ނިޒާމީ ވޯޓާ މެދު ވަކި ގޮތަކަށް އެއްބަހެއް ނުވޭ، މެނިފެސްޓޯގައި ވެސް ނެތް: ސަރުކާރު

ރައީސް އިބްރާހިމް މުހައްމަދު ސޯލިހުގެ މި ދައުރުގެ ތެރޭގައި ބަރުލަމާނީ ނިޒާމަކަށް ވެރިކަން ބަދަލުކުރުމުގެ ވޯޓެއް ނަގަން ސަރުކާރުގެ ކޯލިޝަންގެ ޕާޓީތަކުން އެއްބަސްވެފައި ނެތް ކަމަށާއި އަމަލުކުރަމުން އަންނަ މެނިފެސްޓޯގައި ވެސް ނިޒާމީ ވޯޓުގެ ވާހަކައެއް ނެތް ކަަމަށް ސަރުކާރުން މިއަދު ބުނެފި އެވެ.

ބަރުލަމާނީ ނިޒާމަކަށް ވެރިކަން ބަދަލުކުރަން އެމްޑީޕީގެ ރައީސް، އަދި ރައްޔިތުންގެ މަޖިލީހުގެ ރައީސް ކުރައްވާ މަސައްކަތުގެ ތެރެއިން 2018ގެ އެމްޑީޕީގެ މެނިފެސްޓޯއަށް ރިއާޔަތް ކުރައްވައި މި ދައުރުގެ ތެރޭގައި ވޯޓެއް ނަގަން ހިމެނި ކަމަށް މިދިޔަ ބުރާސްފަތި ދުވަހު ވިދާޅުވި އެވެ.

މަޖިލީހުން ކުރިއަށް ގެންދާ "އާސްކް ސްޕީކާ" ޕްރޮގްރާމްގައި ނަޝީދު ވިދާޅުވީ 2018ގެ ކެމްޕޭންގައި އެމްޑީޕީގެ އެންމެ ބޮޑު އެއް ވައުދަކީ ނިޒާމު ބަދަލުކުރުމުގެ ވޯޓެއް ނެގުން ކަމަށެވެ. އެކަން ކުރިއަށް ނުގެންގޮސް 2023 އަށް އެމްޑީޕީން ކެންޑިޑޭޓަކު ނެރެން ޕްރައިމަރީގެ ވާހަކަ ދެއްކުމަކީ ރަނގަޅު ކަމެއް ނޫން ކަމަށް އެ މަނިކުފާނު ވިދާޅުވި އެވެ.

އެމްޑީޕީގެ ސިޔާސަތުތައް ހިމެނޭ މެނިފެސްޓޯގައި ހުރި ވާހަކަތައް ތަކުރާރުކުރައްވައި ނަޝީދު ވިދާޅުވީ އޭގައި ނިޒާމީ ވޯޓުގެ ވާހަކަ އެބައޮތް ކަމަށާއި ރައީސް އިބްރާހިމް މުހައްމަދު ސޯލިހަށް އެމްޑީޕީގެ ޓިކެޓް ލިބިވަޑައިގަތީ އެ މެނިފެސްޓޯ އިން ކަމަށެވެ.

"އަޅުގަނޑު ދެކޭ ގޮތުގައި އެމްޑީޕީ ރިޔާސީ ޕްރައިމަރީއެއްގެ ވާހަކަ ދައްކައިގެނެއް ނުވާނެ މި ފެންނަ ނުފެންނަ ވޯޓު ނުނަގައެއް. މިއީ އަޅުގަނޑުމެން ރައްޔިތުންނަށް ވެފައި އޮތް އެންމެ ބޮޑު އެއް ވައުދު،" ނަޝީދު ވިދާޅުވި އެވެ.

ނަމަވެސް ރައީސް އޮފީހުގެ ތަރުޖަމާން މިއުވާން މުހައްމަދު "މިހާރު"އަށް ވިދާޅުވީ ރައީސް އިބްރާހިމް މުހައްމަދު ސޯލިހްގެ ވެރިކަމުގެ ފުރަތަމަ ދުވަހުން ފެށިގެން ތަންފީޒުކުރަމުން އަންނަނީ އެ މަނިކުފާނުގެ ވައުދުތައް ފުއްދުމަށް 2018 ގެ އިންތިހާބުގައި އާއްމު ކުރެއްވި މެނިފެސްޓޯ ކަމަށެވެ. ރައްޔިތުންނަށް ވެ ވަޑައިގަތް ވައުދުތައް އެ މެނިފެސްޓޯގައި ހިމަނައި ފުއްދަވަމުން އަންނަ ކަމަށް ވެސް ވިދާޅުވި އެވެ.

"ކަށަވަރުކޮށްދޭން ވައުދުވި ހައްގުތައް މި ދަނީ ކަށަވަރު ކޮށްދެމުން. އެ މެނިފެސްޓޯގައި ނިޒާމީ ވޯޓުގެ ވާހަކައެއް ނެތް. ނިޒާމީ ވޯޓަކަށް ދާން 2018 ގެ ކޮންގްރެސްގައި އެއްބަސްވެފައެއް ނެތް،" ތަރުޖަމާން ވިދާޅުވި އެވެ.

އޭނާ ވިދާޅުވި ގޮތުގައި ނިޒާމީ ވޯޓާ މެދު އުފެދުނު ހިލާފު ތަފާތުވުންތައް އެއްފަރާތްކޮށްލީ އެކަމާ މެދު ވާހަކަ ދައްކަން އެއްބަސްވެގެންނެވެ.

"އެއްގޮތަކަށް ވެސް ވަކި ކަމަކަށް ނުވަތަ ވަކި ގޮތަކަށް ނިޒާމްގެ ވޯޓު ނަގަން އެއްބަސްވެގެން ނޫން،" މިއުވާން ވިދާޅުވި އެވެ.

ރައްޔިތުންނަށް ވައުދުވީ ކިހިނެއް؟

އެމްޑީޕީން 2018 އަށް ހެދި "ޖަޒީރާ ރާއްޖެ" މެނިފެސްޓޯގައި، "އެކުލަވާލެވޭ ސަރުކާރުގައި ބޮޑުވަޒީރަކާއި އޭނާގެ ކެބިނެޓް މަޖިލީހުގެ ތެރޭގައި ހިމެނޭނެ ނިޒާމެއް ގާއިމްކުުރުމުގެ" ވައުދު އެބައޮތެެވެ.

އެއީ ނިޒާމުގެ ވާހަކަ ކަމަށާއި އެ ވޯޓު ނަގަން ޖެހޭ ކަމަށް ނަޝީދު ވިދާޅުވިޔަސް ސަރުކާރުން ތަންފީޒުކުރާ ގޮތަށް އާއްމުކުރީ އެމްޑީޕީގެ މެނިފެސްޓޯއެއް ނޫނެވެ.

އެމްޑީޕީގެ ސިޔާސަތުތައް ވެސް ހިމެނޭ ގޮތަށް ރައްޔިތުންނަށް އާއްމުކުރީ "ގުޅިފައިވާ ޕާޓީތަކުގެ މެނިފެސްޓޯ" އެވެ. އެއީ މި ސަރުކާރު ކޯލިޝަންގައި ހިމެނޭ އެމްޑީޕީގެ އިތުރުން ޖުމްހޫރީ ޕާޓީ އާއި އެމްއާރުއެމާއި އަދާލަތު ޕާޓީއަށް އެއްބަސްވެވުނު ސިޔާސަތުތަކުގެ މައްޗަށް އެކުލަވާލެވުނު މެނިފެސްޓޯއެކެވެ.

އޭގައި ދޮޅު އަހަރުގެ އިންތިގާލީ ސަރުކާރެއް ގާއިމްކޮށް، ބަރުލަމާނީ ނިޒާމަކަށް ވެރިކަން ފުރޮޅާލާ ވާހަކައެއް ނެތެވެ. އޭގައި ބުނެފައި އޮތީ "ރާއްޖޭގެ ވެރިކަން ހިންގުމުގެ ނިޒާމު ހަރުދަނާކުރުމަށްޓަކައި ގާނޫނުއަސާސީއަށް ގެންނަންޖެހޭ ބަދަލުތައް ގެނައުން" އެއީ ކުރާނެ މަސައްކަތެއް ކަމެވެ.

ގުޅިފައިވާ ޕާޓީތަކުގެ މެނިފެސްޓޯ އާއްމުކުރާ ގޮތަށް ނިންމައި ޕާޓީތަކުގެ ލީޑަރުންގެ މެދުގައި އެއްބަސްވީ ނިޒާމުގެ ވޯޓާ މެދު ފަހުން ވާހަކަ ދައްކައި ގޮތްތަކެއް ނިންމުމަށެވެ. އެކަމަކު ލީޑަރުންގެ މެދުގައި އެ މަޝްވަރާ ފަހުން ހިނގި ކަމެއް ސާފެއް ނޫނެވެ.

އެމްޑީޕީން 2018 ގައި އއ. އުކުޅަހުގައި ބޭއްވި ކޮންގްރެސްގައި ލޯންޗްކުރީ "ރިޔާސީ ކެމްޕޭނަށް އެމްޑީޕީން ހުށަހަޅާ" މެނިފެސްޓޯ އެވެ. އެއީ، އެހެން ޕާޓީތަކަށް ހުށަހެޅި މެނިފެސްޓޯ އެވެ.

އެކަމަކު، އިންތިހާބުގެ ކެމްޕޭނަށް ގުޅިފައިވާ ޕާޓީތަކުގެ މެނިފެސްޓޯ ނެރުނީ ބަރުލަމާނީ ވާހަކަ އުނިކޮށްފަ އެވެ.

ނިޒާމީ ވޯޓުގެ ވާހަކަ މީގެ ކުރިން ނަޝީދު ދެއްކެވުމުން ރައީސް އިބްރާހިމް މުހައްމަދު ސޯލިހު ވިދާޅުވެފައި ވަނީ އެއީ އެ މަނިކުފާނަށް ނިންމެވޭނެ ކަމެއް ނޫން ކަމަށެވެ. ވެރިކަމުގެ ނިޒާމަކީ ރައްޔިތުން ކަނޑައަޅައި ނިންމާފައި އޮތް ކަމެއް ކަމަށާއި އެކަން ބަދަލުކުރެވޭނީ ވެސް ރައްޔިތުންނަށް ކަމަށް ތަކުރާރުކޮށް އެ މަނިކުފާނު ވަނީ ވިދާޅުވެފަ އެވެ.

އެހެންވިޔަސް ނަޝީދު މި ފަހުން ވެސް ވިދާޅުވެފައި ވަނީ ނިޒާމީ ވޯޓުގައި ރައީސް އިބްރާހިމް މުހައްމަދު ސޯލިހްގެ އެއްބާރުލެއްވުން ލިބިވަޑައިގަންނަވާނެ ކަމަށް އުއްމީދު ކުރައްވާ ކަމަށެވެ.