ހުޅުމާލޭގައި 17 މޮނިއުމެންޓް ހަދަން މުބާރާތެއް، އިނާމަކަށް 100،000ރ.

ހުޅުމާލޭގެ ޓްރެފިކް ފްލޯއަށް ފަސޭހަކުރުމަށް މަގުތަކުގައި މިހާރު ހަދަމުން އަންނަ ރައުންޑްއެބައުޓްސްތަކުގައި ބަހައްޓާނެ މޮނިއުމެންޓްތައް ހެދުމަށް، އެ އެއްޗެހި ޑިޒައިންކުރުމުގެ މުބާރާތެއް އެޗްޑީސީން އިއްޔެ ފަށައިފި އެވެ.

އެޗްޑީސީން ކުރި އިއުލާނެއްގައި ބުނީ ހުޅުމާލޭގެ ބޮޑެތި މަގުތަކުގައި ހަދަމުން އަންނަ ރައުންޑްއެބައުޓްސްތަކުގައި ބަހައްޓާ މި މޮނިއުމެންޓްތަކުން އެ އަވަށުގެ ލޭންޑްސްކޭޕް ބަދަލުކޮށްލާނެ ކަމަށެވެ. މި މޮނިއުމެންޓްތައް ޑިޒައިންކުރަން ޖެހޭނީ "ދިވެހީންގެ ރާއްޖެ" ރަމްޒުވާނެ ގޮތަށް ކަމަށް ވެސް އެ އިއުލާނުގައި ބުންޏެވެ.

މި މުބާރާތުގައި ބައިވެރިވުމުގެ ފުރުސަތު އާޓިސްޓުންނާއި ޑިޒައިނަރުން އަދި އާކިޓެކްޓްސްއަށް މިހާރު ހުޅުވާލާފައިވާ ކަމަށް ވެސް އެ އިއުލާނުގައި ބުންޏެވެ.

އެޗްޑީސީން ބުނި ގޮތުގައި، އެންމެ ފުރިހަމަ ޑިޒައިންތައް ހުށަހަޅާ މީހަކަށް 100،000ރ. ގެ ފައިސާގެ އިނާމެއް ލިބޭނެ އެވެ.

އެ އިއުލާނާ އެކު ވަނީ މި މޮނިއުމެންޓްތައް ޑިޒައިންކުރުމުގައި ބަލަން ޖެހޭ މިންގަނޑާއި ޝަރުތުތައް ހިމެނޭ ގައިޑްލައިނެއް ވެސް އާންމުކޮށްފަ އެވެ.

ޑިޒައިނަރުންގެ ޝަރުތުތައް

- މުބާރާތުގައި ބައިވެރިވޭނީ ޕްރޮފެޝަނަލް އާޓިސްޓުންނާއި ޑިޒައިނަރުންނާއި އާކިޓެކްޓްސް އަދި ގުޅޭ ދާއިރާއަކުން ކިޔަވާ ދަރިވަރުންނަށް.

- ފަސް މީހުންގެ ޓީމަކުން ގުޅިގެން ވެސް ޑިޒައިންތައް ހުށަހެޅޭނެ.

- އުމުރުން 18 އަހަރު ވެފައިވުން.

ގައިޑްލައިނުން މުހިންމު ނުކުތާތައް

- ޖުމްލަ 17 މޮނިއުމެންޓް ޑިޒައިންކުރާނެ ކޮންސެޕްޓް ވަކިވަކިން ހުށަހަޅަން ޖެހޭނެ.

- މޮނިއުމެންޓް ޑިޒައިންކުރަން ޖެހޭނީ ޓްރެފިކަށް އެއްވެސް ކަހަލަ ހުރަހެއް ނޭޅޭނެ ގޮތަށް. އަދި ރޯޑް ސޭފްޓީގެ ގަވާއިދުތަކަށް ފެތޭނެ ގޮތަށް ޑިޒައިންކުރުމަށް އިސްކަންދީފައި ހުންނަން ޖެހޭނެ.

- މޮނިއުމެންޓް ޑިޒައިންކުރަން ޖެހޭނީ މެއިންޓެނަންސްގެ ހަރަދު ކުޑަވާނެ ގޮތަށް.

- ޑިޒައިންކުރަން ޖެހޭނީ ފެން ނުވަތަ ކަރަންޓު ބޭންނުންކުރަން ނުޖެހޭ ގޮތަށް.

- ކޮންމެ މޮނިއުމެންޓަކުން ވެސް ދިވެހިންގެ އުސޫލުތަކާއި ގައުމިއްޔަތާއި ސަގާފަތާއި ތަރިކަ އަދި ތާރީހު ރަމްޒުކޮށްދޭން ޖެހޭނެ.

މި މުބާރާތައް ޑިޒައިންތައް ހުށަހެޅުމުގެ ފުރުސަތު އަންނަ މަހު 30ގެ ނިޔަލަށް ވަނީ ހުޅުވާލައިފަ އެވެ. އަދި މުބާރާތުން މޮޅުވާ މީހެއް އިއުލާންކުރުން އޮންނާނީ އަންނަ ނޮވެމްބަރު މަހު 14 ގަ އެވެ.