ހަނިމާދޫ އެއާޕޯޓާ އެކު ބަދަލުވާނީ މުޅި ސަރަހައްދުގެ ތަރައްގީ!

މީގެ 32 އަހަރު ކުރިން ހދ. ހަނިމާދޫ އެއާޕޯޓު ހުޅުވައި އެ ތަން 2012 ވަނަ އަހަރު އިންޓަނޭޝަނަލް ފެންވަރަށް ބަދަލުކުރުން ފިޔަވައި އެއާޕޯޓުގެ ތަރައްގީ އަށް އެއްވެސް ކަމެއް މިހާތަނަށް ކޮށްފައެއް ނުވެ އެވެ. ބަދަލުވީ ހަމައެކަނި ނަމެވެ. ހިދުމަތްތައް ހުރީ މީގެ 30 އަހަރު ކުރިއާ އެއްވަރެއްގައި، ސުމެއްގަ އެވެ.

އެކަމަކު، އެ ޝަކުވާތައް ނިމުމަކަށް ގެނެސް، މުޅި ތިލަދުންމަތި ބަދަލުކޮށްލާނެ ބިޔަ ބޮޑު މަޝްރޫއުގައި މިދިޔަ އާދިއްތަ ދުވަހުގެ ރޭ ވަނީ ސޮއިކޮށްފަ އެވެ.

އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވި ގޮތުގައި ހަނިމާދޫ އިންޓަނޭޝަނަލް އެއާޕޯޓުގެ ތަރައްގީ މަޝްރޫއަކީ ރާއްޖެއަށް މި ގެންނަ ބަދަލުގެ ވަރަށް ބޮޑު ބޮޅެއް ކަމަށެވެ. އެއާއެކު އިތުރު ސިނާއަތްތައް ތަރައްގީވެ، އުތުރުގެ ސަރަހައްދަށް އިންގިލާބީ ބޮޑު ބަދަލެއް އަންނާނެ ކަމަށް އޭނާ "މިހާރު" އަށް ވިދާޅުވި އެވެ.

"ވަރަށް އުއްމީދީ ކަންތައްތަކެއްގެ ބިންގާ އެޅިގެން މި ދަނީ،" ފައްޔާޒު ވިދާޅުވި އެވެ.

އެތަން ހަދަނީ އިންޑިއާގެ ލައިން އޮފް ކްރެޑިޓް ފެސިލިޓީގެ ދަށުން، ރާއްޖޭގައި ފްލެޓް އެޅުމާއި ފެނާއި ނަރުދަމާގެ އެކި މަޝްރޫތައް ހިންގާ ޖޭއެމްސީ ޕްރޮޖެކްޓްސް ކުންފުންޏާ ހަވާލުކޮށްގެންނެވެ.

އެ މަޝްރޫއު ނިމުމުން، ރާއްޖޭގައި މިހާރު ހުރި އެންމެ ބޮޑު އެއާޕޯޓު، ވެލާނާ އެއާޕޯޓާ ދާދި އެއްވަރެއް ވާނެ އެވެ.

ހަނިމާދޫ އެއާޕޯޓުގެ މައުލޫމާތު

- ވައިގެ ބަނދަރު ތަރައްގީއަށް 136 މިލިއަން ޑޮލަރު (ދެ ބިލިއަން ރުފިޔާ) ހަރަދުކުރާނެ

- އެތަން ހެދުމުން އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭނެ

- އޭ 320 އަދި ބޮއިން 737 ބޯޓު ޖެއްސޭނެ

- ދެ އަހަރުގެ ތެރޭގައި މަސައްކަތް ނިމޭނެ

އެއް އެއާޕޯޓެއްގެ ތަރައްގީއަށް މިހާ ބޮޑު ހަރަދެއް ކުރާތީ ސަރުކާރަށް ވަނީ ފާޑުކިޔުންތައް ވެސް އަމާޒުވެފަ އެވެ. ނަމަވެސް ފައްޔާޒު ވިދާޅުވި ގޮތުގައި، މިއީ އިންޓަނޭޝަނަލް ބިޑިންގައި ލިބުނު އެންމެ ކުޑަ ހުށަހެޅުން ކަމަށެވެ. މަޝްވަރާކޮށްގެން އަސްލު ހުށަހެޅި އަގަށް ވުރެ ވެސް ކުޑަކޮށްފައިވާ އޭނާ ވިދާޅުވި އެވެ.

ފައްޔާޒު ވިދާޅުވީ އެއާޕޯޓު ތަރައްގީކުރަނީ ދުބާއިން ވެސް ސީދާ ފްލައިޓު ޖެއްސޭގޮތަށް ކަމަށެވެ. އަދި ރަންވޭ ހަދަނީ ދުރު ގައުމުތަކުން ފްލައިޓުތައް ޖައްސާނަމަ ކުރިއަށް އޮތް 15-20 އަހަރުގެ ތެރޭގައި ރަންވޭ ބޮޑުކުރަން ޖާގަ ލާފައި ކަމަށް ވިދާޅުވި އެވެ.

ތިލަދުންމަތި ތަރައްގީކުރަން ޕްލޭންތަކެއް ހުއްޓަސް އެކަމަށް ހުރަސް އަޅަނީ ދަތުރުފަތުރުކުރުމުގައި ހުރި ގޮންޖެހުންތަކެވެ. އެކަމަށް ވެސް ފައްޔާޒު ދެއްވީ އުއްމީދީ ޖަވާބެވެ.

"އެއާޕޯޓާއެކު ތިލަދުންމަތީގެ ޓޫރިޒަމް ކުރިއަރައި، ޑައިރެކްޓް ފްލައިޓުތައް ދަތުރުކޮށް އަދި ނުހެދި ހުރި ރިސޯޓުތައް ހެދުމަށް ވެސް ފައިނޭންސްތަކެއް ލިބުމުގެ އުއްމީދު އާވާނެ. މިހާރު އެންމެ ބޮޑު މައްސަލައަކީ ފައިނޭންސް ނުލިބެނީ ވެސް ލޮޖިސްޓިކްސް ދަތިތަކާ ހެދި. މިހާރު އެތަން ހުޅުވައިގެން އުޅޭ މީހުންނަށް ވެސް އެ ދަތިތައް ކުރިމަތިވޭ،" އޭނާ ވިދާޅުވި އެވެ.

"ވަރަށް ބޮޑު ޕްރޮޖެކްޓެއް މިއީ އެއް ޕްރޮޖެކްޓަކަށް ބަލައިފިއްޔާ. މާލެއިން ބޭރުގައި ހިންގާ އެންމެ ބޮޑު ޕްރޮޖެކްޓް. އެރައިވަލް 1.3 މިލިއަން ފަސިންޖަރުންނަށް ވީމަ ވަރަށް ގިނަ ވަޒީފާތައް އިތުރުވެގެންދާނެ. އެކަމަކު ވަޒީފާ އިތުރުވާނީ ޓްރެފިކް ވެސް އިތުރުވާ ވަރަކަށް. ރަނގަޅު އަދަދެއްގެ ވަޒީފާ ސީދާ އެއާޕޯޓުން ވެސް އުފެދޭނެ. މާލޭގައި ވެސް އަނެއްކާ އެއާޕޯޓާ ގުޅިގެން އެކިއެކި ސިނާއަތް އުފެދިގެންދޭތާ، އެ ތަނުގައި [ހަނިމާދޫގައި] ވެސް ހަމަ އެހެން ވާނީ. އަދި ރިސޯޓުތަކުގެ ސަބަބުން ބައިވަރު ވަޒީފާ އުފެދިގެންދާނެ."

މިނިސްޓަރު ވިދާޅުވި ގޮތުގައި އަންނަ އަހަރުގެ ފަހުކޮޅާ ހަމައަށް ދާއިރު ރަންވޭ ނިމޭނެ އެވެ.

"ދިވެހިރާއްޖެ އަށް މި ގެންނަ ބަދަލުގެ ވަރަށް ބޮޑު ބޮޅެއް މި އެޅިގެން ދިޔައީ. އިގުތިސޯދީ ގޮތުން ވެސް އަދި އިޖުތިމާއީ ގޮތުން ވެސް، އެއީ ލާމަރުކަޒީ ސިޔާސަތުގެ ދަށުން ވަރަށް ބޮޑު ބޫސްޓެއް ލިބިގެންދާނެ މިކަންކަމުގެ ސީދާ ޕްރެކްޓިކަލީ އެއާޕޯޓު ހުޅުވުނީމަ އެ ނަތީޖާތައް ފެންނާނެ."

ފައްޔާޒު ވިދާޅުވީ އެއާޕޯޓުގެ މަސައްކަތް ކުރަން ފެށުމުން އެހެން މަޝްރޫއުތަކަށް ފެނިގެންދާނެ ކަމަށެވެ.

ދަތުރުފަތުރުގެ ބޮޑު ބަދަލު ފެންނާނެ

ރައީސް އޮފީހުގެ ޕޮލިސީ ސެކްރެޓަރީ އަހުމަދު ހަމްދާން ވިދާޅުވި ގޮތުގައި އުތުރުގެ ރަށްތަކަށް އެންމެ ބޮޑު ދައްޗަކާ ކުރިމަތިވަނީ ދަތުރުކުރުމުގައި ކަމަށެވެ. އެކަމަކު، ތަރައްގީގެ ޕްލޭންތަކާއެކު މުޅި ތިލަދުންމައްޗަށް އަންނަ ބަދަލުގެ މައި ގޭޓަކީ ހަނިމާދޫ އެއާޕޯޓަށް ވާނެ ކަމަށް އޭނާ ވިދާޅުވި އެވެ.

"އަސްލު ވަރަށް ބޮޑު އެކްސްޕެންޝަނަކަށް މި ދަނީ އެއާޕޯޓު ހުޅުވިގެންދާއިރު. ހަމައެއާއެކު، އާރުޓީއެލް މި ފަށަނީ. މިއީ ވަރަށް ވަށާޖެހޭ ގޮތަށް މިކަން މި ކުރަނީ. ވައިގެ ދަތުރުފަތުރާ އެކީގައި އާރުޓީއެލްގެ ނެޓްވޯކް ވެސް މި އޮތީ ތިލަދުންމަތީގައި ފެށިފައި. މިހާރު ފަތުރުވެރިންނަށް ވެސް ބޮޑު ތިލަދުންމަތީގެ ހުރިހާ ރަށަކަށް މިހާރު ދަތުރުކުރެވޭނެ އާރުޓީއެލް މެދުވެރިކޮށް،" ހަމްދާން ވިދާޅުވި އެވެ.

"މި ބުނާ ކަނެކްޓިވިޓީ ފުރިހަމަވަނީ ހަނިމާދޫ އެއާޕޯޓު، އިންޓަނޭޝަނަލް އެއާޕޯޓަށް ބަދަލުވެގެން. މިހާރު އިންޓަނޭޝަނަލް ކޮށްފައި އެ ހުރީ ނަމެއްގައި. އަސްލު ތަރައްގީއާ އެކީގައި އެއާޕޯޓު ފުލީފްލެޖު އިންޓަނޭޝަނަލް އެއާޕޯޓެއް ގޮތަށް އޮޕަރޭޓްކުރަން ފެށީމަ ކަނެކްޓިވިޓީ މި ފުރިހަމަކުރެވެނީ."

ބޮޑު ތިލަދުންމަތީގެ ސިއްހީ ނިޒާމް ޓާޝަރީ ފެންވަރަށް ބަދަލުކުރާއިރު، އޭގެ ފައިދާ ށ. އަތޮޅަށް ވެސް ކުރާނެ ކަމަށް އޭނާ ވިދާޅުވި އެވެ. އޭގެ އިތުރުން ދަތުރުފަތުރުކުރުމުގައި ގެންނަ ބަދަލުން ދަނޑުވެރިކަމާއި މަސްވެރިކަމުގެ ސިނާއަތް ކުރިއަރައިގެންދާނެކަން ހަމްދާން ފާހަގަކުރެއްވި އެވެ.

އޭގެ މިސާލެއްގެ ގޮތުން ނެންގެވީ، 500 މީހުން ވެސް ހަމަނުވާ ކުޑަކުޑަ ފިނޭ އެވެ.

އޭނާ ވިދާޅުވީ އެ ރަށަކީ ދަނޑުވެރިކަމާއި ޓޫރިޒަމަށް ވެސް ރަނގަޅު ރަށެއް ކަމަށެވެ. ފިނޭގައި ފެނާއި ނަރުދަމާ ނިޒާމް އެޅުމަށްފަހު، ދަތުރުފަތުރަށް ގެންނަ ބަދަލާއެކު އެކަން ފުޅާވެގެންދާނެ ކަމަށް އޭނާ ވިދާޅުވި އެވެ. އޭގެ އިތުރުން ހއ. އިހަވަންދޫގައި އަންނަ އަހަރު ހަދާ މަސް ފެކްޓްރީ ނިމުމުން ސީދާ ބޮޑު ތިލަދުންމަތިން ބޭރު ގައުމުތަކަށް މަސް އެކްސްޕޯޓު ކުރެވުމުން އިގުތިސޯދީ ހަރަކާތްތައް އިތުރުވާނެ ކަމަށް ވިދާޅުވި އެވެ.

"މި ހުރިހާ ކަމަކާއެކު ބޮޑު ތިލަދުންމައްޗަށް ވަރަށް ބޮޑު ބަދަލެއް އަންނާނެ."