ލަންކާގެ އެކި ހިސާބުތަކުން ކަރަންޓު ކަނޑަން ފަށައިފި

ސްރީ ލަންކާ އަށް ކުރިމަތިވެފައިވާ އިގްތިސާދީ ދަތިކަމުގެ ސަބަބުން ބޭރު ފައިސާ ލިބުން ދަތިވެ، ސަރުކާރުގެ އިންޖީނުގެތައް ހިންގަން ބޭނުންވާ ތެޔޮ އިމްޕޯޓްކުރުން މެދުކެނޑުމާ ގުޅިގެން، އެ ގައުމުގެ އެކި ހިސާބުތަކުން ބައެއް ވަގުތުތަކުގައި ކަރަންޓު ކަނޑަން ފަށައިފި އެވެ.

އެ ގައުމުގެ ޕަބްލިކް ޔުޓިލިޓީސް ކޮމިޝަނަރު އިއްޔެ ވިދާޅުވި ގޮތުގައި މިއަދު ލަންކާގެ އެކި ހިސާބުތަކުން 4.5 ގަޑިއިރަށް ކަރަންޓު ކަނޑައިލާނެ އެވެ. މިދިޔަ ހޯމަ ދުވަހާއި އަންގާރަ ދުވަހު ކަރަންޓުގެ ހިދުމަތް ކަނޑައިލީ ދެ ގަޑިއިރަށެވެ.

އޭނާ ވިދާޅުވި ގޮތުގައި، އިންޖީނުގެތައް ހިންގަން ބޭނުންވާ އިތުރު ތެޔޮ ލިބެންދެން، މިހާރު ހުރި ތެލުން ފަރުޖެއްސުމަށްޓަކައި ހެނދުނު 8:30 އިން ފެށިގެން ރޭގަނޑުގެ 10:30 އަށް ވަންދެން، އެ ގައުމުގެ އެކި ސަރަހައްދުތަކުން ތަފާތު ވަގުތުތަކުގައި ކަރަންޓު ކަނޑަމުންދާނެ އެވެ. އެ ގޮތުން މިއަދު ކަރަންޓު ކަނޑައިލާ ކޮންމެ ސަރަހައްދަކުން ވެސް 4.5 ގަޑިއިރަށް ކަރަންޓު ކެނޑޭނެ އެވެ.

ކަރަންޓު ކަނޑާނެކަން ރަސްމީކޮށް މި ހަފުތާގައި އަންގަން ފެށުމުގެ ކުރިން، މިދިޔަ މަހެއްހާ ދުވަހުގެ ތެރޭގައި ވެސް، ބައެއް ސަރަހައްދުތަކަށް ކަރަންޓުގެ ހިދުމަތް ލިބެމުން ދިޔައީ މެދުކެނޑެމުންނެވެ. ލަންކާ ސަރުކާރުން ބުނާ ގޮތުގައި ކަރަންޓުގެ ހިދުމަތް މެދުކަނޑާލަން ޖެހެނީ އިންޖީނުތަކަށް މައްސަލަ ޖެހިގެންނެއް ނޫނެވެ. ނަމަވެސް ކަރަންޓުގެ ހިދުމަތް މެދުކަނޑާލަން މަޖުބޫރުވަނީ، މެދުނުކެނޑި އިންޖީނުތައް ހިންގާފައި ބަހައްޓަން ބޭނުންވާ ވަރަށް ތެޔޮ ލިބެން ނެތުމުންނެވެ.

އިގްތިސާދު ދަށްވެ ބޭރު ފައިސާ ލިބުމަށް ހުރަސް އެޅިފައިވާތީ، އެ ގައުމުގެ އިމްޕޯޓް ވަނީ މުޅިންހެން ހުއްޓިފަ އެވެ. އާންމު ރައްޔިތުންނަށް އެންމެ ބޭނުންވާ ޒަރޫރީ މުދާ ވެސް އިމްޕޯޓްކުރެވޭނެ ގޮތެއް ނެތި، ތަކެއްޗާއި ހިދުމަތުގެ އަގުތައް ދަނީ އިންތިހާ އަށް އުފުލެމުންނެވެ. ކައްކާ ގޭހާއި ހިކި ކިރުގެ ބާވަތްތަކާއި ޑީސަލާއި ޕެޓްރޯލާއި އެނޫނަސް ޒަރޫރީ އެތައް ސާމާނެއް އިމްޕޯޓް ކުރުން ހުއްޓި އެ ތަކެތީގެ އަގު ވަނީ ވަރަށް ބޮޑަށް އުފުލިފަ އެވެ.

ޓޫރިޒަމާއި ވިޔަފާރީގެ މައްޗަށް އިގްތިސާދު ބިނާވެފައިވާ ސްރީ ލަންކާގެ އިގްތިސާދު އަޑި އަޅައިލީ، ކޮވިޑް-19ގެ ވަބާ އިން ރައްކާތެރިވުމުގެ ގޮތުން އެޅި ފިޔަވަޅުތަކާ ގުޅިގެންނެވެ. ޓޫރިޒަމް މެދުކަނޑާލައި އިމްޕޯޓް ހުއްޓައިލުމާ ގުޅިގެން، މިދިޔަ ދެ އަހަރުގެ ތެރޭގައި 14 ބިލިއަން ޑޮލަރުގެ ގެއްލުން ވެފައިވާ ކަމަށް ލަންކާ ސަރުކާރުން އަންދާޒާ ކުރެ އެވެ.