ކުޑަކުއްޖެއްގެ އެދުމެއް އެޗްޑީސީން ފުރިހަމަކޮށްދީފި

ހުޅުމާލޭގައި ދިރިއުޅޭ ކުޑަކުއްޖަކު، ރައްކާތެރިކަމާއެކު މަގު ހުރަސް ކުރެވޭނެ ގޮތް ހަދައިދިނުމަށް އެދި އެޗްޑީސީ އަށް ސިޓީއެއް ފޮނުވީ މީގެ މަހެއްހާ ދުވަސް ކުރިންނެވެ.

ހުޅުމާލޭގެ މެނޭޖިން ޑިރެކްޓަރަކަށް އޭރު ހުންނެވި ސުހައިލް އަހުމަދަށް، އެ ކުއްޖާ ފޮނުވި އެ ސިޓީގައި އެދުނީ އޭނާ ދިރިއުޅޭ އިމާރާތުގެ ކުރިމަތީގައި ކަފިހި ހުރަހެއް ކުރަހައިދިނުމަށެވެ.

"މި ސިޓީ މި ލިޔަނީ އަޅުގަނޑުމެންނަށް ރައްކާތެރިކަމާ އެކު މަގު ހުރަސް ކުރެވޭނެ ގޮތް ހޯދައިދިނުމަށް، އަޅުގަނޑުގެ ގޭ ކުރިމަތީގައި ކަފިހި ހުރަހެއް ކުރަހައިދެވޭތޯ ބަލަން،" އިނގިރޭސި ބަހުން އެ ކުއްޖާ އަމިއްލަ އަށް ލިޔުނު ސިޓީގައިވެ އެވެ.

ސޯޝަލް މީޑިއާގައި ކުއްޖާގެ މަންމަ އިއްޔެ އާންމުކުރި ޕޯސްޓުގައި ވަނީ ހުޅުމާލޭގެ ފިތުރޯނު މަގުގައި ހެދި ކަފިހި ހުރަހަކުން ހުރަސްކުރާ ފޮޓޯއެއް އާންމުކޮށްފަ އެވެ.

އެ ޕޯސްޓުގައި ބުނީ އެ ކުއްޖާ އެ ސިޓީ ފޮނުވިތާ މަސް ދުވަސް ފަހުން މިދިޔަ ބުރާސްފަތި ދުވަހު އެޗްޑީސީން އެ އިމާރާތް ދޮށުގައި ކަފިހި ހުރަހެއް ކުރަހައިދީފައިވާ ކަމަށެވެ. އެ ކުއްޖާގެ ސިޓީއާ ގުޅިގެން އެޗްޑީސީން ކުއްޖާއާ ބައްދަލުކުރި ކަމަށް ވެސް މަންމަ ބުންޏެވެ.

ގިނަ އަދަދަކަށް ވެހިކަލް ދުއްވާ އެ މަގުގައި ކަފިހި ހުރަހެއް ކުރަހައިދީފައިވާތީ އާންމުން ވަނީ އެޗްޑީސީ އާއި އެ ކުއްޖާ އަށް ވެސް ޝުކުރު އަދާކޮށްފަ އެވެ.