ޓްރެފިކް ލައިޓްތައް ބޭނުންކުރަން ފެށުމުން އެކްސިޑެންޓުތައް ވަރަށް ބޮޑަށް މަދުކުރެވޭނެ: އާބަންކޯ

ހުޅުމާލޭގައި މިހާރު ހަރުކުރަމުން އަންނަ ޓްރެފިކް ލައިޓްތައް ބޭނުންކުރަން ފެށުމުން އެކްސިޑެންޓުތައް ހިނގުން ވަރަށް ބޮޑަށް މަދުކުރެވޭނެ ކަމަށް އާބަންކޯ އިން މިއަދު ބުނެފި އެވެ.

އެ ކުންފުނިން ބުނިގޮތުގައި، އެ ޓްރެފިކް ލައިޓްތައް އާއްމުކޮށް ހަރުކުރާނީ ދުއްވާ އުޅަނދުތައް ހުއްޓުވައި، ހިނގާ މީހުންނަށް ރައްކާތެރިކަމާއެކު ހުރަސްކުރުމަށް ފަސޭހަކޮށްދިނުމަށެވެ. މިއީ ހިނގާފައި އުޅޭ މީހުންގެ ރައްކާތެރިކަށް ކަށަވަރުކޮށްދީ، އެކްސިޑެންޓުތަކުން ސަލާމަތް ކޮށްދިނުމުގައި މުހިންމު ރޯލެއް ކުޅޭ ލައިޓްތަކެއް ކަމަށް ބުންޏެވެ.

އެކި ގައުމުތަކުގައި އެ ބާވަތުގެ ލައިޓް ހަރުކޮށްފައި ހުންނަނީ އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ މީހުންނަށް ވެސް ފަސޭހަވާނެ ގޮތަށް ކަމަށް އާބަންކޯ އިން ބުންޏެވެ.

ޓްރެފިކް ލައިޓްތަކުން މައިގަނޑު ދެ ފައިދާއެއް ކުރެ އެވެ. އެއީ؛

• ރައްކާތެރިކަން

ދިރާސާތަކުން އެނގޭ ގޮތުގައި އިންސްޓޯލް ކޮށްފައިވާ ޓްރެފިކް ލައިޓިން މަދު ނުވަތަ ނެތް ޕެޑެސްޓްރިއަން ކްރޮސިންތަކުގައި އެކްސިޑެންޓެއް ހިނގައިފި ނަމަ ނުރައްކާތެރިކަން އިތުރުވެ އެވެ. އެކަމަކު މިފަދަ ޓްރެފިކް ލައިޓްތައް ހަރުކޮށްފައި ހުންނަ ނަމަ އެކްސިޑެންޓުތައް ހިނގާ ވަރު މަދުވެ އެވެ.

• ވިޒިބިލިޓީ

އެކި ބޭނުންތަކަށް މަގުމަތީގައި އުޅޭ މީހުންނާއި ވެހިކަލްތައް ދުއްވާ މީހުންނަށް ވިޒިބިލިޓީ އިތުރުކޮށްދިނުމަކީ ވެސް މި ލައިޓްތައް ހަރުކުރުމުގެ މައިގަނޑު އެއް ސަބަބެވެ. އެއީ މަގުތަކުގެ ރައްކާތެރިކަމާއި ގުޅިފައިވާ ވަރަށް މުހިންމު ކަމެކެވެ. ވިޒިބިލިޓީ އިތުރުވުމުގެ ސަބަބުން، މަގުތަކުގައި ވެހިކަލްތައް ދުއްވާ މީހުންނާއި މަގު ހުރަސްކުރާ މީހުންނަށް ވެސް ނުރައްކަލެއް ކުރިމަތިވާކަން ފާހަގަކުރެވޭ ހިނދެއްގައި އެކަމުން ސަލާމަތްވުމަށް މަސައްކަތް ކުރުމަށް ވަގުތި ލިބި، ފަސޭހަވެ އެވެ.

"ރާއްޖޭގައި ވެސް ދުވަހުން ދުވަހަށް ދުއްވާ އުޅަނދުތަކުގެ އަދަދު އިތުރުވަމުން ދާއިރު، މަގުމަތީގެ ރައްކާތެރިކަމަށް މުހިއްމު ފިޔަވަޅުތަކެއް އެޅުމަކީ މިހާރު ވެސް ސަރުކާރުންނާއި އެކި މުއައްސަސާތަކުން ހާއްސަ ކަމެއް ދީގެން ކުރަމުން އަންނަ މަސައްކަތެއް. އެކްސިޑެންޓްތައް މަދުކޮށް ރައްކާތެރި މާހައުލެއް ގާއިމުކުރުމަށް މިފަދަ ޓެކްނޮލޮޖީތަކުގެ ބޭނުންކުރުމުން ރައްޔިތުންނަށް ގިނަގުނަ ފަސޭހަތަކެއް ވެގެންދާނެ،" އާބަންކޯ އިން ބުންޏެވެ.

ހުޅުމާލޭގައި އެކްސިޑެންޓުތައް ހިންގުން އާންމުވަމުން ދާތީ އެ މައްސަލައަށް ހައްލެއް ގެނައުމުގެ ގޮތުން 8 ތަނެއްގައި ޓްރެފިކް ލައިޓް ހަރުކޮށް، މަގުތަކަށް އިތުރު ބަދަލުތައް ގެންނަން އާބަންކޯ އިން އޮތީ ނިންމައިފަ އެވެ. ބޮޑެތި މަގުތަކުގެ މެދުގައި ޑިވައިޑަރު ހަރުކުރަން ވެސް ނިންމި އެވެ. އެ މަސައްކަތުގެ ދަށުން މިހާރު ޓްރެފިކް ލައިޓް ހަރުކޮށް، ޓެސްޓު ކުރަމުން އަންނަނީ ހުޅުމާލެ ހޮސްޕިޓަލްގެ ކުރިމައްޗާއި ހުޅުމާލެ 2 ގެ ހިޔާ ފްލެޓް ސަރަހައްދުގަ އެވެ.

ބޮޑެތި މަގުތަކުގެ މެދުގައި ޑިވައިޑަރު ހަރުކުރަން ވެސް ނިންމި އެވެ. އެކަން ކުރުމުގެ އެންމެ ބޮޑު އެއް ބޭނުމަކީ ޔޫ ޓާން ނަގައި މީހުން ގަވާއިދާ އެއްގޮތަށް އެކަން ކުރުމަށް ބާރު އެޅުމެވެ. އެކަން އަންގައިދޭ ބޯޑުތައް ވެސް މަގުމަތީގައި ހަރުކުރާނެ އެވެ.

ފުލުހުންނާ ގުޅިގެން ބައެއް މަގުތަކުގެ ވެހިކަލް ފްލޯ އަށް ބަދަލު ގެނައުމުގެ މަސައްކަތް ވެސް އެ ކުންފުނިން އަންނަނީ ކުރަމުންނެވެ.