ކެންސަރު ގިނަ ސަބަބު ބަލަން ޑަބްލިޔުއެޗްއޯގެ ޓީމެއް

ކެންސަރު ގިނަވާ ސަބަބު ބަލަން މާހިރުންގެ ޓީމެއް ރާއްޖެ އަތުވެއްޖެ

23 އޯގަސްޓް 2022

ރާއްޖޭގައި ކެންސަރު ގިނަވާ ސަބަބު ދެނެގަތުމަށް ދުނިޔޭގެ ސިއްހަތު ޖަމިއްޔާގެ ޓީމެއް ރާއްޖެ އަތުވެއްޖެ އެވެ.

އާސިމާ ނިޒާރު

ހެލްތު މިނިސްޓްރީން އިއްޔެ ބުނީ ގައިންގަޔަށް ނާރާ ބަލިތައް އަދި ހާއްސަކޮށް ކެންސަރު ކޮންޓްރޯލްކުރުމަށް ކުރެވޭނެ ކަންތައްތައް ދިރާސާކުރާ ޓީމުގައި ޑަބްލިއުއެޗްއޯގެ ރާއްޖޭގެ އޮފީހާއި ސަރަހައްދީ އަދި މައި މަރުކަޒުގެ މާހިރުންނާއި އިންޓަނޭޝަނަލް އެޓޮމިކް އެނާޖީ އެޖެންސީ އަދި އިންޓަނޭޝަނަލް އެޖެންސީ ފޯ ރިސާޗް އިން ކެންސަރަށް ނިސްބަތްވާ ފަންނީ މާހިރުން ހިމެނޭ ކަމަށެވެ.

އެ ޓީމުން މިދިޔަ އާދިއްތަ ދުވަހުން ފެށިގެން އަންނަ ބުރާސްފަތި ދުވަހާ ހަމައަށް ރާއްޖޭގައި މަސައްކަތްކުރާނެ އެވެ. ކެންސަރަށް ފަރުވާ ދޭ ހޮސްޕިޓަލްތަކުގެ އޮފިޝަލުންނާ އެ މުއްދަތުގައި މަޝްވަރާކޮށް ބައެއް އަތޮޅުތަކުގެ ހޮސްޕިޓަލްތަކާއި ސިއްހީ މަރުކަޒުތަކަށް ޒިޔާރަތްކޮށް މައުލޫމާތު ހޯދާނެ ކަމަށް ބުންޏެވެ.

މިނިސްޓްރީން ބުނި ގޮތުގައި ގައިންގަޔަށް ނާރާ އަދި ހާއްސަކޮށް ކެންސަރު ކޮންޓްރޯލްކޮށް ސިއްހީ ދުޅަހެޔޮކަން އިތުރުކުރަން ޕްރައިމަރީ ހެލްތު ކެއާގެ ނިޒާމެއް ވަރަށް މުހިއްމު ކަމަށެވެ.

@MoHmv is committed in addressing cancer prevention, early diagnosis, clinical management and palliative care through Primary Health Care model. pic.twitter.com/3LerBhtzjC
— Ministry of Health (@MoHmv) August 22, 2022

އެހެންވެ، އެ ބަލިތައް ދުރާލައި ދެނެގަނެ، ރައްކާތެރިވާނެ ގޮތާއި ފަރުވާކުރުމަށް ބޭނުންވާނެ ވަސީލަތްތައް ކަނޑައެޅުމުގައި ބޭނުންވާނެ މިންގަނޑުތަކާއި ފަރުވާއަށް ބޭނުންކުރާނެ ގައިޑްލައިންތައް ތައްޔާރުކުރުމަށް ޑަބްލިއުއެޗްއޯއާ ގުޅިގެން މަސައްކަތް ކުރަމުން އަންނަ ކަމަށް ވެސް ބުންޏެވެ.

މިނިސްޓްރީން ބުނީ ރާއްޖޭގައި ކެންސަރު ކޮންޓްރޯލްކުރުމަށާއި ކެންސަރަށް ފަރުވާ ދިނުމާއި ކެންސަރު ބަލީގެ މީހުންގެ މައުލޫމާތު ބަލަހައްޓައި އަދި ހިދުމަތްތައް ރޭވިފައި ހުރި ގޮތްތައް ބަލާނެ ކަމަށެވެ. އޭގެ އިތުރުން ދިރިއުޅުމުގެ އާދަތަކާ ގުޅިފައިވާ ކެންސަރު ބަލި އަދި ދިގު މުއްދަތުގެ ބަލިތަކަށް ހުށަހެޅޭ ހިރާސްތަކާއި ބަލިތަކުން މީހުން ރައްކާތެރިކުރުމާއި ފަރުވާގެ ނިޒާމު އިންތިޒާމް ކުރެވިފައިވާ ގޮތުގެ މައުލޫމާތު ދެނެގަންނާނެ ކަމަށް ބުންޏެވެ.

އެ މައުލޫމާތުގެ އަލީގައި ޕަބްލިކް ހެލްތުގެ ނިޒާމް ހަރުދަނާކުރުމަށް ކުރެވިދާނެ ކަންކަމާ ބެހޭގޮތުން ސަރުކާރަށް ލަފާ ދިނުމަށް ވަނީ ނިންމައިފަ އެވެ.

ކެންސަރު ބައްޔާ ގުޅޭ ދިރާސާ ކުރަން ފެށިއިރު، ރާއްޖޭގައި އެ ބަލީގައި މަރުވާ މީހުންގެ އަދަދު ދަނީ އެއް އަހަރުން އަނެއް އަހަރަށް އިތުރުވަމުންނެވެ. ކެންސަރުގެ އެކި ބަލިތަކުގައި 2020 ވަނަ އަހަރު އެކަނި ވެސް 100 އަށްވުރެ ގިނަ މީހުން މަރުވި އެވެ.

Comments