ފައިނޭންޝަލް ކޮންޓޯލަރުގެ މަގާމަށް އާޒާދު އައްޔަންކުރައްވައިފި

ފައިނޭންޝަލް ކޮންޓްރޯލަރުގެ މަގާމަށް، ފިނޭންސް މިނިސްޓްރީގެ އެސްއޯއީ ފައިނޭންޝަލް ކޮންސަލްޓަންޓުގެ މަގާމު ފުރުއްވި، މުހައްމަދު އާޒާދު މިއަދު އައްޔަންކުރައްވައިފި އެވެ.

ރައީސުލްޖުމްހޫރިއްޔާ، ފައިނޭންޝަލް ކޮންޓްރޯލަރުގެ މަގާމަށް އާޒާދު އައްޔަންކުރެއްވީ އެ މަގާމުގައި ހަ އަހަރު ހޭދަކުރެއްވުމަށް ފަހު އިއްޔެ ފާތިމަތު ރަޒީނާ އިސްތިއުދާ ދެއްވުމާ ގުޅިގެންނެެވެ.

އާޒާދަކީ ސީއެފްއޭ ޗާޓާ ހޯލްޑާއެއްގެ އިތުރުން ބިޒްނަސް އެޑްމިނިސްޓްރޭޝަން ދާއިރާއިން ބެޗްލާސް ޑިގްރީއަކާއި ސައިންސް އިން ފައިނޭންސް ދާއިރާއިން މާސްޓާ ހާސިލުކުރައްވާފައިވާ ބޭފުޅެކެވެ.

ކުރިން އޭނާ ވަނީ، ފިނޭންސް މިނިސްޓްރީގެ އެސްއޯއީ ރިފޯމް ކޮންސަލްޓަންޓެއްގެ ވަޒީފާ އާއި ހަޒާނާ މޯލްޑިވްސްގެ އެކައުންޓް އެންޑް ފައިނޭންސްގެ އިސްވެރިޔާގެ ގޮތުގައި ވެސް މަސައްކަތްކުރައްވައިފަ އެވެ. އަދި އެންޓި ކޮރަޕްޝަން ކޮމިޝަނުގެ އިންޓެލިޖެންސް ޑިޕާޓްމަންޓުގެ އިސްވެރިޔާގެ އިތުރުން މޯލްޑިވްސް އިސްލާމިކް ބޭންކްގެ ބޯޑު މެމްބަރުކަން ވެސް ކުރެއްވި އެވެ.

ފައިނޭންޝަލް ކޮންޓްރޯލަރަކީ ދައުލަތުގެ ފައިސާ އާއި ހިސާބާއި ހިސާބުގެ ލިޔެކިޔުންތަކުގެ ނިޒާމު އޮޑިޓާ ޖެނަރަލް ކަނޑައަޅާ ގޮތެއްގެ މަތިން ބަލަހައްޓަވާ ފަރާތެވެ. ދައުލަތަށް މުދާ ގަތުމާއި ރައްކާތެރިކަމާ އެކު ބެލެހެއްޓުމާއި ވިއްކައި ނައްތާލަނީ ދައުލަތުގެ މާލިއްޔަތު ގަވާއިދާ އެއްގޮތަށްތޯ ބެލުމަކީ ވެސް އެ މަގާމުގެ މަސްއޫލިއްޔަތެކެވެ.

ދައުލަތަށް ލިބޭ އާމްދަނީގެ ހިސާބުތައް ގަވާއިދުން ބެލެހެއްޓުމާއި ދައުލަތަށް ބޭނުންވާ ފައިސާ ހޯދޭނެ ނިޒާމެއް ގާއިމުކުރުމުގެ އިތުރުން ސަރުކާރުގެ އޮފީސްތަކާއި ދައުލަތުގެ މުދަލާއި ފައިސާގެ ހިސާބު ބެލެހެއްޓޭނެ ހަރުދަނާ ނިޒާމެއް ގާއިމުކުރުމާއި ކޮންމެ މާލީ އަހަރެއް ނިމޭތާ ތިން މަސް ދުވަހެއްގެ ތެރޭގައި އެ އަހަރެއްގެ ދައުލަތުގެ އަހަރީ ހިސާބުތައް އޮޑިޓާ ޖެނަރަލް ކަނޑައަޅާ ގޮތެއްގެ މަތިން ތައްޔާރުކޮށް މިނިސްޓަރަށް ހުށަހެޅުމަކީ ވެސް އެ މަގާމުގެ ޒިންމާ އެކެވެ.

ފައިނޭންޝަލް ކޮންޓްރޯލަރުގެ މަގާމުގައި ކުރިން ހުންނެވި ރަޒީނާ މަގާމުން އިސްތިއުފާ ދެއްވީ ފައިނޭންސާއި އެކައުންޓިން ދާއިރާއިން ރާއްޖެއިން ބޭރުގައި ޕީއެޗްޑީއަށް ކިޔެވުމަށެވެ. އޭނާ މަގާމަށް އައްޔަންކުރެއްވީ ޖުލައި 5، 2016 ގަ އެވެ.