ފްލެޓްތަކުގެ މަސައްކަތް ނުނިމޭ ސަބަބު ހޯދަން ސާވޭއެއް ކުރަނީ

ހިޔާ ފްލެޓްތަކުގެ "ފިނިޝިން"ގެ މަސައްކަތް ގޮސްފައިި އޮތް ހިސާބާއި އެ މަސައްކަތް ނުނިމިގެން އުޅޭ ސަބަބު ބެލުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސާވޭއެއް ފަށައިފި އެވެ.

މި މަހުގެ 16 ގައި ފެށި މި ސާވޭގައި ބައިވެރިވުމަށް، ހިޔާ ފްލެޓްތައް ލިބުނު މީހުންނަށް މެސެޖް މެދުވެރިކޮށް ލިންކެއް ފޮނުވަމުން އަންނައިރު މި ސާވޭގެ ބޭނުމަކީ ފްލެޓްތަކުގެ މަސައްކަތް ނުނިމިގެން އުޅޭ ސަބަބު ދެނެގަތުމެވެ.

ގްރޭސް ޕީރިއަޑް އިތުރުކުރުމާ މެދު ގޮތް ނިންމުމުގައި ވެސް މި ސާވޭ އަށް ބަލާނެ ކަމަށް އެޗްޑީސީން ބުންޏެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓުތަކުގެ އެތެރޭގެ މަސައްކަތް އެކީ ނިންމައިގެން ގިނަ ބަޔަކު ދިރިއުޅެން ފަށާފައިވާއިރު އެތަނުގެ ފިނިޝިން މަސައްކަތް އެއްގޮތަކަށް ނުފަށާ އެތައް ބަޔަކު ވެސް އެބަ އުޅެ އެވެ.

ކުލި ނުނަގާ ގޮތަށް ފްލެޓްގެ ފިނިޝިން ނިންމަން ދިން ހަތަރު މަހުގެ މުއްދަތު މި ޑިސެމްބަރުގެ ނިޔަލަށް ހަމަވާއިރު ފިނިޝިން އަށް ބޮޑު ހަރަދެއް ކުރަމުން އެ މަސައްކަތް ނުނިމެނީސް ކުލި ދައްކަން ޖެހުމަކީ ގިނަ ބައެއްގެ ޝަކުވާއެކެވެ. އެހެންވެ، މިހާރު ދީފައިވާ ގްރޭސް ޕީރިއަޑްގެ ތެރޭގައި އެ މަސައްކަތް ނުލެވިއްޖެ ނަމަ މުއްދަތު އިތުރުކުރުމަށް ސަރުކާރާ އެކު އެޗްޑީސީން އަންނަނީ މަޝްވަރާކުރަމުންނެވެ.

މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީގައި މީގެ ކުރިން އެޗްޑީސީގެ ޑެޕިއުޓީ މެނޭޖިން ޑިރެކްޓަރު އަހުމަދު އާތިފް ވިދާޅުވީ، ގްރޭސް ޕީރިއަޑް އިތުރު ކުރުމާމެދު ގޮތެއް ނިންމާނީ މިހާރު ދީފައިވާ މުއްދަތު ހަމަވުމުން ކަމަށެވެ. އެ މަޝްވަރާ ފަށާފައި ވަނީ މުއްދަތު ހަމަވާތީ އެވެ.

ހިޔާ ފްލެޓުތަކުގެ މަހު ކުއްޔަށް 7،500ރ. އަދި މެއިންޓަނަންސް އަށް 1،000ރ. އާ އެކު މަހަކު ޖުމްލަ 8،500ރ ދައްކަން ޖެހެ އެވެ. އެކަމަކު އެ ކުލި 5،600ރ. އަށް ކުޑަކޮށްދީ ގްރޭސް ޕީރިއަޑް އެއް އަހަރަށް އިތުރު ކޮށްދިނުމަށް ފްލެޓުތައް ލިބުނު މީހުން އެދެ އެވެ.

ފްލެޓުތައް ހަވާލުކުރި އިރު އެއްވެސް ވަރަކަށް ފިނިޝިންގެ މަސައްކަތެއްކޮށްފައި ނުވާތީ އެ މަސައްކަތްކުރަން ފްލެޓު ވެރިންގެ އަތުން ހޭދަވާ ހަރަދުން އެއް ލައްކަ ރުފިޔާ ސަރުކާރުން ދިނުމަށެވެ.