ރަނިލްގެ އަމާޒަކީ ލަންކާ ހަމައަކަށް އެޅުވުން

އިގްތިސާދީ ގޮތުން ގައުމު ބަނޑަށް ޖެހި ސިޔާސީ ހަމަނުޖެހުންތަކެއްގެ ތެރޭގައި އޮތް ސްރީ ލަންކާ އަށް ހަމަޖެހުން ގެނައުމުގެ މަސައްކަތް، އެ ގައުމުގެ ރައީސްކަމާ ހަވާލުވެވަޑައިގެންނެވި ރަނިލް ވިކްރަމަސިންހަ ފައްޓަވައިފި އެވެ.

ގައުމު ހަމައަކަށް އެޅުވުމުގެ ގޮތުން ސަރުކާރުގެ ތެރެއިން ކުރަންޖެހޭ ކަންކަމަށް މަގު ފަހިކުރުމުގެ ގޮތުން، ރަނިލްގެ ސަރުކާރުން ފުރަތަމަ ވެސް އެޅި ފިޔަވަޅަކީ، ރައީސްގެ ރަސްމީ ގެކޮޅާއި ބޮޑުވަޒީރުގެ ރަސްމީ އޮފީސް ހިފައިގެން ތިބެ މުޒާހަރާ ކުރަމުން ދިޔަ އާންމުން، ބާރުގެ ބޭނުންކޮށް އެ ސަރަހައްދުން ދުރަށް ޖެއްސުމެވެ. ފުލުހުންގެ ތަރުޖަމާނު، ސީނިއާ ސުޕްރިންޓެންޑް އޮފް ޕޮލިސް ނިހާލް ތަލްދުވާ ވިދާޅުވި ގޮތުގައި މުޒާހަރާގައި ތިބި އާންމުން ރައީސްގެ އޮފީސް ހިމެނޭ ސަރަހައްދުން ދުރަށް ޖެއްސީ، ރައީސް މަސްއޫލިއްޔަތުތައް އަދާކުރެވޭ ފަދަ އަމާން މާހައުލެއް ގާއިމުކޮށްދިނުމުގެ ގޮތުންނެވެ.

ރައީސްކަމުގެ މަގާމާ ހަވާލުވެވަޑައިގަތުމަށް ފަހު، ރައީސް ރަނިލް ވަނީ އޭނާގެ ޒަމާންވީ އެކުވެރިޔާ ޑިނޭޝް ގުނަވަރްދަނެ، ލަންކާގެ އާ ބޮޑުވަޒީރުގެ މަގާމަށް މިދިޔަ ހުކުރު ދުވަހު އައްޔަންކުރައްވައިފަ އެވެ. އަދި ބޮޑުވަޒީރު ޑިނޭޝް އެކުލަވައިލެއްވި ކެބިނެޓްގެ 18 މެމްބަރުން ވެސް ހުކުރު ދުވަހު ވަނީ މަގާމުގެ ހުވާ ކުރައްވައިފަ އެވެ.

ފުލުހުން ބުނި ގޮތުގައި ރައީސްގެ ރަސްމީ ގެކޮޅު، ޓެމްޕަލް ޓްރީސް އާއި ބޮޑުވަޒީރުގެ އޮފީސް މިހާރު ހުރީ، ރަސްމީ ކަންކަމަށް ބޭނުންކުރެވޭ ފަދަ ހާލަތެއްގައެއް ނޫނެވެ. އެހެންކަމުން، އާ ސަރުކާރުގެ ރަސްމީ މަސައްކަތްތަކަށް މަގު ފަހިކޮށްދިނުމުގެ ގޮތުން، އެ ދެ އިމާރާތުގައި ތިބި އާންމުން މިހާރު އެ ތަންތަނުން ނެރެ، ރައީސާއި ބޮޑުވަޒީރުގެ ރަސްމީ މަސައްކަތްތަކަށް މަގު ފަހިކޮށްދޭނެ ކަމަށް ފުލުހުން ބުންޏެވެ.

ފުލުހުންގެ ތަރުޖަމާނު ބުނި ގޮތުގައި ރައީސްގެ ރަސްމީ ގެކޮޅާއި ބޮޑުވަޒީރުގެ އޮފީހުގައި ތިބި އާންމުން އެ ތަންތަނުން ނެރުމަށްޓަކައި، ސިފައިންނާއި ފުލުހުން ބާރުގެ ބޭނުން ކުރަންޖެހުނީ، އެތަންތަނުން ނުކުތުމަށް ތަކުރާރުކޮށް އަންގައި އިންޒާރު ދިނުމުން ވެސް، މުޒާހަރާގެ ބައިވެރިން އެކަމަށް އިޖާބަ ނުދިނުމުންނެވެ. އަދި އެއްވެސް މީހަކު އެއިން އިމާރާތަކަށް ގަދަކަމުން ވަދެގަންނަން ފުރުސަތު ނުދޭނެ ކަމަށް ވެސް ފުލުހުން ބުންޏެވެ.

ލަންކާގެ އާންމު މަސްރަހު ހަމައަކަށް އެޅުވުމުގެ ގޮތުން، ލަންކާގައި ހިންގާ ސަރުކާރު ސްކޫލްތަކާއި ސަރުކާރުން ހުއްދަ ދީގެން އަމިއްލަ ފަރާތްތަކުން ހިންގާ ހުރިހާ ސްކޫލްތަކެއްގެ ކިޔެވުން ވެސް މާދަމާ ފެށުމަށް ސަރުކާރުން މިހާރު ވަނީ ސްކޫލްތަކަށް އަންގައިއިފަ އެވެ. އެހެން ގޮތަކަށް ހަމަޖެހެންދެން މާދަމާ އިން ފެށިގެން ދަރިވަރުން ސްކޫލްތަކަށް ހާޒިރުވާނީ ހޯމަ، އަންގާރަ އަދި ބުރާސްފަތި ދުވަހު އެވެ. ބުދަ ދުވަހާއި ހުކުރު ދުވަހު ކިޔަވާނީ އޮންލައިންކޮށެވެ. ހޮނިހިރު އާދީއްތަ ބަންދުވާނެ އެވެ.

ލަންކާގެ 27 ވަނަ ބޮޑުވަޒީރުގެ މަގާމާ ޑިނޭޝް ހަވާލުވެވަޑައިގެން އާ ސަރުކާރުގެ މަސައްކަތްތައް ފެއްޓެވި ނަމަވެސް، އޭނާގެ ވަޒީރުންގެ ގޮތުގައި ތިއްބެވީ، ބޮޑުވަޒީރުގެ މަގާމުގައި ރަނިލް ހުންނެވި ދުވަސްވަރު އޭނާ އެކުލަވައިލެއްވި ކެބިނެޓްގެ ބޭފުޅުންނެވެ. ކެބިނެޓަށް އައި ހަމައެކަނި ބަދަލަކީ ކުރިން ޚާރިޖީ ވަޒީރުގެ މަގާމުގައި ހުންނެވި ޖީއެލް ޕެއިރިސްގެ ބަދަލުގައި އެ މަގާމަށް، އަލީ ސަބްރީ އައްޔަން ކުރެއްވުމެވެ.

ހުރިހާ ޕާޓީތައް ސަރުކާރާ ގުޅުމަށް ދައުވަތު ދެއްވާފައިވާ ރައީސް ރަނިލް ވިކްރަމަސިންހަ ވިދާޅުވި ގޮތުގައި މިހާރު އޮތް 18 ވަޒީރުންގެ ކެބިނެޓަކީ ވަގުތީ ކެބިނެޓެކެވެ. އަދި ކުރިއަށް އޮތް ދުވަސްތަކުގައި އިދިކޮޅު ޕާޓީތަކާ އެކު މަޝްވަރާކޮށް އެ ޕާޓީތަކުގެ ބައިވެރިވުން ހިމެނޭ ގޮތަށް، މިހާރަށް ވުރެ ގިނަ ވަޒީރުންގެ މައްޗަށް އެކުލެވޭ ސަރުކާރެއް އުފައްދަވާނެ އެވެ.

މިހާރު އޮތް ކެބިނެޓްގައި މާލީ ވަޒީރުގެ މަގާމު ވެސް ފުރުއްވާނީ ރައީސް ރަނިލް އެވެ. ޚާރިޖީ ވަޒީރުގެ މަގާމަށް ހަމަޖެއްސެވި އަލީ ސަބްރީއަކީ، މަގާމުން އިސްތިއުފާ ދެއްވައި މިހާރު ސިންގަޕޫރުގައި ހުންނެވި ކުރީގެ ރައީސް ގޯޓާބޭ ރާޖަޕަކްސަގެ އަމިއްލަ ގާނޫނީ ވަކީލެވެ.