ސައޫދީން ތެލުގެ އިންވެސްޓްމެންޓް އިތުރުކުރަނީ

ސައޫދީ އަރަބިއްޔާ ސަރުކާރުގެ ރަސްމީ ތެޔޮ ކުންފުނި، އަރާމްކޯ އިން ތެލުގެ ވިޔަފާރީގައި އިތުރަށް އިންވެސްޓްކުރުމަށް ނިންމައިފި އެވެ.

އަރާމްކޯ އަށް މިދިޔަ އަހަރު ލިބުނު އާމްދަނީގެ ފައިދާ ވަނީ، އޭގެ ކުރީ އަހަރާ އަޅައި ބަލާއިރު ދެ ގުނަ އިތުރުވެފަ އެވެ. އެހެންކަމުން ތެލުގެ ބާވަތްތައް އުފެއްދުން އިތުރު ކުރުމަށް، ތެލުގެ ވިޔަފާރީގައި އެކުންފުނީގެ އިންވެސްޓްމެންޓް ފުޅާކުރަން ނިންމީ ކަމަށް، ސައޫދީ ސަރުކާރުން ބުނެ އެވެ.

ދުނިޔޭގެ އެކި ގައުމުތަކުން ތެލާއި ގޭސް ބޭނުންވާ މިންވަރު އިތުރުވަމުން އައުމާ ގުޅިގެން، ދުނިޔޭގެ ބާޒާރުގައި ތެލުގެ އަގުތައް އުފުލެން ފަށާފައިވާތާ ހަތަރު މަސް ވެއްޖެ އެވެ. އޭގެ އިތުރުން، މިދިޔަ ފެބްރުއަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރޭނާ ދެކޮޅަށް ހަނގުރާމަ ފެށުމާ ގުޅިގެންވެސް ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް އުފުލިފަ އެވެ.

ޔޫކްރޭން ހަނގުރާމައާ ގުޅިގެން، ރަޝިޔާ އަށް ދަތިކުރުމުގެ ގޮތުން، ރަޝިޔާގެ ތެލުގެ ބާވަތްތަކާއި ގޭހުގެ ބާވަތްތައް ނުގަތުމަށް އެމެރިކާ އާއި ވިލާތުގެ ގައުމުތަކުން ނިންމުމުން ވެސް، ވިލާތުގެ ގައުމުތަކުގައި ވަނީ ތެލުގެ އަގުތައް އުފުލިފަ އެވެ. އެހެންކަމުން، ސައޫދީގެ މި ނިންމުމާ ގުޅިގެން ވިލާތުގެ ގައުމުތަކަށް ކޮންމެވެސް ވަރެއްގެ ހިތްހަމަޖެހުމެއް ލިބޭނެ ކަމަށް އިގްތިސާދީ ތަޖުރިބާކާރުން ވިދާޅުވެ އެވެ.

ރަޝިޔާގެ ތެލުގެ ބަދަލުގައި ދުނިޔޭގެ ބާޒާރަށް އިތުރު ތެޔޮ ނެރުމާ ގުޅޭ ގޮތުން މަޝްވަރާ ކުރެއްވުމަށް، އިނގިރޭސި ވިލާތުގެ ބޮޑުވަޒީރު ބޮރިސް ޖޯންސަން ވެސް ވަނީ މިދިޔަ ހަފުތާގައި ސައޫދީ އަރަބިއްޔާ އަށް ވަޑައިގެންފަ އެވެ. ސައޫދީ އަރަބިއްޔާ އަކީ ތެޔޮ އެކްސްޕޯޓްކުރާ ގައުމުތަކުގެ ޖަމިއްޔާ، އޯޕެކްގެ މެންބަރު ގައުމުތަކުގެ ތެރެއިން އެންމެ ގިނައިން ތެޔޮ އުފައްދައި ދުނިޔޭގެ ބާޒާރަށް ނެރޭ ގައުމެވެ.

ކޮވިޑް-19އިގެ ސަބަބުން ދުނިޔޭގެ އިގްތިސާދަށް އެރި ލޮޅުންތަކާ ގުޅިގެން، ތެލުގެ އަގު އުފުލިފައި ވަނިކޮށް، މިހާރު ކުރަމުންދާ ޔޫކްރޭން ހަނގުރާމައިގެ ސަބަބުން، ތެލުގެ އަގުތައް ވަނީ، މިދިޔަ 14 އަހަރުގެ ތެރޭގައި ނުދާހާ މައްޗަށް ގޮސްފަ އެވެ.