ވަރުން އާއި ކްރިތީގެ "ބޭޅިޔާ" ގެ ޓީޒާއެއް

ބޮލީވުޑްގެ ތަރި، ވަރުން ދާވަން އާއި ކްރިތީ ސަނޮންގެ ކުރިއަށް އޮތް ފިލްމު "ބޭޅިޔާ" ގެ ޓީޒާ އާންމުކޮށްފި އެވެ.

"މެޑްޑޮކްސް ފިލްމްސް" ގެ ކުރިއަށް އޮތް ފިލްމު "ބޭޅިޔާ" އަކީ ބިރުވެރި މަޖާ ފިލްމެކެވެ. ކުރިން މެޑްޑޮކްސް ފިލްމްސް އިން ވަނީ ބިރުވެރި ދެ ފިލްމު ކަމަށްވާ "ސްތްރީ" އާއި "ރޫހީ" ވެސް ނެރެެފަ އެެވެ.

ފިލްމުގެ ޓީޒާ އިއްޔެ އާންމުންނަށް ދޫކޮށްލާފައިވާއިރު، އެ ފިލްމުގެ ޓްރެއިލާ ނެރޭނީ ވަރުންގެ ފިލްމީ ހަޔާތަށް 10 އަހަރު ފުރޭ ދުވަހު އެވެ. އެއީ މި މަހުގެ 19 އެވެ.

ފިލްމުގެ މަންޒަރުތައް ނަގާފައި ވަނީ އިންޑިއާގެ އަރުނަޗަލް ޕްރަދޭޝްގަ އެވެ. ކުރު ޓީޒާއެއް އާންމު ކޮށްފައިވީ ނަމަވެސް ލީޑު އެއްވެސް ތަރިއެއްގެ މޫނެއް ނުފެނެ އެވެ. ފެންނަނީ ޖަންގަލީގައި ބަޔަކު މީހުން ތިބޭ ތަނާއި އިންސާނުން ވެސް ޝިކާރަކުރާނެ ކަމަށް ބުނާ މަންޒަރެކެވެ.

އަމަރު ކޯޝިކް ޑައިރެކްޓްކުރާ އެ ފިލްމު ނެރޭނީ އަންނަ މަހުގެ 25 ގަ އެވެ. އެ ފިލްމުގައި ވަރުން ފެންނަނީ މީގެ ކުރިން އޭނާ ފެނިގެން ނުދާ ކަހަލަ ރޯލަކުންނެެވެ. އޭނާ އާންމުކޮށް ފެންނަނީ މަޖާ ރޯލުތަކުންނެވެ.