ކައިވެންޏަށް އެއްކުރި ފައިސާއިން ހެދީ އަވަށުގެ މަގު

އިންޑިއާގެ ޓެމިލް ނާޑޫގައި ދިރިއުޅޭ ޒުވާނަކު އެއްކުރި ފައިސާއިން އޭނާގެ އަވަށުގެ މަގު ހެދުމުން އެތައް ބައެއްގެ ލޯބި ލިބެން ފަށައިފި އެވެ.

ޓެމިލް ނާޑޫގެ ނައްލަވޫރުގެ އަވަށުގައި އުޅޭ ޕީ ޗަންދުރަސޭކަރަން އެންމެ ކުޑައިރުން ފެށިގެން ވެސް ދެކެމުން އައި އެއް ހުވަފެނަކީ އުފަން އަވަށުގެ މަގުތައް ހަދާފައި ހުންނާނެ ދުވަހެކެވެ.

ނަމަވެސް އެންމެ ކުޑައިރުން ފެށިގެން މިއަދާ ހަމައަށް އައި އިރުވެސް އެއްވެސް ބަޔަކު އެ އަވަށުގެ މަގުތައް ހަދަން އެހީއެއް ނުވެ އެވެ. އެހެންވެ ޗަންދުރަސޭކަރަން އަޒުމް ކަނޑައެޅީ އަމިއްލަ އަށް އަވަށުގެ މަގު ހަދާށެވެ.

ޓެކް ދާއިރާގައި މަސައްކަތްކުރާ ޗަންދުރަސޭކަރަން އަށް ވަޒީފާ ލިބުމާ އެކު ފައިސާ އެއްކުރަން ފެށީ ކައިވެންޏަށެވެ. ނަމަވެސް އެތައް އަހަރެއް ވީ އިރުވެސް މަގުތަކަށް ބަދަލެއް އައިސްފައި ނެތުމުން އެންމެ ފަހުން އެކަމަށް ހައްލެއް ހޯދަން ބޭނުންވި އެވެ. ކައިވެންޏަށް އެއްކުރި ހުރިހާ ފައިސާ އެއް އޭނާ ނެގީ އަވަށުގެ މަގު ހެދުމަށެވެ.

އޭނާ ވަނީ ކައިވެންޏަށް 10 ލައްކަ ރުޕީސް ރައްކާކޮށްފަ އެވެ. އެ ފައިސާއިން ވަނީ އެންމެ ފަހުން އޭނާ އަވަށުގައި މަގެއް ހަދައިފަ އެވެ. އެ މަގުގެ ދިގުމިނުގައި 280 މީޓަރު ހުންނާނެ އެވެ. މިހާރު މަގުގެ އަމަލީ މަސައްކަތް ކުރާއިރު އެ މަސައްކަތް އޮތީ ނިމުމާ ވަރަށް ގާތް ވެފަ އެވެ.