ޓީނޭޖް އަތުން ބަލިވެ ވިކްޓަރީގެ ބާރު މުޅިން ކެނޑިއްޖެ

ދެވަނަ ޑިވިޝަންގައި މިއަދު ހަވީރު، ކްލަބް ޓީނޭޖާ ދެކޮޅަށް ކުޅުނު މެޗުން 1-0 ން ބަލިވެ، ވިކްޓަރީ ސްޕޯޓްސް ކްލަބަށް އަމިއްލަ ބާރު ކެނޑިއްޖެ އެވެ.

ދެ ގުރޫޕަކަށް ބަހައިލައިގެން ކުރިއަށްދާ ދެވަނަ ޑިވިޝަންގައި ސެމީ ފައިނަލަށް ދާނީ ކޮންމެ ގުރޫޕަކުން އެންމެ ގިނަ ޕޮއިންޓް ހޯދާ ދެ ޓީމެވެ. ވިކްޓަރީ ހިމެނޭ ގުރޫޕް 2 ގެ އެންމެ ކުރީގައި އޮތީ، އެ ޓީމުގެ ކުރީގެ ވާދަވެރިޔާ ނިއު ރޭޑިއަންޓް ސްޕޯޓްސް ކްލަބެވެ. ދެވަނައިގައި އޮތީ ލިޓްލް ޓައުން ސްޕޯޓްސް (އެލްޓީ) އެވެ.

ވިކްޓަރީ އަށް ބާކީ އޮތީ ދެ މެޗެވެ. އެ ދެ މެޗުން މޮޅުވިޔަސް އެ ޓީމު ސެމީ އަށް ދިއުމަކީ ގާތްގަނޑަކަށް މުސްތަހީއްލު ކަމެކެވެ. މަހިބަދޫ އާއި ލޮރެންޒޯއާ ދެކޮޅަށް ކުޅޭ މެޗުން މޮޅުވެގެން ވިކްޓަރީ އަށް ހަމަ ކުރެވޭނީ ޖުމުލަ 10 ޕޮއިންޓެވެ. އެލްޓީން މިހާރު ވެސް ވަނީ 10 ޕޮއިންޓް ހޯދައިފަ އެވެ. އެލްޓީ އަށް ވެސް ބާކީ ދެން އޮތީ ދެ މެޗެވެ. ވިކްޓަރީ ސެމީ އަށް ދާނަމަ ކުރިއަށް ދެ މެޗުން މޮޅުވުމުގެ އިރުތުރަށް ޓީނޭޖާއި އެލްޓީ ވެސް ކުޅޭ ދެ މެޗުން ބަލިވާން ޖެހޭނެ އެވެ. އަދި ފައިދާ ގޯލްގައި ވެސް އެ ދެ ޓީމުގެ މައްޗަށް ކުރި ހޯދެން ޖެހޭނެ އެވެ. ޓީނޭޖު ވެސް ވަނީ މިހާރު ނުވަ ޕޮއިންޓް ހޯދައިފަ އެވެ. އެ ޓީމު އޮތީ ތާވަލުގެ ތިންވަނައިގަ އެވެ. ވިކްޓަރީ އޮތީ ހަތަރު ޕޮއިންޓާއެކު ތާވަލުގެ ހަތަރުވަނައިގަ އެވެ.

މާފަންނު ޓާފް ދަނޑުގައި މިއަދު ކުޅުނު މެޗު ވިކްޓަރީ އަށް ގެއްލުނީ މެޗުގެ ފަހު ވަގުތުގައި ޓީނޭޖުން ޖެހި ލަނޑުންނެވެ. މެޗުގެ 90 މިނެޓް ހަމަވެގެން ދެއްކި އިތުރު ވަގުތުގެ ފުރަތަމަ މިނެޓްގައި އެ ޓީމުގެ ގަތަރުގެ ކުޅުންތެރިޔާ އަލީ އަހްމަދު އަލީ އާފިފް ލަނޑު ޖަހައިދިނެވެ.

ވިކްޓަރީ އަކީ ދެވަނަ ޑިވިޝަން ފުޓްބޯޅަ މުބާރާތަށް ދުރާލައި ތައްޔާރުވާން ފެށި ޓީމެކެވެ. މުބާރާތަށް ތައްޔާރުވުމުގެ ގޮތުން ހިންނަވަރުގައި 12 ދުވަހުގެ ޓްރޭނިން ކޭމްޕެއް ވެސް ކުރިއަށް ގެންދިޔަ އެވެ. އަދި ލަންކާގެ ގައުމީ ޓީމުގެ ކުރީގެ ކޯޗު މުހައްމަދު ނިޒާމް ޕަކީރު އަލީ އާއި އެ ގައުމުގެ ގައުމީ ޓީމުގެ ކުރީގެ ކީޕަރު ވެސް ވިކްޓަރީން ގެނެ އެވެ.