އެމްއެންޔޫ އިން ޑިމޮކްރަސީ ދުވަހާ ގުޅުވައިގެން ހާއްސަ ފެސްޓިވަލެއް ބާއްވައިފި

މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) އިން ޑިމޮކްރަސީ ދުވަސް ފާހަގަކުރުމުގެ ގޮތުން ހާއްސަ ފެސްޓިވަލެއް ބާއްވައިފި އެވެ.

ބައިނަލްއަގްވާމީ ޑިމޮކްރަސީ ދުވަހާ ގުޅުވައިގެން އިއްޔެ ކުރިއަށް ދިޔަ "ޑިމޮކްރަސީ ޑޭ ފެސްޓިވަލް" އިންތިޒާމްކޮށްފައި ވަނީ އެމްއެންޔޫ އިން ޕޮލިޓިކަލް ސައިންސް އަދި އިންޓަނޭޝަނަލް ރިލޭޝަންސް ކިޔަވަމުން އަންނަ ދަރިވަރުންނެވެ.

ސެންޓްރަލް އެމްއެންޔޫގައި ކުރިއަށް ދިޔަ އެ ފެސްޓިވަލްގެ މަގްސަދަކީ ޑިމޮކްރަސީ ދުވަސް ފާހަގަކުރުމާއެކު ދުވަހާ ގުޅޭ އަދި ޑިމޮކްރަސީއާ ބެހޭ މައުލޫމާތު ދީ އެކަންކަމަށް ހޭލުންތެރިކަން އިތުރުކުރުމެވެ.

އެ ފެސްޓިވަލް ކުރިއަށް ދިޔައީ އެކި ކަހަލަ ކުޅިވަރުތަކާއެކު ޑިމޮކްރަސީ ދުވަހާ ގުޅޭ މައުލޫމާތު ހިއްސާކުރުމަށް ހާއްސަކޮށްފައިވާ ތަފާތު ސްޓޯލްތަކާއި އަދި ދުވަހާ ގުޅޭ ހާއްސަ ޕެނަލް ޑިސްކަޝަނަކާ އެކު އެވެ. އެ ޕެނަލްގާއި ދާއިރާގެ ފަންނީ ތިން ބޭފުޅުން ވަނީ މައުލޫމާތު ދެއްވައިފަ އެވެ.

އިއްޔެގެ ފެސްޓިވަލްގައި ސްޓޯލްތައް ކުރިއަށް ދިޔައީ މެންދުރު 12:00 އިން ހަވީރު 3:00 އަށް އަދި އިރުއޮއްސި 6:00 އިން ރޭގަނޑު 9:00 އަށެވެ. އަދި ޕެނަލް ޑިސްކަޝަން ކުރިއަށް ދިޔައީ ހަވީރު 4:00 އިން 5:00 އަށް އެމްއެންޔޫ އޭ ބްލޮކް އޮޑިޓޯރިއަމްގަ އެވެ.

އިވެންޓް އިންތިޒާމްކުރުމުގައި އުޅުނު އެމްއެންޔޫގެ ދަރިވަރު ފާތިމަތު ރާއިއާ ޝަރީފް ކިޔައިދިން ގޮތުގައި، މި ފެސްޓިވަލްގެ ބައިވެރިންނަށް ޑިމޮކްރަސީއަކީ ކޮބައިކަމާއި އެއާގުޅޭ ވަރަށް ގިނަ މައުލޫމާތު ލިބިގެންދިޔަ އެވެ.

"ފެސްޓިވަލްގެ ކުރިން އަޅުގަނޑުމެން ޔުނިވަސިޓީގެ ވަރަށް ގިނަ ކްލާސްތަކަށް ވަދެ އެހިން ޑިމޮކްރަސީ އަކީ ކޮބައިތޯ. އެކަމު ޕޮލިޓިކަލް ސައިންސް ކިޔަވާ ދަރިވަރުން ނޫން ދަރިވަރުންގެ ތެރެއިން ޖަވާބުދޭން އިނގުނީ ދެތިން ކުއްޖަކަށް،" ރާއިއާ ބުންޏެވެ.

މިފަދަ ސަބަބުތަކަށްޓަކައި ޑިމޮކްރަސީ ދުވަހާ ގުޅޭ މައުލޫމާތާއި ޑިމޮކްރަސީއާ ބެހޭގޮތުން މީހުން ދައްކާ ވާހަކަތަކުގެ ތެދުދޮގު ފެސްޓިވަލްގެ ބައިވެރިންނަށް އޮޅުންފިލުވޭނެ ކަމަށް ރާއިއާ ބުންޏެވެ.

"ފެސްޓިވަލްގެ ބައިވެރިންގެ ތެރެއިން ކޮންމެ މީހަކަށް ވެސް ޑިމޮކްރަސީއާ ގުޅޭގޮތުން އެމީހެއްގެ ހިތުގައި އުފެދިފައިވާ ސުވާލެއް ކުރުމުގެ ފުރުސަތު ލިބިގެން ދިޔަ،" ރާއިއާ ކިޔައިދިނެވެ.

އޭނާ ބުނިގޮތުގައި، އިއްޔެގެ ފެސްޓިވަލަށް އުންމީދުކުރި ވަރަށް ވުރެ ބޮޑު ތަރުހީބެއް ބައިވެރިންގެ ފަރާތުން ލިބިގެން ދިޔަ ކަމަށެވެ. އަދި އެ ފެސްޓިވަލް ބޭއްވުމަށް އެހީތެރިވެދިން ހުރިހާ ފަރާތްތަކަށް ރާއިއާ ވަނީ ޝުކުރުއަދާކޮށްފަ އެވެ.

އިއްޔެގެ ފެސްޓިވަލްގައި އެމްއެންޔޫގެ ބައެއް އިސްވެރިންނާއި، ލެކްޗަރާއިންނާއި މުވައްޒަފުން އަދި ގިނަ އަދަދެއްގެ ދަރިވަރުންނާއި އާންމުންގެ މީހުން ވެސް ވަނީ ބައިވެރިވެފަ އެވެ.

ބައިނަލްއަގްވާމީ ޑިމޮކްރަސީ ދުވަހަކީ ކޮންމެ އަހަރެއްގެ ސެޕްޓެމްބަރު މަހުގެ 15 ވަނަ ދުވަހެވެ. 2007 ވަނަ އަހަރުން ފެށިގެން ދުނިޔޭގެ އެކި ގައުމުތަކުގައި މިދުވަސް އަންނަނީ ކުލަގަދަގޮތެއްގައި ފާހަގަކުރަމުންނެވެ.