ރާއްޖޭގައި އެއާ ޓްރެފިކް ކޮންޓްރޯލަރުން ތަމްރީނު ކުރަން ފަށައިފި

ރާއްޖޭގައި އެއާ ޓްރެފިކް ކޮންޓްރޯލަރުން ތަމްރީނު ކުރާނެ ޒަމާނީ ވަސީލަތްތައް ހިމެނޭ "އޭސީޓީ ޓަވާ ސިމިއުލޭޓާ" މިއަދު ހުޅުވައިފި އެވެ.

ވެލާނާ އިންޓަނޭޝަނަލް އެއާޕޯޓުގައި ބޭއްވި ރަސްމިއްޔާތެއްގައި އެ ތަން ހުޅުއްވައި ދެއްވީ އެމްއޭސީއެލް ހިންގުމާ ހަވާލުވެ ހުންނެވި ޑެޕިއުޓީ ޗީފް އޮފިސަރު އިބްރާހިމް ތޯހާ އެވެ.

އެ ރަސްމިއްޔާތުގައި އޭނާ ވިދާޅުވީ، އެއާ ޓްރެފިކް ކޮންޓްރޯލް ކުރުމަށް ބޭނުންވާ ދުނިޔޭގެ ފެންވަރުގެ ސިމިއުލޭޓަރެއް ގާއިމު ކުރުމުކީ މުޅި އެއާޕޯޓަށް ލިބުނު ވަރަށް ބޮޑު ކުރިއެރުމެއް ކަމަށެވެ. އެއާ ޓްރެފިކް ކޮންޓްރޯލް ކުރަން މީގެ ކުރިން ވަރަށް ބޮޑު ގޮން ޖެހުމަކާ ކުރިމަތިވި ކަމަށާއި އެ ދާއިރާ އިން މީހުން ތަމްރީނު ކުރަން އެތައް މިލިއަން ރުފިޔާއެއް ހޭދަކުރާ ކަމަށް އޭނާ ވިދާޅުވި އެވެ.

"މި އިންވެސްޓްމެންޓާ އެކު ކުރިއަށް އޮތް ތަނުގައި ވަރަށް ކުޑަކުޑަ ފައިސާ ކޮޅަކުން ކޮންޓްރޯލަރުން ތަމްރީނު ކުރެވޭނެ،" އޭނާ ވިދާޅުވި އެވެ.

ރާއްޖޭގައި 17 އެއާޕޯޓެއް އޮތް އިރު އެއާ ޓްރެފިކްގެ ދާއިރާގައި މަސައްކަތް ކުރާ 100 އެއްހާ މުވައްޒަފުން އެބަ ތިއްބެވެ. ކުރިމަގަށް އަމާޒުކޮށް، އާ އެއާޕޯޓުތައް ހުޅުވަމުންދާ ވަރަކަށް އެ ދާއިރާ އިން އިތުރު މީހުން ބޭނުންވާނެ ކަމަށް އެމްއޭސީއެލުން ބުންޏެވެ. މި ވަގުތު ވެސް އެކުންފުންޏަށް އެއާ ޓްރެފިކްގެ ދާއިރާ އިން 22 ވަރަކަށް އިތުރު މުވައްޒަފުން ބޭނުންވެ އެވެ.

"މި ސިމިއުލޭޓަރުން ދެން ރާއްޖޭގައި ކޮންޓްރޯލަރުން ތަމްރީނު ކުރެވޭނެ. ކުރިއަށް އޮތްތަނުގައި ޓްރެއިނަރުން ވެސް މި ދާއިރާ އިން ތަމްރީނު ކުރާނަން،" ތޯހާ ވިދާޅުވި އެވެ.

މި ސިމިއުލޭޓަރު ގާއިމު ކުރަން ފެށީ 2019 ވަނަ އަހަރު ކަމަށް ވާއިރު، އެ ތަނުގެ މުޅި ސެޓަޕަށް ހަތަރު މިލިއަން ރުފިޔާ ހޭދަކުރި އެވެ. މިއީ އިނގިރޭސި ވިލާތުގެ މައިކްރޯނޭވުން އުފައްދާފައިވާ ސިމިއުލޭޓަރެކެވެ. އެއީ މިފަދަ ސިމިއުލޭޓަރު ހެދުމުގައި ދުނިޔޭގައި ވެސް މަޝްހޫރު ކުންފުންޏެކެވެ.