އެއްވެ އުޅުމުގެ ހައްގު ހަނި ނުކުރަން އެމްއާރުއެމްއިން ގޮވާލައިފި

އެއްވެ އުޅުމުގެ ގާނޫނުން ލިބޭ ހައްގުތައް ހަނި ނުކުރަން މޯލްޑިވްސް ރިފޯމް މޫވްމަންޓް (އެމްއާރުއެމް) އިން ރޭ ގޮވާލައިފި އެވެ.

އިދިކޮޅު ކޯލިޝަން ޕީޕީއެމް/ޕީއެންސީން މާދަމާ ބާއްވާ ބޮޑު އެއްވުމާ ގުޅިގެން ފުލުހުން ނެރުނު ބަޔާނަށް ރައްދުދީ، މި ސަރުކާރުގެ އެއް ޕާޓްނަރު، އެމްއާރުއެމްއިން ކުރި ޓްވީޓްގައި ބުނީ މުޖުތަމައުގެ އަމާންކަމާއި ރައްޔިތުންގެ ރައްކާތެރިކަމަށް ނުރައްކާވެ، އާއްމު މަސްލަހަތު ގެއްލޭ ގޮތަށް ސިޔާސީ އެއްވެސް ހަރަކާތެއް ހިންގުމަކީ ބަލައިގަންނާނެ ކަމެއް ނޫން ކަމަށެވެ.

އެކަން ހަރުކަށި އިބާރާތުން ކުށްވެރިކޮށްފައި ވެސް އެވެ.

ނަމަވެސް އެއްވެ އުޅުމުގެ ގާނޫނުން ލިބިދޭ ހައްގުތައް ހަނިކޮށް، ކުރީގެ ސަރުކާރުން 2016 ވަނަ އަހަރު ގާނޫނަށް ގެނައި ބަދަލު އުވާލުމަކީ މި ކޯލިޝަން ސަރުކާރު އެއްބަސްވެ، ރައްޔިތުންނަށް ވެފައިވާ ވައުދަކަށްވާތީ އެކަން އަވަސްކުރުމަށް މަޖިލީހަށް ގޮވާލާފައިވެ އެވެ.

ފުލުހުން ނެރުނު ބަޔާނުގައި ބުނީ "ނޭވާ ހޮޅިއަށް" ގެ ނަމުގައި އިދިކޮޅު ފަރާތްތަކުން ބާއްވާ އެއްވުމަށް ރަށްރަށުން ގިނަ ބަޔަކު ގެންނަ ކަމަށާއި އަދި ދުއްވާތަކެތި ބޭނުންކޮށްގެން މާލޭގެ ބޮޑެތި މަގުތައް ބްލޮކުކޮށް، ރައްޔިތުންނާއި އާންމުންގެ ދަތުރުފަތުރުގެ ހިދުމަތައް ހުރަސް އަޅަން ވެސް ރާވާފައިވާ ކަމަށެވެ.

"...މިފަދަ އެއްވުމުގެ ސަބަބުން އާންމުންގެ ސަލާމަތާއި ރައްކާތެރިކަމަށް ބުރޫ އެރުމުގެ ފުރުސަތު ބޮޑުވުމުގެ ސަބަބުން މި އެއްވުން ނުބޭއްވުމަށް މި ހިދުމަތުން އެ ޕާޓީ އަށް [ޕީޕީއެމް/ޕީއެންސީ އަށް] ވަނީ އަންގާފައި،" ފުލުހުން ބުންޏެވެ.

ފުލުހުން ވަނީ އެއްވުމުގައި އެއްވެސް މީހަކު ބައިވެރިނުވުމަށް އިލްތިމާސްކޮށްފަ އެވެ. އަދި އެ އެއްވުމުގައި ބައިވެރިވެ ގާނޫނާ ހިލާފު އަމަލުތަކަށް މަގުފަހި ކުރުވާ ކަމަށް ތުހުމަތު ކުރެވޭ އެއްގަމު އުޅަނދުފަހަރުތަކާއި ކަނޑު އުޅަނދުތައް ބަލައި ފާސް ކުރާނެ ކަމަށް ފުލުހުންގެ ބަޔާނުގައި ބުނެފައިވެ އެވެ.