"ނޫ ރާއްޖެ" ޕްރޮގްރާމަށް އެމެރިކާގެ ބިލިއަނަރު ޓެޑް ވެއިޓްގެ އެހީ

ސަރުކާރުން ހިންގާ "ނޫ ރާއްޖެ" ޕްރޮގްރާމަށް، އެމެރިކާގެ މަޝްހޫރު ގޭޓްވޭ ކުންފުނީގެ ފައުންޑާ ޓެޑް ވެއިޓްގެ އިންސްޓިޓިއުޓަކުން އެހީތެރިވާން ފަށައިފި އެވެ.

ރައީސް އޮފީހުން ބުނީ ވެއިޓް ފައުންޑޭޝަނުން "ނޫ ރާއްޖެ" އަށް އެހީވުމުގެ މަސައްކަތް އެ ފައުންޑޭޝަންގެ ބޭފުޅުން ވަޑައިގެން މިހާރު ވެސް ކުރަމުން އަންނަ ކަމަށެވެ.

ނޫ ރާއްޖެއަކީ ކަނޑުތަކުގެ ވަސީލަތްތައް ވަޒަންކޮށް ހިމާޔަތްކޮށްގެން ދިވެހި މުޖުތަމައަށާއި އިގްތިސާދަށާއި ތިމާވެއްޓާ ގުޅުން ހުރި މަސައްކަތްތައް ހިންގުމަށް ސަރުކާރުން އެކުލަވާލި ޕްރޮގްރާމެކެވެ. މި ޕްރޮގްރާމުގެ ދަށުން ކަނޑުތަކުގެ ވަސީލަތްތަކައި ގުޅޭ ގިނަ ޕްރޮޖްކެޓްތަކެއް ހިންގާނެ އެވެ.

ވެއިޓް މިއަދު ރައްޔިތުންގެ މަޖިލީހަށް ވަޑައިގެން މިކަމުގެ މައުލޫމާތު މަޖިލިސް މެންބަރުންނާ ހިއްސާކުރައްވާ ގޮތަށް ވެސް ވަނީ ހަމަޖެހިފަ އެވެ. މީގެ ކުރިން 2019 ވަނަ އަހަރު ވެސް ޓެޑް ވެއިޓް ވަނީ ރާއްޖެ ވަޑައިގެން ސަރުކާރުގެ އިސްވެރިންނާ ބައްދަލުކުރައްވައިފަ އެވެ.

ބްލޫ ޕްރޮސްޕެރިޓީ ކޯލިޝަންއާ ގުޅިގެން "ނޫ ރާއްޖެ"ގެ ނަމުގައި ހާއްސަ ޕްރޮޖެކްޓެއް ފެށީ ޑިސެމްބަރު 2020 ގަ އެވެ. މި ޕްރޮގްރާމު ކުރިއަށްގެންދަނީ ފަސް އަހަރުގެ މުއްދަތަށެވެ.

ދިވެހި ކަނޑުތަކާ ގުޅޭ ސައިންސް ކުރިއެރުވުމަށްޓަކައި ދިރާސާކޮށް، ދާއިރާ އަށް ބޭނުންވާ މީހުން ބިނާކުރުމާއި އެހީވެވޭނެ އެވެ. ދިވެހި ސައިންސްވެރިންނާއި މަދަނީ ޖަމިއްޔާތަކާ އެކު ވެސް މަސައްކަތް ކުރަން ވަނީ ނިންމައިފަ އެވެ.