އިގްތިސާދީ މަސައްކަތުގައި އަންހެނުންގެ ހާލަތު ދަށް: ފައްޔާޒް

ރާއްޖޭގެ އިގުތިސޯދީ މަސައްކަތުގައި އަންހެނުންގެ ބައިވެރިވުން އަދިވެސް އޮތީ ދަށުގައި ކަމަށް އިނޮމިކް މިނިސްޓަރު ފައްޔާޒު އިސްމާއިލް މިއަދު ވިދާޅުވެއްޖެ އެވެ.

ކައުންސިލްތަކާއި އަންހެނުންގެ ކޮމިޓީގެ މެމްބަރުންނަށް އަމާޒުކޮށްގެން ލ. ގަމުގައި ފެށި "ވިއަވަތި ރާއްޖެ" ކޮންފަރެންސްގެ ބައްދަލުވުމުގައި ވާހަކަދައްކަވަމުން ފައްޔާޒު ވިދާޅުވީ ހަގީގީ ބާރުވެރިކަން ލިބޭނީ އިގުތިސޯދީ ބާރުވެރިކަން ލިބިގެން ކަމަށެވެ. އެކަންތައްތައް ހައްލުކޮށްދިނުމަށް ޓްރެއިނިންތަކާއި މާލީ އެހީތެރިކަން ލިބޭނެ ގޮތަށް ގާނޫނަށް ބަދަލުތައް ގެނެސްފައިވާ ކަމަށް އޭނާ ވިދާޅުވި އެވެ.

ނަމަވެސް، އެ ކަންތައްތަކުން ވެސް އެދެވޭ ނަތީޖާއާ ހަމައަށް ނުދާކަން ފައްޔާޒު ފާހަގަކުރެއްވި އެވެ.

އޭނާ ވިދާޅުވި ގޮތުގައި ލަނޑުދަނޑިތަކެއް ކަނޑައެޅިފައިވާ ކަމަށާއި ބިޒްނަސް ސެންޓާ ކޯޕަރޭޝަން (ބީސީސީ) އިން ހިންގާ ޕްރޮގްރާމުތަކުގައި އަންހެނުން ބައިވެރިކޮށް، ސަރުކާރުން ހިންގާ އެސްޑީއެފްސީން އެކަނި ވެސް އަންހެނުން ހިއްސާވާ ކުންފުނިތަކަށް ގާތްގަނޑަކަށް 280 މިލިއަން ރުފިޔާގެ ލޯނު ދޫކޮށްފައިވާ ކަމަށެވެ.

ނަމަވެސް، އެ ކަމުގައި ވެސް އަންހެނުންނަށް ނިކަމެތިކަން ލިބޭ ކަންކަން މެދުވެރިވާކަން ފާހަގަކުރެއްވި އެވެ. އޭގެ މިސާލެއްގެ ގޮތުން ފައްޔާޒު ނެންގެވީ، ދެމަފިރިން ވިޔަފާރި ފެށުމަށް އަންހެނުންގެ ނަމުގައި ލޯނު ނެގުމަށްފަހު އެ ކައިވެނި ރޫޅުމުން ވެސް އަންހެން މީހާއަށް ލޯނު ދައްކަން ޖެހުމެވެ.

އެހެންވެ، އެ ސިޔާސަތުތަކަށް ބަދަލު ގެންނަން ޖެހޭ ކަމަށް އޭނާ ވިދާޅުވި އެވެ.

އިކޮނޮމިކް މިނިސްޓްރީގެ އޯތެންޓިކް މޯލްޑިވްސްގެ ފިހާރައަށް ވަރަށް ގިނަ އަންހެނުންގެ އެފެއްދުންތައް ބާޒާރަށް ނެރެވުނަސް، އެ އަދަދާ މެދު ފައްޔާޒު ހިތްހަމަޖެހިވަޑައި ނުގަންނަވަ އެވެ.

"އެކަމަކު، ނިސްބަތުން ވަރަށް މަދު އެ އަދަދު. މިހާރު އަޅުގަނޑުމެންގެ ވިސްނުން މި ހުރީ ސަރުކާރުގެ ވަރަށް ބޮޑު އިންޓަވެންޝަނެއް އަންނަން ޖެހޭ ތާރީހީ ގޮތުން އޮތް ބޭއިންސާފުގެ ކަންކަން، އިގުތިސޯދީ ގޮތުން ވެސް ރަނގަޅުކުރަން،" ފައްޔާޒު ވިދާޅުވި އެވެ.

"އަޅުގަނޑަށް ހީވަނީ ގާނޫނީގޮތުން އައި ސިޔާސަތުތަކުގެ ތެރޭގައި ސިޔާސީ ކަންކަމާ އެއްޗިއްސަށް މި ގެނައި ބަދަލަކީ ހިސްޓްރޮކަލީ ވެސް ރަނގަޅުކުރުމަށް ކޯޓާ ސިސްޓަމް މި ދެނީ. ހަމަ އެގޮތުން އަޅުގަނޑުމެންނަށް ގަބޫލުކުރެވެނީ އިގުތިސޯދީ ކަންކަމުގައި ވެސް ސަރުކާރުގެ ބައިވެރިވުން ވަރަށް ބޮޑަށް އޮވެގެން އަންހެނުންނާއެކު ވަކި ހިސާބަކަށް ގެންދަން މަސައްކަތްކުރަންޖެހޭހެން،"

އޭނާ ވިދާޅުވީ އަންނަ މަހުގެ ތެރޭގައި އަންހެނުންގެ ކޮމިޓީތަކާއި ރަށު ކައުންސިލްތަކަށް އަމާޒުކޮށް ޕްރޮގްރާމްތަކެއް ފަށާނެ ކަމަށެވެ. އޭގައި ބަލާނީ، ފައްޔާޒު ވިދާޅުވި ގޮތުގައި، ކޮންމެ ރަށެއްގައި އަންހެނުންގެ ކޮމިޓީއާ ކައުންސިލަށް ރަނގަޅަށް އާމްދަނީ ލިބޭނެ ގޮތްތަކެވެ.

އެ މަސައްކަތް ކާމިޔާބު ވަންދެން ސަރުކާރުގެ ރޯލަކީ ކޮބައިކަން ބަލާނެކަން، ފާހަގަކުރެއްވި އެވެ.

"އެ ގޮތަށް އެ މަސައްކަތް ނުކޮށެއް، އަވަސް ގޮތަކަށް އިގުތިސޯދީ ބާރުވެރިކަން އަންހެން ބޭފުޅުންނަށް ލިބުމުގައި ގޮންޖެހުންތައް ހުންނާނެ. މި ހިސާބަށް ގެނެވިފައި ހުރި ސިޔާސަތުތަކުން އެންމެ އެދެވޭ ނަތީޖާއެއް ނުލިބޭ،"

ފައްޔާޒު ވިދާޅުވީ ސަރުކާރުން މަސައްކަތްކުރަނީ ރަށްރަށުގެ އިގުތިސޯދީ ހަރަކާތް ގެނައުމަށެވެ. އެގޮތުން، ރަށްރަށުގައި ފެނާއިނަރުދަމާ އަދި ކަރަންޓު ގާއިމްކުރުމަކީ ރައީސް އިބްރާހިމް މުހައްމަދު ސޯލިހުގެ އެންމެ މުހިއްމު އެއް ވައުދަށް ވާއިރު، އެކަންތައް ފުރިހަމަވުމުން އިގުތިސޯދީ ބައިވަރު ކަންކަން އައުމުގެ ފުރުސަތު އެ ރަށްރަށަށް އެބައޮތް ކަމަށް އޭނާ ވިދާޅުވި އެވެ.

"ރަށްރަށުގައި ޓޫރިޒަމަށް ކުރިއެރުން ލިބޭ. ލަފާ ފުރުމަށް ބަނދަރު އޮތީމަ އިގުތިސޯދީ ހަރަކާތް ކުރިއަށްދޭ. އާރުޓީއެލްއަކީ މި ޖަޒީރާ އިގުތިސޯދި އެއްކޮށް ބަދަލުކޮށްލާނެ ނިޒާމެއް،" ފައްޔާޒު ވިދާޅުވި އެވެ.