ކޮލަމްބޯ އިން ސެޕްޓެމްބަރު މަހު ކާއެއްޗެހި ހުސްވާނެ: މޭޔަރު

ކޮލަމްބޯ (ޖޫން 4) - އަންނަ ސެޕްޓެމްބަރު މަހާ ހަމައަށް ދާއިރު ސްރީ ލަންކާގެ ވެރިރަށް ކޮލަމްބޯ އިން ކާބޯތަކެތި ހުސްވާނެ ކަމުގެ އިންޒާރު އެ ސިޓީގެ މޭޔަރު ރޯސީ ސެނަނަޔަކަ ދެއްވައިފި އެވެ.

އެކަމަނާ ވިދާޅުވީ 600 އޭކަރުގެ ބިމެއްގައި، ކޮލަމްބޯ މުނިސިޕަލް ކައުންސިލް (ސީއެމްސީ) އިން ވަރަށް އަވަހަށް ކާބޯތަކެތި ހެއްދުމުގެ މަސައްކަތް ފަށާާނެ ކަމަށެވެ.

ސެނަނަޔަކަ ވިދާޅުވީ ކާބޯތަކެތި ހެއްދުމަށް ސީއެމްސީން މަސައްކަތް ކުރަމުންދާއިރު އާއްމުން ވެސް ގޭގެ ހުސްތަނުގައި ކާބޯތަކެތި އިންދުމަށް އިލްތިމާސްކުރައްވާ ކަމަށެވެ.

"ކޮލަމްބޯ ސިޓީގެ ގާތްގަނޑަކަށް 60 ޕަސެންޓަކީ މަދުން އާމްްދަނީ ލިބޭ މީހުން. ކާބޯތަކެތީގެ ކޮންމެ ތާށިކަމަކާ އެކު އެ މީހުންނަށް އަސަރުކުރާނެ. އެއްވެސް މީހަކު ބިރުގަންނަ ފަދަ އިންޒާރެއް ދިނުމަށް ބޭނުމެއް ނުވޭ. އެކަމަކު ހާލަތު އަންގައިދީ ތައްޔާރުވުމަށް އިލްތިމާސްކުރަން،" ނޫސްވެރިންނާ ވާހަކަ ދައްކަވަމުން ސެނަނަޔަކަ ވިދާޅުވި އެވެ.

މަދުން އާމްދަނީ ލިބޭ މީހުންނަށް ފައިސާގެ ވައުޗަރެއް ދޫކުރުމުގެ އިންތިޒާމްތައް ހަމަޖެއްސުމުގެ މަސައްކަތް ކުރަމުން ގެންދާ ކަމަށް ވެސް ސެނަނަޔަކަ ވިދާޅުވި އެވެ.

ކާބޯތަކެތީގެ ރައްކާތެރިކަން ޔަގީންކުރުމާ ގުޅޭ ގޮތުން ލަންކާ އިން މިހާރު ދަނީ ވޯލްޑް ފުޑް ޕްރޮގްރާމް، ގްލޯބަލް ފުޑް އެންޑް އެގްރިކަލްޗާ އޮގަނައިޒޭޝަންއާ އެކު މަޝްވަރާ ކުރަމުން ކަމަށް އެކަމަނާ ވިދާޅުވި އެވެ.

ކާބޯތަކެތީގެ އިސްރާފް މަދުކުރުމާ ގުޅޭ ގޮތުން ވެސް ސީއެމްސީން މަޝްވަރާ ކުރަމުން ގެންދާ ކަމަށް ވިދާޅުވި އެވެ. ކޮލަމްބޯ ސިޓީން މިހާރު ދުވާލަކު 350 ޓަނުގެ ކާބޯތަކެތި އިސްރާފުގެ ގޮތުގައި އުކާލަން ޖެހެ އެވެ.

މޭޔަރު ވިދާޅުވީ ކާބޯތަކެތީގެ ޔަގީންކަން ހޯދުމަށްޓަކައި އިސްރާފުގެ ބައި މަދުކުރުމުގެ މަސައްކަތް ވެސް ކުރަން ޖެހޭ ކަމަށެވެ.