ރާއްޖޭގެ ކަނޑުތަކުގެ ބޮޑު ދިރާސާއެއް ކުރަން ފަށަނީ

މޫސުމީ ބަދަލުތަކުގެ ސަބަބުން ރާއްޖެ އަށް ލިބޭ ގެއްލުންތައް ކުޑަކުރާނެ ގޮތްތައް ދެނެގަތުމަށް، އިނގިރޭސި ވިލާތުގެ މެރިން ރިސާޗު ފަޑުންޑޭޝަނަކާ ގުޅިގެން ކަނޑުތަކުގެ ބޮޑު ދިރާސާއެއް ކުރުމަށް ދިވެހި ސަރުކާރުން ތައްޔާރުވާން ފަށައިފި އެވެ.

ރައީސް އޮފީހާއި އިނގިރޭސި ވިލާތުގެ މެރިން ރިސާޗު ފަޑުންޑޭޝަން "ނެކްޓަން" ގުޅިގެން މިއަދު ނެރުނު ނޫސްބަޔާނެއްގައި ބުނީ މޫސުމަށް އަންނަ ބަދަލުތަކުގެ ސަބަބުން ރާއްޖެ އަށް ލިބޭ ގެއްލުން ކުޑަކުރާނެ ގޮތްތައް ދެނެގަންނަން އެ ދިރާސާއިން ލިބޭ މައުލޫމާތު ސައިންސްވެރިންނާއި އަދި ޕޮލިސީ މޭކަރުންނާ ހިއްސާ ކުރާނެ ކަމަށެވެ.

އަންނަ މަހުގެ ހަތަރެއްގައި ފަށާ އެ ދިރާސާގެ މިޝަން 35 ދުވަހަށް ދެމިގެންދާނެ ކަމަށް ބުންޏެވެ. ދިރާސާގެ މިޝަންގައި ރާއްޖެ ހިމެނޭ ގޮތަށް އެކި ގައުމުތަކުގެ ސައިންސްވެރިންނާއި ތަޖުރިބާކާރުންގެ ޓީމެއް، ކަނޑުތަކުގެ އެންމެ މަތީ ފަށަލައިގެން ފެށިގެން 1،000 މީޓަރު އަޑި އަށް ސާވޭ ކުރާނެ އެވެ.

"މިއީ މިހާ ފުނަށް ރާއްޖޭގައި ހިންގޭ ފުރަތަމަ ސާވޭ އެވެ،" ބަޔާނުގައިވެ އެވެ.

އެ ދިރާސާކުރުމަށް ކަނޑުއަޑި އަށް ފީނާ ޓީމުގައި ރާއްޖޭގެ 10 މެރިން ސައިންޓިސްޓުން އިސްކޮށް އުޅުއްވާނެ ކަމަށާއި ފީނުމަށް ބޭނުންކުރާނީ ކަނޑުގެ އެންމެ ފުނަށް ދެވޭ ޒާތުގެ "ސަބްމާސިބަލްތަކެއް" ކަމަށް ބުންޏެވެ. އެ ދިރާސާ މިޝަންގައި ޖުމްލަ 40 ބައިވެރިން ހިމެނޭއިރު އެއީ 16 ދިވެހިންނާއި ރާއްޖެއިން ބޭރުން އަންނަ 24 މީހެކެވެ.

"މި މިޝަންއާ އެކު ރާއްޖޭގައި އިންސާނުން ގޮވައިގެން ފުންކަނޑަށް ދާ އެންމެ ފަހުގެ ސަބްމާސިބަލް އަދި ރޮބޮޓިކް ސިސްޓަމްތައް ބޭނުންކުރެވިގެންދާނެ އެވެ،" ބަޔާނުގައި ބުންޏެވެ.

ދިރާސާގައި އެއްކުރާނެ މައުލޫމާތު

- ކަނޑުތަކުގެ ބޭސްލައިން ހެލްތު ޗެކެއް ކުރިއަށް ގެންދިއުން.

- ފަރުތަކުގެ ހާލަތު ދެނެގަނެ އަދި ކުރިން މައުލޫމާތު އެއްކޮށްފައި ނުވާ ފުނުގައިވާ އެކިއެކި އިކޯސިސްޓަމްސްގެ މައުލޫމާތު އެއްކުރެވޭނެ.

- ހިމާޔަތްކުރަން ޖެހޭ ތަންތަން ދެނެގަނެވޭނެ.

- ފަރުތަކާއި މަސް އަލާވާ މުހިންމު ތަންތަން ފާހަގަކުރުން.

- ރާއްޖޭގެ ކަނޑުގެ 20 ޕަސެންޓް ހިމާޔަތްކުރުމަށް ސަރުކާރުން ކަނޑައަޅާފައިވާ ލަނޑުދަނޑި ހާސިލުކުރުމަށް ބޭނުންވާ މުހިންމު މައުލޫމާތު ލިބޭނެ.

ނޫސްބަޔާނުގައި ރައީސް އިބްރާހިމް މުހައްމަދު ސޯލިހު ވިދާޅުވީ އެ ދިރާސާ މިޝަންގެ ސަބަބުން ދެމެހެއްޓެނިވި ގޮތަކަށް ރާއްޖޭގެ އިގުތިސާދާއި އާމްދަނީ ލިބޭނެ ގޮތްތައް ފުޅާކުރުމާ އެކު، ކަނޑުތަކުގެ ވިލުންތެރިކަން އިތުރުކުމަށް ބޭނުންވާ ހިމާޔަތްކޮށްފައިވާ ކަނޑުގެ ސަރަހައްދުތައް ގާއިމްކުރުމަށް ބޭނުންވާ މައުލޫމާތު ވެސް ލިބޭނެ ކަމަށެވެ.

"އަޅުގަނޑުމެންގެ ވަށައިގެންވާ ކަނޑުތަކާ ކޮންމެ ދިވެއްސަކާ ވަނީ ގުޅިލާމެހިފައި. މި ގައުމުގެ 71 ޕަސެންޓް އާމްދަނީ ފެށިގެން އަންނަނީ މި ކަނޑުތަކުން. އަޅުގަނޑުމެންގެ ސަރުކާރުން މި އަންނަނީ ކަނޑުފަޅުތައް ހިމާޔަތްކޮށް، ދެމެހެއްޓެނިވި ނޫ އިގުތިސާދެއް ބިނާކުރުމަށް ފަސް އަހަރުގެ ޕްލޭނެއްގެ ދަށުން މަަސައްކަތްކުރަމުން،" ރައީސް ވިދާޅުވި އެވެ.