އިންޑިއާ އައުޓެއް ނުގޮވޭނެ، ފުލުހުން ނުކުމެ ޔާމީން ހުއްޓުވަން ޖެހޭ: ނަޝީދު

ރާއްޖޭގައި އިންޑިއާ ސިފައިން ތިބުމާ ދެކޮޅަށް ކުރީގެ ރައީސް އަބްދުﷲ ޔާމީނު އިސްކޮށް ހުންނަވައިގެން ކުރިއަށް ގެންދަވާ "އިންޑިއާ އައުޓް" ކެމްޕެއިން ފުލުހުން ނުކުމެ ހުއްޓުވަން ޖެހޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

މާލޭގެ މީހުންނަށް ހާއްސަ ކޮށްގެން އެމްޑީޕީން ބޭއްވި ބައްދަލުވުމެއްގައި އެ ޕާޓީގެ ރައީސް ނަޝީދު ވިދާޅުވީ "އިންޑިއާ އައުޓް" ޖައްސަވައިގެން ޔާމީން ނުކުންނެވުމަކީ ރައްޔިތުން ލަދުގަންނާނެ ކަމެއް ކަމަށެވެ. އަދި ވިދާޅުވީ ހުދު އެ މަނިކުފާނު އެ ގޮތަށް ކަންތައް ކުރައްވައިފި ނަމަ އެމްޑީޕީގެ މެމްބަރުން ލަދުގަންނާނެ ކަަަމަށާއި ނަމަވެސް އެ ވާހަކަ ދަންނަވަން އުނދަގޫ ވާނެ ކަމަށެވެ.

"އަދި އަޅުގަނޑަށް އެނގޭ ތިޔަބޭފުޅުންނަށް އުނދަގޫފުޅު ވާނެ ކަން ވެސް އަޅުގަނޑު ގާތުގައި ބަލަ ރައީސްއޭ ތިހިރީ ހާދަހާ އެހެން ބާވަތަކަށޭ ހެދުން އަޅުއްވައިގެން، ބައްލަވާށޭ ޖައްސަވައިގެން ތިޔަ ހުރި އެއްޗެއް ވެސް. އެހެން ދަންނަވާން ވެސް އުނދަގޫފުޅުވާނެ. ޕީޕީއެމަށް ދިމާވެގެން އެ އުޅެނީ އެ ދަތުރު،" ކުރީގެ ރައީސް ނަޝީދު ވިދާޅުވި އެވެ.

އެ މަނިކުފާނު ވިދާޅުވިގޮތުގައި، އިދިކޮޅު ލީޑަރު ޔާމީން މިހާރު ކުރައްވަނީ ތަހުޒީބު އެއްވެސް މުޖުތަމައެއްގައި ބަލައިގަންނާނެ ކަމެއް ނޫނެވެ. އެއީ ދިވެހިރާއްޖޭގެ މަސްލަހަތާ ވެސް ހިލާފު ކަމެއް ކަމަށާއި ރާއްޖޭގައި އެ ގޮތަށް ކަންތައް ނުކުރެވޭނެ ކަމަށްް ވެސް ނަޝީދު ވިދާޅުވި އެވެ.

"މިސާލަކަށް އިނގިރޭޭސި ވިލާތުގެ ބޮޑަވަޒީރަކު، އޭނާގެ މުޅި މޭމަތި ފުރެންދެން، ފްރާންސް އައުޓް، ޖަހައިގެން ގޮސް ލަންޑަނު މެދުގައި ހަޅޭއްލަވަމުން ދުވެވިދާނެ ހެއްޔޭ؟ ނުވެވޭނެ. ތަހުޒީބު އެއްވެސް ޑިމޮކްރަެސީއެއްގައި މި ކަަމެއް ނުހިނގާނެ،" ސަލްޓަން ޕާކްގައި އޮތް ބައްދަލުވުމުގައި ނަޝީދު ވިދާޅުވި އެވެ.

"ރައީސް ޔާމީނަކަށް އިންޑިއާ އައުޓް ޖައްސަވައިގެން ނުހިންގެވޭނެ. އެއީ ދިވެހިރާއްޖޭގެ ފުލުހުން ނުކުމެ ހުއްޓާން ޖެހޭނެ ކަމެއް."

"އިންޑިއާ އައުޓް" ކެމްޕޭނާ ދެކޮޅަށް ނަޝީދު ކުރިން ވެސް ވަނީ އެކި ފަހަރު މަތިން ވާހަކަފުޅު ދައްކަވައިފަ އެވެ. ނަަމަވެސް ފުލުހުން ނުކުމެ، އެކަން ހުއްޓުވަން ނަޝީދު ގޮވައިލެއްވި މިއީ ފުރަތަމަ ފަހަރެވެ.

ރާއްޖޭގައި އިންޑިއާ ސިފައިން ތިބުމާ ދެކޮޅު ވަރުގަދަ ކުރީ ޔާމީން ޖަލުން މިނިވަންވުމަށް ފަހު އެވެ.

އެ ކެމްޕެއިނަށް ފާޑުވިދާޅުވެ ކުރިން ނަޝީދު ވިދާޅުވީ ޓެރަރިސްޓް ޖަމާއަތްތަކުން ގައުމުތައް ހިފުމުގެ ކުރިން އަބަދުވެސް މަސައްކަތް ކުރާނީ ބައިނަލްއަގްވާމީ ގޮތުން އެ ގައުމެއް އެކަހެރި ކުރަން ކަމަށެވެ. އިންޑިއާ އައުޓް ކެމްޕެއިނަކީ އޭގެ ހަރަކާތެއް ކަމަށާއި އެކަން ކުރަނީ މަދު ބަޔަކު ކަމަށް ނަޝީދު ވިދާޅުވި އެވެ.