ބާލީހުގެ އުރަ އާއި ހަމުގެ ސިއްހަތާ ގުޅުން އެބަހުރި

ތަޖުރިބާކާރުން ބުނާގޮތުގައި، ގަވައިދުން ކޮންމެ ހަފްތާއަކު އެއް ފަހަރު ނިދަން ގެންގުޅޭ ބާލިހުގެ އުރަ ބަދަލުކުރާ ނަމަ ހަންގަނޑަށް ވަރަށް ފައިދާވާނެ އެވެ.

އިންޑިއާގެ ތަޖުރިބާކާރު ކޮސްމެޓިކް ޑާމަޓޮލޮޖިސްޓް، ޑރ. ގީތިކާ މިއްޓަލް ގުޕްތާގެ އިންސްޓަގްރާމުގައި ކުރި ޕޯސްޓެއްގައި ބުނީ ހަފްތާއަކުން ހަފްތާއަކުން ބާލިސް އުރަ ބަދަލުކުރަން ޖެހޭނެ ކަމަށެވެ. އޭރަށް ހަންގަނޑަށް އަންނަ ބަދަލު ފެންނަން ފަށާނެ ކަމަށް އޭނާ ބުނެފައިވެ އެވެ.

"މިކަން ނޭނގި، ނުކޮށް ހުންނަ ނަމަ، ޗާންސް އެބައޮތް ނިދަން ތިތިބީ ހަމުގެ މަރުވެފައިވާ ސެލްތަކާއި ބެކްޓީރިއާތަކާ އެކުގައިކަން" ޑރ. ގީތިކާ ލިޔެފައިވެ އެވެ.

އެންމެ މޮޅު ގޮތަކީ ކޮންމެ ހަފްތާއަކު ބާލީހު އުރަ ބަދަލުކުރުން ކަމަށާއި، ނިދަން ގެންގުޅޭ ބާލިސް ވެސް ކޮންމެ ހަ މަހަކުން އެއްފަހަރު ދޮންނަން ޖެހޭނެ ކަމަށް އޭނާ ބުންޏެވެ.

އެ ޕޯސްޓުގައި ބާލީހު އުރައިގައި ހުންނަ ތެލާއި، ހިރަފުސް ފަދަ އެއްޗެހީގެ ސަބަބުން ސްކިން ކެއާ ރުޓީން އެއް ގެންގުޅުނު ނަމަވެސް، ހަންގަނޑަށް ގެއްލުން ވެދާނެ ކަމަށް ބުނެފައިވެ އެވެ.

އޭގެ އިތުރުން، ސިލްކު ފޮތިން ފަހާފައި ހުންނަ އުރައިން ވެސް ހަންގަނޑައި އިސްތަށީގެ ސިއްހަތު ރަނގަޅު ކޮށްދޭނެ ކަމަށް ބުނެފައިވެ އެވެ. އެމެރިކާގައި ކުރި ދިރާސާއަކުން ދައްކާ ގޮތުގައި، ކަފައިން ހަދާ ބެޑްޝީޓަށް ވުރެ، ސިލްކް ބެޑްޝީޓު ގެންގުޅޭ މީހުންގެ ހަމުގައި ބިހި ނެގުން މަދެވެ.

އޮމާން ހަންގަނޑެއް ބޭނުން ނަމަ، ބާލީހު އުރަ އާއި ބެޑް ޝީޓާއި މޭކަޕް ކުރަން ގެންގުޅޭ ބްރަޝްތަކާއި، ބިއުޓީ ބްލެންޑާސް ތަކުގެ އިތުރުން ތުވާލި އަބަދުވެސް ސާފުކޮށް ބަހައްޓަން ޑރ. ގީތިކާ ނަސޭހަތްތެރިވެ އެވެ.