ޑައުންޕޭމަންޓާ ނުލައި ކުރިއަށް ދާން އުނދަގޫ، އިތުރު އޮޕްޝަނެއް އެބަ ހޯދަން: އެމްޕީއެލް

އެމްޕީއެލްގެ ހައުސިން ސްކީމުގެ ދަށުން ފްލެޓް ލިބުނު މީހުންނަށް ޑައުންޕޭމަންޓާ ނުލައި، އެ ފްލެޓްތައް ހަވާލުކުރެވެން ނެތް ކަމަށާއި މުވައްޒަފުންނަށް އެ ފައިސާ ދެއްކުމަށް އިތުރު ލުއި ގޮތެއް ހޯދުމުގެ މަސައްކަތް ކުރަމުން އަންނަ ކަމަށް އެ ކުންފުނިން މިއަދު ބުނެފި އެވެ.

ފްލެޓް ލިބުނު 534 މީހުންގެ ތެރެއިން 484 މީހަކު ސޮއިކޮށް، ރައްޔިތުންގެ މަޖިލީހަށް ހުށަހެޅި ޕެޓިޝަނާ ގުޅިގެން ޕެޓިޝަން ކޮމިޓީން ބޭއްވި ބައްދަލުވުމުގައި އެ ކުންފުނީގެ ސީއީއޯ ޝާހިދު އަލީ އާއި ޗީފް ފައިނޭންސިން އޮފިސަރު މުހައްމަދު މުއިއްޒު ބައިވެރިވެވަޑައިގަތެވެ.

ޑިސެމްބަރު 28، 2017 ގައި ސޮއިކުރި އެއްބަސްވުމެއްގެ ދަށުން އެމްޕީއެލްގެ މުވައްޒަފުންނަށް ހާއްސަކޮށް ކުރިއަށް ގެންދާ އެ މަޝްރޫއާ ގުޅިގެން ޝާހިދު އެ ކޮމިޓީގައި ވިދާޅުވީ، އޭރު ކޮންޓްރެކްޓަރާ މަސައްކަތް ހަވާލުކޮށްފައި ވަނީ 566 މިލިއަން ރުފިޔާ އަށް ޑިޒައިން އެންޑް ބިލްޑް އުސޫލުގެ ދަށުން ކަމަށެވެ. ލޭންޑް އިކުއިޒިޝަން ކޮސްޓުގެ ގޮތުގައި އެޗްޑީސީ އަށް 52 މިލިއަން ރުފިޔާ ދައްކަން ޖެހޭއިރު، އެ ކުންފުނިން ނަގާފައިވާ އިންޑިޕެންޑެންޓް ކޮންސަލްޓަންޓުގެ އެއްބަސްވުމުގެ ދަށުން 1.29 މިލިއަން ރުފިޔާ ހޭދަވާ ކަމަށް ޝާހިދު ވިދާޅުވި އެވެ.

އޭނާ ވިދާޅުވި ގޮތުގައި އެ ކުންފުނިން ނަގާފައިވާ ލޯނުތަކަށް އަރާފައިވާ އިންޓްރެސްޓްގެ ގޮތުގައި 10.7 މިލިއަން ރުފިޔާ އާއި ފްލެޓަށް ގެންނަން ޖެހޭ އިތުރު ބަދަލުތަކެއްގެ ސަބަބުން 56 މިލިއަން ރުފިޔާ އަރާފައި އެބަ އޮތެވެ.

"ޑިޒައިން އެންޑް ބިލްޑް އުސޫލުން ކުރިއަށް ގެންދާ ޕްރޮޖެކްޓްތަކުގައި ވޭރިއޭޝަން މައްސަލަ އެބަ ދިމާވޭ. މިހާތަނަށް ފާހަގަކުރެވުނު ކޭބަލިން މައްސަލަ. ސީސީޓީވީ ކޭބަލް ނެތުމާއި ފައިބާ ނެޓްވޯކާއި ކޮރިޑޯތަކުގެ ތަންތަނުގައި އިތުރު ދޮރު ހަރުކުރަންޖެހޭ ކަން އެބަ އެނގޭ [އެ މަސައްކަތް ނިންމާފައި ބެލިއިރު] ވާރޭ ވެހޭތީ. ގިނަ ބަދަލުތަކެއް ގެންނަން ޖެހުނު. އެ ވޭރިއޭޝަންތަކަށް 56 މިލިއަން ރުފިޔާ އެރި،" ޝާހިދު ވިދާޅުވި އެވެ.

އެހެންވެ، ފްލެޓްގެ އަގަށް 688 މިލިއަން ރުފިޔާ މިހާތަނަށް އަރާފައިވާ ކަމަށް އޭނާ ވިދާޅުވި އެވެ.

"އެމްޕީއެލުން 488 މިލިއަން ރުފިޔާ ކޮންޓްރެކްޓަށް ހަރަދު ކޮށްފައިވޭ. ފައިސާ ހޯދީ މައިގަނޑު ގޮތެއްގައި ކުންފުނީގެ ކޭޝް ފްލޯ އިން. އޭގެ ސަބަބުން ސަރުކާރަށް ދައްކަންޖެހޭ ޑިވިޑެންޑް ދެއްކުމުގައި ލަސްތަކެއް އައިސްގެން މި އުޅެނީ. އަދި ލޯނުގެ ގޮތުގައި 110 މިލިއަން ނަގާފައިވޭ،" ޝާހިދު ވިދާޅުވި އެވެ.

އޭނާ ވިދާޅުވިގޮތުގައި ފްލެޓްގެ މައުލޫމާތު ހިމެނޭ ގޮތަށް އޭރު ކުންފުނިން ހެދި ލީފްލެޓްގައި ހިމެނޭ އަގުތަކަކީ ވޭރިއޭޝަން ކޮސްޓާއި އިންޓަރެސްޓް ކޮސްޓް ވެސް ނުހިމެނޭ ގޮތަށް ހަދާފައި ހުރި އަގުތަކެކެވެ.

އޭރު ފައިސާ ދެއްކުމަށް އެމްޕީއެލުން ދީފައިވަނީ އެއް ފަހަރާ ފައިސާ ދެއްކުމަށް ނުވަތަ ބޭންކް މެދުވެރިކޮށް ލޯނެއް ނަގައިގެން ފައިސާ ދެއްކުމަށެވެ.

އެކަމަކު 2019 ގައި ރައްޔިތުންގެ މަޖިލީހުގެ ކޮމިޓީ އަށް ހާޒިރުކޮށް، ގައުމީ ބޯހިޔާވަހިކަމުގެ ސިޔާސަތާ އެއްގޮތަށް ފްލެޓް ދޭން އެންގި ކަމަށާއި އެހެންވެ ކްރައިޓީރިއާ އާ ކުރަން ޖެހުނު ކަމަށް ޝާހިދު ވިދާޅުވި އެވެ.

"އަލުން އިއުލާންކޮށްގެން، އަލުން އެޕްލިކޭޝަން ޕްރޮސެސް ކުރިއަށް ގެންދިޔައީ. ބުކިން ފީއެއް ނަގައި ޑައުންޕޭމަންޓް އެގްރީމަންޓުގައި ސޮއިކުރަން މި ވަނީ ފެށިފައި،" އޭނާ ވިދާޅުވި އެވެ.

މާލީ ދަތިކަމާ ހުރެ ޑައުންޕޭމަންޓް ނުނަގައި ވާކަށް ނެތް

ޝާހިދު ވިދާޅުވީ، ކުރީގެ ރައީސް އަބްދުﷲ ޔާމީންގެ ސަރުކާރުން އެއްފަހަރާ ފައިސާ ދެއްކުމުގެ އޮޕްޝަން ދީފައި އޮތަސް ކުންފުނީގެ މުވައްޒަފުންނަށް އެ ވަރުގެ މުސާރައެއް ނުލިބޭތީ، އެކަން ނުކުރެވޭނެކަން އެނގިވަޑައިގަންނަވާ ކަމަށެވެ.

"އެހެންވެ މެނޭޖްމަންޓާއި ބޯޑާ މަޝްވަރާ ކޮށްފައި ނިންމީ 20 ޕަސެންޓްގެ ޑައުންޕޭމަންޓެއް ނަގާފައި 20 އަހަރަށް ބަހާލައިގެން ދެއްކޭ ގޮތަށް އެމްޕީއެލްގެ ސްކީމެއް ހެދީ،" އޭނާ ވިދާޅުވި އެވެ.

އެކަމަކު އެ ގެނައި ބަދަލާ ގުޅިގެން ވެސް ފައިސާ ދެއްކުމުގައި ދަތިވާ ކަމަށް ބުނެ ކުންފުނީގެ މުވައްޒަފުންގެ ފަރާތުން ސިޓީއެއް ލިބުނު ކަމަށާއި އެކަމާ ގުޅިގެން ރައީސް އޮފީހާ ވެސް މައުލޫމާތު ހިއްސާކޮށް، އިތުރު އޮޕްޝަންތަކެއް ތައާރަފުކުރި ކަމަށް ވިދާޅުވި އެވެ.

އެއީ ކުރިން 20 ޕަސެންޓްގެ ބަދަލުގައި 15 ޕަސެންޓްގެ ޑައުންޕޭމަންޓަކަށް ކުޑަކޮށް 20 އަހަރަށް ބަހާލައިގެން ދެއްކުމާއި 50،000ރ. ގެ ޑައުންޕޭމަންޓެއް ދައްކައި ބާކީ ބައި 20 އަހަރަށް ބަހާލައިގެން ކުރިއަށް ގެންދިއުމެވެ.

"ގިނަ މުވައްޒަފުންނަކީ ފައިނޭންޝަލް އިންސްޓިޓިއުޓަކަށް ވަދެގެން، އެ ތަނެއްގެ ކްރެޑިޓް ވޯތިނަސް ކްރައިޓީރިއާ އަށް ނުފެތޭނެ މުވައްޒަފުންކަން އަޅުގަނޑުމެންނަށް އެނގޭ. އެއީ ހުރިހާ ތަނެއްގައި ވެސް މަންތްލީ އިންކަމް އެކަށީގެންވާ ވަރަކަށް ބޮޑުވުން،" ޝާހިދު ވިދާޅުވި އެވެ.

އޭނާ ވިދާޅުވި ގޮތުގައި ފްލެޓް ލިބުނު މީހުންގެ އަތުން ޑައުންޕޭމަންޓް ނަގަން ޖެހޭ ސަބަބަކީ މަސައްކަތް ނިމުމުން ކޮންޓްރެކްޓަރަށް 82 މިލިއަން ރުފިޔާ ތިން މަސް ދުވަހުގެ ތެރޭގައި ދައްކަން ޖެހޭތީ އެވެ. އަދި އެޗްޑީސީ އަށް 52 މިލިއަން ރުފިޔާ ދައްކަން ޖެހޭއިރު، އެ ފައިސާ ހޯދުމަށް ޑައުންޕޭމަންޓް ނަގަން ޖެހޭ ކަމަށް ޝާހިދު ގަބޫލުކުރައްވަ އެވެ.

އޭނާ ވިދާޅުވީ އެ ކުންފުނީގެ އެންމެ ޕްރައިމަރީ މަސައްކަތަކީ ބަނދަރުތައް ހިންގައި އިމްޕޯޓްކުރެވޭ މުދާތައް ކްލިއާ ކުރުން ކަމަށެވެ. އެ މަސައްކަތްތައް ކުރަން ބޭނުންކުރާ ޓަގުތަކާއި ކޮންޓެއިނަރާއި ފޯކްލިފްޓްތަކާއި އިތުރު ސާމާނުތައް ވެސް ވަރަށް ގިނަ ދުވަސްވެ، އާ ކުރަން ޖެހިފައިވާއިރު އެއީ ކޮންމެހެން ކުރަންޖެހޭ ކަމެއް ކަމަށް އޭނާ ވިދާޅުވި އެވެ.

"2019 އިން ފެށިގެން އެ މަސައްކަތްތައް [އިކުއިޕްމަންޓް އާކުރުން] ކުރަމުން މި ދަނީ،" ޝާހިދު ވިދާޅުވި އެވެ.

އޭނާ ވިދާޅުވީ ސާމާނުތައް އާ ކުރުމަށް ނެގި ލޯނުގެ އެއްބައި ބަދަލުކުރަން ޖެހުނީ ފްލެޓްތަކުގެ މަސައްކަތަށް ކަމަށެވެ.

"އެ ލޯނުގެ އެއްބައި ޑައިވާޓްކުރަން ޖެހުނީ ހަމަ މި ފްލެޓަށް. ޕޭމަންޓް ލަސްވެއްޖެއްޔާ ކޮންޓްރެކްޓް ދިގުލައިގެންގޮސް އަގަށް ބަދަލު އައިސް ލިބޭ މީހުންނާއި ކުންފުންޏަށް ވެސް ދަތިވާނެތީ،"

އެ ކުންފުނިން ބްރޯވިން ލިމިޓެއް ގެންގުޅޭ ކަމަށާއި އެ ފްލެޓްތަކުން ޑައުންޕޭމަންޓެއް ނުނަގައިފި ނަމަ، އަނެއްކާ ވެސް ބޮރޯކުރަން ޖެހޭނެ ކަމަށް ޝާހިދު ވިދާޅުވި އެވެ.

"އެހެން ބޮރޯކޮށްފިއްޔާ މިހާރު ކުރަން ހުރި ހަރަދުތަކަށް ބޮޑު ގޮންޖެހުމެއް ކުރިމަތިވާނެ. މިހާރު ހޯދަންޖެހޭ ޓަގުތަކާއި ބާޖުތައް ކަހަލަ އެއްޗެހި ހޯދުން ލަސްވެއްޖިއްޔާ ކުރިއަށް އޮތް ތަނުގައި ރާއްޖެ އަށް އަންނަން އޮތް ކާގޯ ވޮލިއުމަށް ބަލަންޏާ ކޮންޖެސްޓްވެ، ރާއްޖޭގެ އިގްތިސޯދަށް އޭގެ އަސަރު ފޯރާނެ،" ޝާހިދު ވިދާޅުވި އެވެ.

އެހެންވެ، އެމްޕީއެލުން މަސައްކަތް ކުރަނީ ޑައުންޕޭމަންޓް ނެގުމަށް ފަހު، ލުއި އޮޕްޝަންތަކެއް ހޯދައިދިނުމަށް ކަމަށާއި ދެ ފަރާތަށް ވެސް ލުއިވާނެހެން ކަންކަން ރާވާ ކަމަށް ޝާހިދު ވިދާޅުވި އެވެ.

ޕެޓިޝަން ކޮމިޓީގައި ޕެންޝަން އޮފީހުގެ ފަރާތުން ބައިވެރިވެވަޑައިގެންނެވި އެ އޮފީހުގެ ސީއޯއޯ ސުޖާތާ ހަލީމް ވިދާޅުވީ ލޯނެއް ނަގާ ނަމަ، ޕެންޝަން ގާނޫނަށް ގެނެސްފައިވާ އިސްލާހުގެ ދަށުން ޕެންޝަނުގައި ހުންނަ ފައިސާ ރަހުނު ކުރުމުގެ ފުރުސަތު ލިބޭނެ ކަމަށެވެ.

އެހެންކަމުން، މުވައްޒަފުން ބޭނުން ނަމަ، އެ ފުރުސަތު ގާނޫނުން ލިބޭކަން އޭނާ ފާހަގަކުރެއްވި އެވެ.

އެ މައްސަލައާ ގުޅިގެން އިތުރަށް މަޝްވަރާކޮށް، އިތުރު ލުއި އޮޕްޝަންތަކެއް ހޯދުމަށް މަސައްކަތްކުރާ ކަމަށް ކުންފުނިން ބުނެ އެވެ.

އެމްޕީއެލްގެ ފްލެޓްތަކުގެ ކުލި

ސްޓޫޑިއޯ އެޕާޓްމަންޓް - 4585ރ.

2+1 އެޕާޓްމަންޓް - 8597ރ.

އެ ކުލީގެ އިތުރުން ކުރިން އެ ކުންފުނިން ނިންމާފައި އޮތީ 2+1 އެޕާޓްމަންޓުން ސާވިސް ފީ އަށް 1،500ރ. އަދި ސްޓޫޑިއޯ އެޕާޓްމަންޓަށް 1،000ރ. ގެ ސާވިސް ފީއަށް ނަގާ ގޮތަށެވެ. އެކަމަކު މުވައްޒަފުންގެ ކަންބޮޑުވުންތަކާއި ގުޅިގެން 1،200ރ. އަދި 900 އަށް އެ ފީ ވަނީ ކުޑަކޮށްފަ އެވެ.

އޭގެ އިތުރުން ކުންފުނިން ބުކިން ފީ އަށް ނެގި 5،000ރ. ގެ ޑައުންޕޭމަންޓްގެ އެންމެ ފަހު އިންސްޓޯލްމަންޓުން ކަނޑާލާނެ ކަމަށް ވެސް އެމްޕީއެލުން ބުނެ އެވެ.

އެ ކުންފުނީގެ އެއް ކޮޓަރީގެ 204 ފްލެޓާއި ތިން ކޮޓަރީގެ 330 ފްލެޓަށް އަންނަ އަހަރުގެ ކުރީކޮޅު ވަދެވޭނެ ކަމަށް ބުނެފައި ވެ އެވެ.