ދާހިލީ ހަމަނުޖެހުމަށް ޖާގައެއް ނުދޭނަން: ދިނޭޝް

ގައުމުގެ ތެރޭގައި ހަމަނުޖެހުން ހިންގައި ގައުމުގެ އިގްތިސާދީ ހަރަކާތްތައް ހުއްޓުމަކަށް ގެނައުމަށް އެއްވެސް ބަޔަކަށް ސަރުކާރުން ފުރުސަތު ނުދޭނެ ކަމަށް، ސްރީ ލަންކާގެ އާ ބޮޑުވަޒީރު ދިނޭޝް ގުނަވަރްދެނަ އިއްޔެ ވިދާޅުވެއްޖެ އެވެ.

ކެންޑީގައި ހުންނަ ބުދު ފައްޅިއަކަށް ޒިޔާރަތްކުރުމަށް ފަހު ނޫސްވެރިންނާ ވާހަކަ ދައްކަވަމުން ބޮޑުވަޒީރު ވިދާޅުވީ ގައުމުގެ ބޮއްސުންލާފައިވާ އިގްތިސާދީ، އިޖްތިމާއީ އަދި ސިޔާސީ ނިޒާމު ހަމައަކަށް އެޅުވުމަށް ސަރުކާރުން އަޅަމުންދާ ފިޔަވަޅުތަކަކީ ހަރުކަށި ކަންތައްތަކެއް ކަމަށް ދައްކަން ބަޔަކު މަސައްކަތް ކުރަމުންދާ ކަމަށެވެ.

އެހެން ނަމަވެސް، ސަރުކާރުން އަޅަމުންދާ ކޮންމެ ފިޔަވަޅެއް އަޅަނީ، ގައުމުގެ ސަލާމަތާއި ރައްޔިތުންގެ ދުޅަހެޔޮކަން ކަށަވަރުކުރުމާއެކު، އިގްތިސާދަށް ދިރުން ގެނައުމަށް ކަމަށް އޭނާ ވިދާޅުވި އެވެ. ސްރީ ލަންކާ މިހާރު އޮތް ހާލަތުން އެއަށް ވުރެ ރަނގަޅު ހާލަތަކަށް ގެންދިއުމަށް މަސައްކަތް ކުރުމަކީ ހަމައެކަނި ސަރުކާރުގެ ޒިންމާއެއް ނޫން ކަމަށް ވެސް އޭނާ ވިދާޅުވި އެވެ.

ބޮޑުވަޒީރު ވިދާޅުވި ގޮތުގައި ގައުމުގެ އަމަންއާންމު ދެމެހެއްޓުމަށްޓަކައި ގާނޫނުތައް ތަންފީޒުކުރުމަކީ ސަރުކާރުގެ ޒިންމާއަކަށް ވާއިރު، ގާނޫނުތަކާ އެއްގޮތަށް އަމަލުކުރުމަކީ ގައުމުގެ ކޮންމެ ފަރުދެއްގެ ވެސް ޒިންމާއެކެވެ. އޭގެ އިތުރުން ޕްރައިވެޓް ސެކްޓާ އާއި ވިޔަފާރި ކުންފުނިތަކުން ވެސް، ގާނޫނުގެ ވެރިކަން ދެމެހެއްޓުމަށް މަސައްކަތް ކުރަންޖެހޭ ކަމަށް އޭނާ ވިދާޅުވި އެވެ.

އޭނާ ވިދާޅުވި ގޮތުގައި ލަންކާގައި ހަމަޖެހުން ގާއިމުކުރުމަށްޓަކައި، ސިޔާސީ ހުރިހާ ޕާޓީތައް ބައިވެރިވާ ސަރުކާރެއް އެކުލަވައިލެއްވުމަށް ރައީސް ރަނިލް ވިކްރަމަސިންހަ ވަނީ ތަކުރާރުކޮށް ގޮވާލައްވައިފަ އެވެ. އަދި އޭނާ ވެސް އެކަމަށް ގޮވައިލެއްވި ކަމަށާއި ނަމަވެސް މިހާތަނަށް އެއްވެސް ޕާޓީއަކުން އެކަމަށް އިޖާބަ ނުދޭ ކަމަށް ވެސް ބޮޑުވަޒީރު ވިދާޅުވި އެވެ.

ލަންކާ ސަރުކާރާ ދެކޮޅަށް މަގުތަކަށް ނުކުމެ މުޒާހަރާ ކުރި އާންމުން، އެ ގައުމުގެ ރައީސް އޮފީހާއި ބޮޑުވަޒީރުގެ އޮފީހަށް ވަދެގަނެ އެ ދެ ތަނަށް ގެއްލުންތަކެއް ދީފައިވާތީ، އެ ދެ އޮފީހުގެ މަސައްކަތްތައް ހުއްޓިފައި އޮންނަތާ ދުވަސްތަކެއް ވެއްޖެ އެވެ. ބޮޑުވަޒީރު ދިނޭޝް ވިދާޅުވި ގޮތުގައި އެ ދެ އޮފީހުން އާންމުން ނެރުމަށް ފަހު އެ ދެ އޮފީސް ސާފުކޮށް މިހާރު ވަނީ ރަސްމީ މަސައްކަތްތައް ފަށައިފަ އެވެ.

އޭގެ އިތުރުން، ރައީސް ދިރިއުޅުއްވާ ރަސްމީ ގެކޮޅު ކަމަށްވާ ޓެމްޕަލް ޓްރީ ވެސް ވަރަށް އަވަހަށް ހަމައަކަށް އަޅުވައި އެ ގެކޮޅު ބޭނުންކުރެވޭ ގޮތް ހައްދަވާނެ ކަމަށް ވެސް ބޮޑުވަޒީރު ވިދާޅުވި އެވެ.