"އިދިކޮޅު އެއްވުމުގައި ގޭންގުތައް ބައިވެރި ކުރޭ، އާންމުންނަށް ނުރައްކާ ވެދާނެ"

ޕީޕީއެމް އާއި ޕީއެންސީން މާލޭގައި ބާއްވާ މުޒާހަރާގައި ކުށް ކުރާ ގްރޫޕުތަކުން ބައިވެރިކޮށް އާންމުންގެ ސަލާމަތަށް ނުރައްކާ ވެދާނެ ކަމަށް ފުލުހުން ބުނެފި އެވެ.

"ނޭވާ ހޮޅިއަށް" ގެ ނަމުގައި އިދިކޮޅު ފަރާތްތަކުން ބޮޑު އެއްވުމެއް ބާއްވަން ނިންމާފައި ވަނީ އަންނަ ހުކުރު ދުވަހު ހަވީރު 4:00 އިން 6:00 އަކަށެވެ. މިއީ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން މިނިވަންވެވަޑައިގަތް ފަހުން މާލޭގައި ބޮޑު އެއްވުމެއް ބާއްވާ ފުރަތަމަ ފަހަރެވެ.

އެ ހަރަކާތާ ގުޅިގެން ފުލުހުން މިއަދު ނެރުނު ބަޔާނެއްގައި ބުނީ ޕީޕީއެމް އޮފީސް ސަރަހައްދާއި، ރަސްފަންނު ސަރަހައްދާއި، ބޮޑުތަކުރުފާނު މަގާއި އުސްފަސްގަނޑު ސަރަހައްދުގައި ޕީޕީއެމް އިން ބޭއްވުމަށް ރާވާފައިވާ އެއްވުމަކީ ސުލްހަވެރިކަމާއެކު އެއްވެ އުޅުމުގެ ގާނޫނާ އެއްގޮތަށް ބާއްވާ އެއްވުމެއް ނޫން ކަމަށް ބެލެވޭ ތަފާތު ސަބަބުތައް ފެންނަން ހުރި ކަމަށެވެ.

އެ ހަރަކާތައް ރަށްރަށުން ގިނަ އަދަދެއްގެ މީހުން ގެންނަ ކަމަށާއި ގިނަ އަދަދެއްގެ ދުއްވާތަކެތި ބޭނުންކޮށްގެން މާލޭގެ ބޮޑެތި މަގުތައް ބްލޮކުކޮށް، ރައްޔިތުންނާއި އާންމުންގެ ދަތުރުފަތުރުގެ ހިދުމަތައް ހުރަސް އަޅަން ރާވާފައިވާ ކަމަށް ފުލުހުން ބުުންޏެވެ. އަދި މާލޭގައި އުޅޭ ކުށް ކުރާ ގްރޫޕުތައް ހޯދައި އެއްވުމުގައި ބައިވެރި ކުރުމަށް ޕީޕީއެމް/ޕީއެންސީން ރާވާފައިވާ ކަމަށް ފުލުހުން ބުންޏެވެ.

"...މިފަދަ އެއްވުމުގެ ސަބަބުން އާންމުންގެ ސަލާމަތާއި ރައްކާތެރިކަމަށް ބުރޫ އެރުމުގެ ފުރުސަތު ބޮޑުވުމުގެ ސަބަބުން މި އެއްވުން ނުބޭއްވުމަށް މި ހިދުމަތުން އެ ޕާޓީ އަށް [ޕީޕީއެމް/ޕީއެންސީ އަށް] ވަނީ އަންގާފައި،" ފުލުހުން ބުންޏެވެ.

ފުލުހުން ބުނީ އެ އެއްވުމުގައި އެއްވެސް ފަރާތަކުން ބައިވެރި ނުވުމަށް އިލްތިމާސް ކުރާ ކަމަށެވެ. އަދި އެ އެއްވުމުގައި ބައިވެރިވެ ގާނޫނާ ހިލާފު އަމަލުތަކަށް މަގުފަހި ކުރުވާ ކަމަށް ތުހުމަތު ކުރެވޭ އެއްގަމު އުޅަނދުފަހަރުތަކާއި ކަނޑު އުޅަނދުތައް ބަލައި ފާސް ކުރާނެ ކަމަށް ވެސް ފުލުހުން ބުންޏެވެ.

އެ އެއްވުން ރޫޅާލައި ގާނޫނާ ހިލާފުވާ ފަރާތްތަކާ މެދު ފިޔަވާޅު އަޅާނެ ކަމަށް ވެސް ފުލުހުން ބުންޏެވެ.