ޔޫކްރޭނަށް އެރި ރަޝިޔާ ސިފައިންގެ ބޮޑުބައެއް ފަނާވެއްޖެ

މިދިޔަ ފެބްރުއަރީ މަހުގެ 24 ވަނަ ދުވަހު ޔޫކްރޭނަށް އަރައިގަތް ރަޝިޔާ ލަޝްކަރުގެ ގާތްގަނޑަކަށް ހަތަރު ބައިކުޅަ އެއްބައި މިހާރު އޮތީ ބާރު ކެނޑި ހަލާކުވެފައި ކަމަށް، ހުޅަނގުގެ އަސްކަރީ ޖާސޫސީ އިދާރާތަކުން ބުނެފި އެވެ.

އިނގިރޭސި ވިލާތުގެ ދިފާއީ ވުޒާރާ އިން ކުރި ދިރާސާތަކަށް ފަހު ބުނި ގޮތުގައި، ޔޫކްރޭންގައި ކުރަމުންދާ ހަނގުރާމަ އަށް ދެ މަހާއި ބައި ވެގެން ދިޔަ އިރު، ރަޝިޔާގެ ލަޝްކަރުތަކަށް ވަނީ ބޮޑެތި ގެއްލުންތަކެއް ލިބިފަ އެވެ. އަދި ރަޝިޔާ ސިފައިންގެ ތެރެއިން ގިނަ އަދަދެއްގެ ބަޔަކު ޔޫކްރޭންގައި މަރުވެފައިވާ ކަމަށް ވެސް އިނގިރޭސި ދިފާއީ ވުޒާރާ އިން ބުނެ އެވެ.

ނަމަވެސް އެ ގައުމުން މަރުވި ސިފައިންގެ އަދަދެއްގެ ރަޝިޔާ އިން މިހާތަނަށް އާންމެއް ނުކުރެ އެވެ. ޔޫކްރޭން ސަރުކާރުން ވެސް ވަނީ މިހާރު ކުރަމުންދާ ހަނގުރާމައިގައި، އެ ގައުމުގެ ލަޝްކަރުތަކަށް ލިބުނު ގެއްލުންތަކާއި މަރުވި ސިފައިންގެ އަދަދު ސިއްރުކޮށްފަ އެވެ.

ޔޫކްރޭނަށް އެރި ރަޝިޔާ ލަޝްކަރުގެ ތެރެއިން މިހާރު ބައިބައިވެ ވިއްސިވިހާލިވެފައިވާ ސިފައިން އަލުން ހަނގުރާމައިގެ ހާލަތަށް ތައްޔާރުކުރުމަށް އަހަރުތަކެއް ނެގުމަކީ އެކަށީގެންވާ ކަމެކެވެ.

އިނގިރޭސި ދިފާއީ ވުޒާރާ އިން ބުނާ ގޮތުގައި، ޔޫކްރޭން ހަނގުރާމަ ފެށިއިރު، ރަޝިޔާގެ އެއްގަމު ސިފައިންގެ ގާތްގަނޑަކަށް 65 ޕަސެންޓް ސިފައިން ޔޫކްރޭނަށް ފޮނުވި އެވެ. އެ ސިފައިން ޔޫކްރޭނަށް އެރީ ހަނގުރާމަމަތީ ފަންނީ ފައުޖުތަކެއްގެ ގޮތުގައި 120 ބަޔަށް ބަހާލައިގެންނެވެ. ނަމަވެސް ޔޫކްރޭން ސިފައިންގެ ދިފާއީ ހަމަލާތަކުގެ ސަބަބުން، ރަޝިޔާ ސިފައިންގެ ގިނަ ފައުޖުތައް މިހާރު ވަނީ، ހަނގުރާމައެއް ކުރިއަށް ގެންދަން އެކަށީގެންނުވާ މިންވަރަށް ބައިބައިވެ ވިއްސިވިހާލިވެފަ އެވެ.

ރަޝިޔާ ސިފައިން ޔޫކްރޭނަށް އެރުމާއެކު އެންމެ ފުރަތަމަވެސް މަސައްކަތް ކުރީ، ޔޫކްރޭންގެ ވެރިރަށް ކިޔޭވް ހިފުމަށެވެ. މަހެއްހާ ދުވަސް ވަންދެން ވައިގެ މަގުންނާއި އެއްގަމު މަގުން ދިން ހަމަލާތަކަށް ފަހު ވެސް، ރަޝިޔާގެ އެއްގަމު ލަޝްކަރުގެ ސިފައިންނަށް، ކިޔޭވްގެ އެތެރެއަށް ވަދެވޭ ގޮތް ނުވުމުން، ހަނގުރާމައިގެ ފުރަތަމަ ފިޔަވަހި ނިމިއްޖެ ކަމަށް ބުނެ، ރަޝިޔާ ސިފައިން ވަނީ ކިޔޭވް ސަރަހައްދުން ދުރަށް ޖައްސައިފަ އެވެ.

އޭގެ ފަހުން ރަޝިޔާ ސިފައިންގެ ހަމަލާތައް އަމާޒުކުރަމުން ދަނީ، ޔޫކްރޭންގެ އިރުމައްޗާއި ދެކުނުގައިވާ ސަރަހައްދުތަކަށެވެ.