މ. މަޑުއްވަރީގެ ބަނދަރު ހަދާނީ ރައްޔިތުން ބޭނުންވާ ގޮތަށް: ރައީސް

މ. މަޑުއްވަރީގެ ބަނދަރު ހަދާނީ އެ ރައްޔިތުންގެ ހިޔާލާއި މަޝްވަރާއާ އެކު ރައްޔިތުން ބޭނުންވާ ގޮތަށް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރައީސް އޮފީހުން ބުނީ، ރައީސް މ. އަތޮޅުގެ ފަސް ރަށަކަށް ކުރައްވާ ދަތުރުފުޅުގައި މިއަދު މަޑުއްވަރީ އަށް ވަޑައިގެން ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި، މަޑުއްވަރީގެ ބަނދަރު ހެދުމުގެ މަސައްކަތް އެމްޓީސީސީއާ ހަވާލުކުރެވިފައިވާ ކަމަށާއި ބަނދަރުގެ ކޮންސެޕްޓް ފައިނަލް ވީހާ އަވަހަކަށް އަމަލީ މަސައްކަތް ފަށާނެ ކަމަށް ވިދާޅުވި ކަމަށެވެ.

މަޑުއްވަރީގެ ބަނދަރުގެ މަސައްކަތް ނުފެށި އޮތީ އެ މަޝްރޫއުގެ ޑިޒައިނާ މެދު ރައްޔިތުންގެ މެދުގައި ހިޔާލު ތަފާތުވުން އޮތުމުގެ ސަބަބުންނެވެ. އެހެންވެ، ރައީސް ވިދާޅުވީ ބަނދަރު ހެދުމަށް ޕްލޭނިން މިނިސްޓްރީން ހަދާފައިވާ ޑިޒައިނާ ގުޅޭ ގޮތުން ރައްޔިތުންނަށް މައުލޫމާތު ދިނުމަށް އަންނަ މަހު އެ މިނިސްޓްރީގެ ޓީމެއް އެ ރަށަށް ދާނެ ކަމަށެވެ.

"ބަނދަރު ހަދާނީ ރައްޔިތުންނާ މަޝްވަރާކުރެވި ރައްޔިތުން ނިންމާ ގޮތެއްގެ މަތީންކަމުގެ ޔަގީންކަން ރައީސުލްޖުމްހޫރިއްޔާ ވަނީ މަޑުއްވަރީގެ ރައްޔިތުންނަށް ދެއްވައިފަ އެވެ،" ރައީސް އޮފީހުން ބުންޏެވެ.

މަޑުއްވަރީގެ ސިއްހީ މަރުކަޒުން ކުރިން ދެމުން އައި މޮބައިލް ލެބޯޓްރީގެ ހިދުމަތް ވެސް ވަރަށް އަވަހަށް އަލުން ފަށާނެ ކަމަށާއި އަދި މަޑުއްވަރީގެ ޒުވާނުންގެ މަރުކަޒުގެ މަސައްކަތް ވެސް ވަރަށް އަވަހަށް ފަށާނެ ކަމަށް ރައީސް ވިދާޅުވި އެވެ.

މ. އަތޮޅުގެ ފަސް ރަށަކަށް، އަންނަ ހޯމަ ދުވަހުގެ ނިޔަލަށް ކުރައްވާ ދަތުރުފުޅުގައި އެ މަނިކުފާނު އެންމެ ފުރަތަމަ ވަޑައިގެންނެވީ ރަތްމަންދު އަށެވެ. މަޑުއްވަރި އަށް ފަހު ދެން ވަޑައިގަންނަވާނީ ދިއްގަރާއި ވޭވަށް އަދި އެ އަތޮޅުގެ އަތޮޅުވެރިކަން ކުރާ ރަށް، މުއްޔަށް ކަމަށް އެ އޮފީހުން ބުނެ އެވެ.