ބުރުގާ މައްސަލައިގައި އޯއައިސީގެ ފާޑުކިޔުމަށް އިންޑިއާގެ ނުރުހުން

އިންޑިއާގެ ކަރްނާޓަކާ ސިޓީގެ ސްކޫލްތަކާއި ކޮލެޖްތަކުގެ މުސްލިމް އަންހެން ދަރިވަރުން ބުރުގާ އަޅައިގެން ކްލާސްތަކަށް ހާޒިރުވުން ކަރްނާޓަކާ ސަރުކާރުން މަނާކުރުމާ ގުޅިގެން އެކަން ކުށްވެރިކޮށް، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ފާޑުކިޔުމުން، އިންޑިޔާ އިން އެ ޖަމިއްޔާ ކުށްވެރިކޮށްފި އެވެ.

މުސްލިމް އަންހެން ކުދިން ބުރުގާ އަޅައިގެން ކްލާހަށް ހާޒިރުވުން މަނާކުރި މައްސަލައިގެ އިތުރުން، އިންޑިއާގައި މުސްލިމުންނާ ދެކޮޅަށް ހިންގާ އެހެން އަމަލުތައް ވެސް، އޯއައިސީން މިދިޔަ ހޯމަ ދުވަހު ނެރުނު ބަޔާނުގައި ކުށްވެރިކޮށްފައިވެ އެވެ. ހަރުކަށި ހިންދީ ހިޔާލާތުގެ ހިންދުތުވާ ހަރަކާތުގެ ބައިވެރިން، އިންޑިއާގެ މުސްލިމުންނާ ދެކޮޅަށް ގަތުލުއާންމު ހިންގުމަށް ގޮވުމާއި ސޯޝަލް މީޑިއާގައި މުސްލިމް އަންހެން ކުދިންނަށް ފުރައްސާރަ ކުރުމަށް ފާޅުގައި ހިންގާ އަމަލުތައް ވެސް އޯއައިސީގެ ބަޔާނުގައި ކުށްވެރިކޮށްފައިވެ އެވެ.

މީގެ އިތުރުން މިސްކިތްތަކަށް ހަރުކަށި ހިންދީން ހަމަލާދީ ދީނީ މިނިވަންކަމަށް ހުރަސް އަޅާތީ އެކަން ވެސް ކުށްވެރިކޮށް، އދ.ގެ ކަމާ ގުޅުން ހުރި އިދާރާތަކުން އެފަދަ މައްސަލަތައް ތަހުގީގުކުރުމަށް ވެސް އޯއައިސީން ގޮވާލާފައިވެ އެވެ. އަދި އިންޑިއާގައި ދިރިއުޅޭ މުސްލިމުންގެ އެންމެހައި އިންސާނީ ހައްގުތަކާއި ދީނީ މިނިވަންކަން ރައްކާތެރިކޮށްދިނުމަށް އިންޑިއާ ސަރުކާރަށް ވެސް ގޮވާލާފައިވެ އެވެ.

އޯއައިސީގެ މި ބަޔާނަށް ރައްދު ދެމުން، އިންޑިއާގެ މައި ސަރުކާރުގެ ހާރިޖިއްޔާގެ ތަރުޖަމާނު އަރިންޑަމް ބަގްޗީ ވިދާޅުވީ އިންޑިއާއާ ދެކޮޅަށް ޕްރޮޕަގެންޑާ ފެތުރުމަށް އުޅޭ ބައެއްގެ މަސްލަހަތުން އޯއައިސީ އޮތީ ކިޑްނެޕްކޮށްފައި ކަމަށެވެ.

"އިންޑިއާގައި އުފެދޭ މައްސަލަތައް ހުށަހަޅާނީ ވެސް އަދި ހައްލުކުރާނީ ވެސް އަހަރެމެންގެ ދުސްތޫރީ އޮނިގަނޑުގެ ތެރެއިން އަދި ޑިމޮކްރެސީގެ ރޫހާއި އަހަރެމެންގެ ތެރޭގައި ހަމަޖެހިފައި ހުރި ވެރިކަމުގެ ނިޒާމުގެ ތެރެއިން،" އަރިންޑަމް ބަގްޗީ ނެރުއްވި ބަޔާނުގައި ވިދާޅުވި އެވެ.