ފިނޭ އަދި މުލީގެ ބަނދަރު ހެދުމުގެ މަޝްރޫއު އެމްޓީސީސީއާ ހަވާލުކޮށްފި

ހދ. ފިނޭ އަދި މ. މުލީގައި ބަނދަރު ހެދުމުގެ މަޝްރޫއު ސަރުކާރުން މިއަދު އެމްޓީސީސީއާ ހަވާލުކޮށްފި އެވެ.

އެކަމަށްޓަކައި މިއަދު ބޭއްވި ރަސްމިއްޔާތުގައި އެމްޓީސީސީގެ ފަރާތުން އެއްބަސްވުންތަކުގައި ސޮއިކުރެއްވީ ސީއީއޯ އާދަމް އާޒިމެވެ. އަދި ސަރުކާރުގެ ފަރާތުން ސޮއިކުރެއްވީ ޕްލޭނިން މިނިސްޓްރީގެ ޑިރެކްޓަރު ޖެނެރަލް ފާތިމަތު ޝަނާ ފާރޫގެވެ.

ފިނޭގެ ބަނދަރު މަޝްރޫއަކީ 47.2 މިލިއަން ރުފިޔާގެ މަޝްރޫއެކެވެ. އެ މަޝްރޫއާ އެމްޓީސީސީން ހަވާލުވެފައިވަނީ 14 މަސްދުވަސް ތެރޭ ނިންމާ ގޮތަށެވެ.

އެ މަޝްރޫއުގެ ތެރޭގައި ރަށުގައި ކުރިން އޮތް ފަޅު އަލުން ފުންކުރުމާއި 35484.26 ކިއުބިކް މީޓަރުގެ ސަރަޙައްދުގެ އާ ފަޅެއް ފުންކުރުމާއި، 5848.95 ކިއުބިކް މީޓަރުގެ ސަރަހައްދުގެ ނެރު ފުންކުރުމާއި، 219.20 މީޓަރުގެ ބޭރުތޮށި ލުމާއި، ރިވެޓް މެންޓާއި ގްރޮއިން ޖެހުމުގެ އިތުރުން 248 މީޓަރުގެ އެއްގަމުތޮށި ލުމާއި ރޭމްޕު ހެދުމުގެ މަސައްކަތް ހިމެނެ އެވެ.

ފިނޭ ބަނދަރުގެ ނެރު ބައްތި އާއި ބަނދަރު ބައްތި އާއި 2198.65 އަކަ މީޓަރުގެ ސަރަހައްދުގައި ޕޭވްމަންޓު ހެދުން އަދި ރާއްޖެ ޓްރާންސްޕޯޓް ލިންކް (އާރްޓީއެލް) ހައި ސްޕީޑް ފެރީ ނެޓްވޯކަށް ބޭނުންވާ އެކްސެސް ޕްލެޓްފޯމް ނުވަތަ ސިޑި ހެދުމުގެ މަސައްކަތް ކުރާނީ ވެސް އެމްޓީސީސީންނެވެ.

ފިނޭ ބަނދަރުގެ މަސައްކަތް ނިމުމުން، އިޖްތިމާއީ ގޮތުންނާއި އިގްތިސާދީ ގޮތުން އެ ރަށު ރައްޔިތުންނަށް ގިނަ ފައިދާތަކެއް ކުރިމަގުގައި ލިބޭނެ ކަމަށް އުއްމީދުކުރާ ކަމަށް އެމްޓީސީސީން ބުންޏެވެ.

މުލީގެ 65.5 މިލިއަން ރުފިޔާގެ ބަނދަރު ހެދުމުގެ މަޝްރޫއާ އެމްޓީސީސީން ހަވާލުވެފައިވަނީ 18 މަސްދުވަސް ތެރޭ ނިންމާ ގޮތަށެވެ.

އެ މަޝްރޫއުގެ ދަށުން 33،888 ކިއުބިކް މީޓަރު ސަރަހައްދުގެ ފަޅު ފުންކުރުމާއި، 6254 ކިއުބިކް މީޓަރު ސަރަހައްދުގެ ނެރު ފުންކުރުމާއި، 465.48 މީޓަރުގެ ބޭރުތޮށްޓާއި 479 މީޓަރުގެ އެއްގަމުތޮށި ލުމާއި، ރޭމްޕެއް ހެދުމާއި، ކޮންކްރިޓް ބްރިޖެއް ހެދުމުގެ އިތުރުން ނެރު ބައްތިއާއި މަގުބައްތި ހަރުކުރުމާއި އަދި 2370 މީޓަރުގެ ޕޭވްމެންޓެއް ހެދުން ހިމެނެ އެވެ.

މުލީގައި ވެސް ހައި ސްޕީޑް ފެރީ ނެޓްވޯކަށް ބޭނުންވާ ސިޑި ހެދުމުގެ މަސައްކަތް ކުރާނީ އެމްޓީސީސީންނެވެ.

މުލީގައި މިހާރު އޮތް ބަނދަރު ވަނީ ވަރަށް ބޮޑަށް ހަލާކުވެ، މަރާމާތު ކުރަން ޖެހިފަ އެވެ. މިއަދު ސޮއިކުރި މަޝްރޫއުގެ ދަށުން އެ ރަށުގައި ޒަމާނީ ބަނދަރެއް ހެދުމަކީ މުސަތަގުބަލުގައި އެ ރަށަށް ލަފާފުރުމުގައި އެތަކެއް ލުއިފަސޭހަތަކެއް ލިބޭނެ ކަމެއް ކަމަށް އެމްޓީސީސީން ބުނެ އެވެ.