ.

އެއަށްފަހު، ބާޖަމާލުއްދީން އިމާރާތް ބޭނުންކުރީ ގައުމީ ޔުނިވާސިޓީގެ ކޯސްތައް ހިންގުމަށެވެ. ނަމަވެސް އެތަން ބޭނުންކުރުމަށް ނުރައްކާ ވެފައިވާ ކަމަށް ބުނެ ކުރީގެެ ސަރުކާރުން އެމްއެންޔޫ އެތަނުން ބޭރުކުރީ އެވެ. އޭގެ ފަހުން، އިލެކްޝަންސް ކޮމިޝަން (އީސީ) އިން އިލެކްޝަންސްގެ މައި މަރުކަޒުގެ ގޮތުގައި އެ ތަން ބޭނުންކުރަން ފެށި އެވެ.