ރާއްޖޭގެ ބޯޑާ މެނޭޖްމަންޓް ސްޓްރެޓެޖީގެ ފުރަތަމަ ޑްރާފްޓް ނިމިއްޖެ: ޑިފެންސް

ރާއްޖޭގެ ބޯޑަރު ބެލެހެއްޓުމުގެ މަސައްކަތް އިތުރަށް ހަރުދަނާ ކުރުމުގެ މަގުސަދުގައި އެކުލަވައިލަމުން އަންނަ އިންޓަގްރޭޓެޑް ބޯޑާ މެނޭޖްމަންޓް ސްޓްރެޓެޖީގެ ފުރަތަމަ ޑްރާފްޓް ނިމިފައިވާ ކަމަށް ޑިފެންސް މިނިސްޓްރީން މިއަދު ބުނެފި އެވެ.

އެ މިނިސްޓްރީން އެކަން އިއުލާންކުރީ، ރާއްޖޭގެ ބޯޑާ ސެކިއުރިޓީ ބެލެހެއްޓުމުގައި ދިމާވާ މައްސަލަތަކާ ގުޅޭގޮތުން ކަމާބެހޭ އިދާރާތަކުން މަޝްވަރާ ކުރުމަށް ބާއްވާ ފުރަތަމަ "މޯލްޑިވްސް ބޯޑާ ސެކިއުރިޓީ ސިމްޕޯޒިއަމް" ގައި އިއްވި ޑިފެންސް މިނިސްޓަރު މާރިޔާ އަހުމަދު ދީދީގެ ބަޔާނުގަ އެވެ. އޭނާގެ ފަރާތުން އެ ބަޔާން އިއްވެވީ ޑިފެންސްގެ ޑެޕިއުޓީ މިނިސްޓަރު ހަސަން ޒަމީލް އެވެ.

މާރިޔާ ވިދާޅުވީ އެ މަސައްކަތް ފެށީ ރާއްޖޭގެ މިހާރުގެ ހާލަތަށް ބަލައި އެފަދަ ރަނގަޅު ސްޓްރެޓެޖީއެއް އޮތުން ވަރަށް މުހިންމު ކަމެއް ކަމަށް ފެންނާތީ ކަމަށެވެ.

އެ ސްޓްރެޓެޖީގެ އެހީގައި ކަމާގުޅޭ ގޮތުން ހެދިފައި ހުރި ރާއްޖޭގެ ގާނޫނުތަކާއި ގަވާއިދުތަކުގައި ހުރި މައްސަލަތައް އިސްލާހުކުރެވޭނެ ކަމަށް ވިދާޅުވި އެވެ. ދަތުރުކުރާ މީހުންނާއި ބިދޭސީންނާ ގުޅޭ މައްސަލަތަކާއި އެމީހުންގެ ސިއްހަތާ ގުޅޭ ކަންކަމާއި އިދާރާތައް ގުޅިގެން މަސައްކަތްކުރުމުގައި ދިމާވާ ހުރަސްތަކާއި އަދި އެ ދާއިރާއިން މީހުން ތަމްރީނުކުރުމުގައި ދިމާވާ މައްސަލަތައް ކަހަލަ އެތައް ކަމެއް ހައްލުކުރަން އެ ސްޓްރެޓެޖީ އަކީ ބޮޑު އެހީއަކަށް ވާނެ ކަމަށް މާރިޔާ ވިދާޅުވި އެވެ.

ކަމާގުޅޭ ގޮތުން ހެދިފައިވާ ގާނޫނާއި ގަވައިދުތައް އިސްލާހުކުރުމަށް މަޝްވަރާކުރުމާއި ދަތުރުވެރިންގެ ކަންތައްތަކާއި އެމީހުންގެ ސިއްހީ ކަންކަމާއި ބޯޑަރާއި ގުޅުންހުރި އެހެނިހެން މައްސަލަތަކުގެ އިތުރުން އައިޓީ ހިދުމަތްތައް ބެހިފައިވާ ގޮތްގޮތުގެ ގާނޫނާއި ގަވައިދުތަކަށް މަޝްވަރާކޮށް އަދި އެފަދަ ކަންކަމަށް ގެންނަން ޖެހޭ އިސްލާހުތައް ގެނައުމަށް އެ ސްޓްރެޓެޖީ އަކީ ބޮޑު އެހީއަކަށް ވާނެ ކަމަށް މާރިޔާ ވިދާޅުވި އެވެ.

"މިކަމުގެ ސަބަބުން މުއާސަލާތީ ކަންކަމާއި ސްޓާފުން ތަމްރީނުކުރުމާއި ބޯޑަރު ބެލެހެއްޓުމާއި ބޯޑަރުގެ މަސައްކަތްތަކާއި އަދި އިންޓަ-އޭޖެންސީގެ ގަވައިދުތަކަށް ވެސް އިސްލާހުތައް ގެނެވޭނެ،" އޭނާ ވިދާޅުވި އެވެ.

"އަޅުގަނޑު ވަރަށް އުފަލާއެކު ފާހަގަކުރަން މި ސްޓްރެޓެޖީގެ ފުރަތަމަ ޑްރާފްޓް މިހާރު ވަނީ ނިމިފައި."

އެ ޑްރާފްޓްއާ ގުޅޭގޮތުން ބޯޑާ ސެކިއުރިޓީއާ ގުޅޭ އިދާރާތަކާ މަޝްވަރާކުރުމަށް ފަހު ކަމާބެހޭ އެހެން އިދާރާތަކަށް ހިއްސާކުރެވޭނެ ކަމަށް ވެސް ވިދާޅުވި އެވެ. އަދި އަމާޒަކީ އަންނަ މަހުގެ ފަހުކޮޅު ކަމާގުޅޭ ހުރިހާ އިދާރާއަކާ އެކު އެ ޑްރާފްޓްއާ ގުޅޭގޮތުން މަޝްވަރާކުރުމަށް ބައްދަލުވުމެއް ބޭއްވުން ކަމަށް ވެސް މާރިޔާ ވިދާޅުވި އެވެ.

އެ ސްޓްރެޓެޖީ އަކީ ރާއްޖޭގެ ނޭޝަނަލް ސެކިއުރިޓީ އާއި އިގުތިސާދީ ކުރިއެރުމާއި އާންމުންގެ ސިއްހަތާއި ރައްކާތެރިކަން ކަށަވަރުކުރުމުގައި މުހިންމު ރޯލެއް އަދާކުރާނެ އެއްޗެއް ކަމަށް އޭނާ ވިދާޅުވި އެވެ. އަދި ރާއްޖޭގެ ބޯޑާ މެނޭޖްމަންޓްއާ ގުޅޭ ކަންކަން ހަރުދަނާކޮށް، ބައިނަލްއަގުވާމީ މިންގަނޑުތަކާ އެއްގޮތަށް މަސައްކަތް ކުރުމަށް މަގުފަހިވެގެން ދާނެ ކަމަށް ވެސް ވިދާޅުވި އެވެ.

މާރިޔާ ވިދާޅުވީ މިއަދާއި މާދަމާ އޮންނަ "މޯލްޑިވްސް ބޯޑާ ސެކިއުރިޓީ ސިމްޕޯޒިއަމް"ގައި މަޝްވަރާ ކުރެވޭ ކަންކަމަކީ ވެސް އެ ސްޓްރެޓެޖީ ހަރުދަނާކުރުމަށް ވަރަށް ބޮޑު އެހީއަކަށް ވާނެ ކަމަށެވެ.

"މޯލްޑިވްސް ބޯޑާ ސެކިއުރިޓީ ސިމްޕޯޒިއަމް"ގައި އިމިގްރޭޝަނާއި އެމްއެންޑީއެފާއި ފުލުހުންނާއި ކަސްޓަމްސް އަދި އޭވިއޭޝަން ސެކިއުރިޓީ ކޮމާންޑުގެ އިސްވެރިން ބައިވެރިވެވަޑައިގަންނަވަ އެވެ. އަދި އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އާއި އދ. ގެ ޑްރަގް އެންޑް ކްރައިމް އޮފީސް (ޔޫއެންއޯޑީސީ)ގެ އޮފިޝަލުން ވެސް އެ ބައްދަލުވުމުގައި ބައިވެރިވެވަޑައިގަންނަވަ އެވެ.