އެތައް ބަޔަކާ އެކު ޑިޒްނީލޭންޑް ތަޅުލައިފި

ކޮވިޑް-19 ފެތުރުން ކޮންޓްރޯލް ކުރުމުގެ ގޮތުން ޝަންހާއީ ފުރަބަންދުކުރުމަށް ޗައިނާ ސަރުކާރުން ނިންމުމާ ގުޅިގެން، އެ ސަހަރުގައި ހުންނަ ޑިޒްނީ ރިސޯޓް އިއްޔެ ކުއްލިއަކަށް ބަންދުކުރުމުން، އެ ތަނުން ނުނިކުމެވި އެތައް ބަޔަކު އެތަނުގެ އެތެރޭގައި ތާށިވެއްޖެ އެވެ.

ޝަންހާއީ ފުރަބަންދުކުރުމަށް ޗައިނާ ސަރުކާރުން ނިންމުމާއެކު ޑިޒްނީ ލޭންޑްގައި ތިބި މީހުން އެތަނުގެ އެތެރޭގައި ތިއްބައި، އެކަކު ވެސް ނުކުތުން މަނާކޮށް، އެތަން ވަގުތުން ބަންދުކޮށް ތަޅުލި އެވެ. އެއަށް ފަހު، އެ ރިސޯޓްގެ ފަރާތުން އެންގީ، އެތެރޭގައި ތިބި އެއްވެސް މީހަކަށް އެ ތަނުން ނުކުމެވޭނީ ކޮވިޑް ޓެސްޓު ހެދުމަށް ފަހު ނެގެޓިވް ނަތީޖާއެއް ލިބުމުން ކަމަށެވެ.

ޗައިނާއަކީ، ކޮވިޑް ފެތުރެމުންދާ ބޮޑެތި ގައުމުތަކުގެ ތެރެއިން، ކޮވިޑުން ރައްކާތެރިވުމުގެ ގޮތުން މިހާރު އެންމެ ހަރުކަށި ފިޔަވަޅުތައް އަޅަމުންދާ ހަމައެކަނި ގައުމެވެ. ޗައިނާގައި މިހާރު އަޅާ ފިޔަވަޅުތަކުގެ ތެރޭގައި، އެއްވެސް ސަހަރެއްގައި ކޮވިޑަށް ޕޮޒިޓިވްވާ މީހުންގެ އަދަދު ޖެހިޖެހިގެން ދެދުވަހު މައްޗަށް ދާން ފަށައިފި ނަމަ، އެ ދުވަހުން ފެށިގެން އެ ސަހަރެއް ފުރަބަންދުކުރުން ހިމެނެ އެވެ.

އެއާއެކު، އެ ސަހަރެއްގެ ވީހާ ގިނަ ބަޔަކު ކޮވިޑަށް ޓެސްޓު ކުރުމާއި ޕޮޒިޓިވްވާ މީހުންނާއި އެމީހުންނާ ބައްދަލުވެ އުޅޭ މީހުން ގިނަ ދުވަސްތަކަކު ކަރަންޓީނުގައި ތިބެންޖެހެ އެވެ. އަދި ވަކި ހުއްދައެއް ލިބިގެން ނޫނީ، ގެއިން ބޭރަށް ނުކުމެ އުޅުން މަނާކުރުން ހިމެނެ އެވެ.

ޝަންހާއީ ސަރުކާރުން އިއްޔެ އިއުލާންކުރި ގޮތުގައި މިދިޔަ ބުރާސްފަތި ދުވަހުގެ ފަހުން ޑިޒްނީ ރިސޯޓަށް ޒިޔާރަތްކުރި ކޮންމެ މީހަކު، ޖެހިޖެހިގެން ތިން ދުވަހު ކޮވިޑަށް ޓެސްޓު ކުރަންޖެހޭނެ އެވެ. އަދި ބޭރަށް ނުކުމެ އުޅެވޭނީ ޖެހިޖެހިގެން ތިން ދުވަހު ނެގެޓިވް ނަތީޖާއެއް ލިބިގެން ކަމަށާއި، އެފަދަ ހާލަތެއްގައި ވިޔަސް، ގިނަ މީހުންނާ އެކުގައި އުޅުން ހުއްދައެއް ނޫނެވެ.

ޗައިނާގެ ސިއްހަތާ ބެހޭ ވުޒާރާ އިން ބުނި ގޮތުގައި ފުރަބަންދުގެ ހާލަތު އިއުލާން ކުރަން ޖެހުނީ މިދިޔަ ތިން ދުވަހު ވެސް ކޮވިޑަށް ޕޮޒިޓިވްވި މީހުންގެ އަދަދު ދުވަހުން ދުވަހަށް މައްޗަށް ދާކަން ފާހަގަ ކުރެވުމުންނެވެ. އިއްޔެ އެކަނިވެސް، އެ ގައުމުން 2699 މީހަކު ކޮވިޑަށް ޕޮޒިޓިވްވި ކަމަށާއި، އޭގެ ތެރެއިން ތިން މީހުންގެ ހަށިގަނޑުން ބަލީގެ އަލާމާތްތައް ފެންނަމުންދާ ކަމަށް ވެސް އެ ވުޒާރާ އިން ބުންޏެވެ.