އަމީމަތު: ދެ ދަރިންނާ އެކު އާއިލާގެ މުހިއްމު ތަނބު!

ސްކޫލް ނިންމުމަށް ފަހު އަމީމަތު ހަލީލް ދިރިއުޅުމުގެ ހުރިހާ ކަމެއް ހަމަޖެއްސީ އަމިއްލަ އަށް މަސައްކަތްކޮށް، އާމްދަނީ ހޯދައިގެންނެވެ. ނަމަވެސް އުމުރުން 21 އަހަރުގައި އަލަތު ދަރިފުޅު ލިބި، ހަ މަސް ދުވަސް ވަންދެން ވަޒީފާ އަށް ދިއުމަށް ފަހު ކުރެވުނު ތަޖުރިބާއިން އޭނާ ނިންމީ، ސްކައި ޓުއާސްގެ ފްލައިޓް އޮޕަރޭޝަންސް މެނޭޖަރުގެ މަގާމުން ވަކިވެ، ހުރިހާ ވަގުތެއް ދަރިފުޅަށް ހުސްކުރާށެވެ.

އެއަށްފަހު ދިރިއުޅުމުގެ އެތައް ކަމެއް ބަދަލުވެގެން ހިނގައްޖެ އެވެ. ނަމަވެސް ވަޒީފާއިން ވަކިވެ، ގޭގައި ދަރިން ބަލަން ހުންނަން ނިންނި ނިންމުމާ މެދު އަމީމަތު، 30، އެއްގޮތަކަށް ވެސް ހިތާމައެއް ނުކުރެ އެވެ. އެއަށްވުރެ އޭނާ އަށް ލިބޭ އުފާ މާ ބޮޑެވެ.

އަމީމަތު މިހާރު އަންނަނީ ނުވަ އަހަރުގެ އައިރާ އަދި ހަގަށް ހުރި ހަތް މަހުގެ އެމްރާ ބަލަމުން ގޭގައި ކޭކު އަޅަމުންނެވެ.

"އެންމެ ފުރަތަމަ ކޭކު އަޅަން ފެށީ އައިރާ އަށް ދެ އަހަރުގައި. ހިތަށް އެރީ ގޭގައި އެހެން ހުންނައިރު ކޮންމެ ވެސް މަސައްކަތެއް ކުރާނަމޭ. އެންމެ ފުރަތަމަ ޔޫޓިއުބުން ބަލައިގެން، އެ ދަސްކޮށްގެން ކޭކު އަޅަން ފެށީ ވެސް،" އަމީމަތު ބުންޏެވެ.

ދަރިފުޅާއި ގޭތެރޭގެ ހުރިހާ ކަމެއް ކުރުމަށްފަހު ކޭކު އެޅުން ވީ ފުރަތަމަ ދުވަސްކޮޅު އަމީމަތަށް ވަރަށް އުނދަގޫ ކަމަކަށެވެ. އެ މަސައްކަތް ކުރާނެ ވަގުތު ހޯދަނީ ވެސް އައިރާ ސްކޫލަށް ގެންދިއުމަށް ފަހުގަ އެވެ. އެ ބުރަކަމާ ހެދި ކޭކު އެޅުން ހުއްޓާލަން ވެސް ކިތައްމެ ފަހަރަކު ހިތަށް އެރި އެވެ.

"ކޮންމެ ފަހަރަކު ވެސް ހިތަށް އަރާ ދެން އޯޑަރެއް ނުނަގާނަމޭ. އެކަމަކު ޖެހިގެން އަންނަ ދުވަހު ހަމަ އިންނާނީ އޯޑަރުތައް ބަލަން. ވަރަށް ވަރަށް އުނދަގޫ ކަމެއް މިއީ. އޮފީހަށް ގޮސްގެން މަސައްކަތް ކުރަންޏާ، އެ ވަގުތު އެބަ ލިބޭތާ ކުދިންގެ ކަންކަމާ ދުރުވެ، އަމިއްލަ ނަފްސަށް. އެކަމަކު ގޭގައި ހުރެގެން މަސައްކަތް ކުރާތީ ހުރިހާ ކަމަކަށް ވަގުތު ހުސްކުރަން އެބަޖެހޭ،" އައިލެންޑު އޭވިއޭޝަންގައި ވެސް މަސައްކަތްކުރި އަމީމަތު ބުންޏެވެ.

"ދެ ވަނަ ދަރިފުޅަށް ބަނޑުބޮޑުވިއިރު ވެސް ކޭކު އެޅުން ހުއްޓައެއް ނުލަން. ވިހަން ވަންދެން ކޭކު އެޅީ. މިސާލަކަށް، މިއަދު ހެނދުނު ވިހައިފިއްޔާ އިއްޔެ ވެސް އިންނާނީ ކޭކެއް އަޅާފައި."

ވަޒީފާއަކަށް ދާން ފުރުސަތު ލިބުނަސް އަމީމަތު ބުނީ އޭނާ އިހުތިޔާރުކުރާނީ ގޭގައި ކުދިން ތަރުބިއްޔަތު ކުރާށެވެ.

"ކުދިން އެހެން މީހަކާ ހަވާލުކޮށްފައި ނޫނިއްޔާ، އޭރު ކެނޑެން އުޅުނުއިރު ވަރަށް ބައިވަރު ކަންކަން ބެލިން. ޑޭކެއާ ސެންޓަރުތައް ވެސް. އެކަމަކު ވެސް ނިންމީ ގޭގައި މަޑުކުރަން. އެ އެޓެންޝަނާ، އެކަހަލަ ކަންތައްތަކަށް ވިސްނާފައި. ޑޭކެއާއަކަށް ލީމަ އެ ކަންބޮޑުވުން އޮންނާނެ،" ކޭކު އަޅައިގެން ލިބުނު އާމްދަނީން ސިންގަޕޫރާއި ބެންކޮކުން ކޭކުގެ އެކި ޓްރެއިނިންތައް ހެދި އަމީމަތު ބުންޏެވެ.

ގޭގައި މަސައްކަތްކުރިއަސް ޒިންމާ ބޮޑު

އޭނާގެ ފިރިމީހާ މުހައްމަދު އަރުޝަދު ގަބޫލުކުރާ ގޮތުގައި އެ ކުޑަކުޑަ އާއިލާގެ ހުރިހާ ކަމެއް ބަލަހައްޓަނީ ދެ މީހުން އެއްކޮށް ބައިވެރިވެ، ހަމަހަމަވެގެންނެވެ. ގޭގައި ހުރެގެން މަސައްކަތްކުރި ނަމަވެސް އަމީމަތު ކުރަނީ ބުރަ މަސައްކަތެއް ކަމަށް އަރުޝަދު ގަބޫލުކުރެ އެވެ.

"އޮފީހުގައި ނޫޅޭ ވަގުތު ދެ މީހުން އެއްކޮށް ގޭތެރޭގެ މަސައްކަތްކޮށް ކުދިންގެ ކަންތައްތައް ކުރަނީ. އޭނާއަށް އެހީތެރިކަން ދިނުމުގައި ދެމިހުންނާނަން،" އޭނާ ބުންޏެވެ.