އިދިކޮޅުން ކުއްލި މައްސަލަ ހުށަހަޅަނީ ސަރުކާރަށް އެއްޗެހި ކިޔަން: ރޮޒެއިނާ

އެކި ކަންކަމާ ގުޅޭ ކުއްލި މައްސަލަތައް އިދިކޮޅު ފަރާތްތަކުން ހުށަހަޅަނީ ސަރުކާރަށް އެއްޗެހި ކިޔަން ކަމަށާއި އެއިން ނަތީޖާއެއް ހާސިލް ކުރަން އެ ފަރާތްތަކުން ބޭނުން ނުވާ ކަމަށް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް މިއަދު ތުހުމަތު ކުރައްވައިފި އެވެ.

ޕީޕީއެމް/ޕީއެންސީގެ ފަރާތުން ރައްޔިތުންގެ މަޖިލީހަށް ހުށަހަޅާ އެކި މައްސަލަތަކާ ގުޅޭ ގޮތުން ވަރަށް ގިނައިން ކުއްލި މައްސަލަ ހުށަހަޅަ އެވެ. ނަމަވެސް އެ މައްސަލަތަކާ ދެކޮޅަށް ވޯޓު ދޭން މެޖޯރިޓީ އޮތް އެމްޑީޕީން ވިޕް ނެރޭތީ އެ މައްސަލަތަކަށް ބަހުސް ކުރަން ވަރަށް މަދު ފަހެއްގައި ނޫނީ ފާހެއް ނުވެ އެވެ.

މަޑުއްވަރީ ދާއިރާގެ މެންބަރު އާދަމް ޝަރީފް މިއަދު ވެސް ވަނީ ވީނުވީއެއް ނޭނގި ގެއްލޭ މީހުންނާ ގުޅޭ ގޮތުން ކުއްލި މައްސަލައެއް ހުށަހަޅުއްވައިފަ އެވެ. ނަމަވެސް އެމްޑީޕީން މިއަދު ވެސް ވަނީ އެ މައްސަލަ ބޭރުކޮށްލައިފަ އެވެ.

އެކަމާ ގުޅޭ ގޮތުން ނައިފަރު ދާއިރާގެ މެންބަރު އަހުމަދު ޝިޔާމް ކަންބޮޑުވުން ފާޅުކުރެއްވުމާ ގުޅިގެން އެހެން މައްސަލައެއްގައި ބަހުސް ކުރައްވަމުން ރޮޒެއިނާ ވަނީ މައްސަލަތައް ބޭރުކުރާ ސަބަބު ވިދާޅުވެފަ އެވެ.

އޭނާ ވިދާޅުވީ ވީނުވީއެއް ނޭނގި މީހުން ގެއްލޭ މައްސަލަ އަށް ހަގީގަތުގައި ހައްލެއް ބޭނުން ނަމަ ކޮމިޓީ އަށް ހުށަހަޅަން ޖެހޭ ކަމަށެވެ.

ރޮޒެއިނާގެ ވާހަކަ މެދުކަނޑާލުމަށް ފަހު ރިޔާސަތުގައި އިންނެވި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ އެއީ ކުއްލި މައްސަލައާ ގުޅޭ ގޮތުން ވާހަކަ ދައްކަން ޖެހޭ ވަގުތެއް ނޫން ކަމަށެވެ.

ބޭނުންވެވަޑައިގެންނެވި ނަމަ އެކަމަށް ވޯޓު ދެއްވުމަށް ފަހު ބަހުސް ކުރިޔަށް ގެންދެވޭނެ ކަމަށް ނަޝީދު ވިދާޅުވި އެވެ.

ނަޝީދަށް ރައްދު ދެއްވަމުން ރޮޒެއިނާ ވިދާޅުވީ 241 ކޮމިޓީގެ މުގައްރިރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމާ އެ މައްސަލާގައި މަޝްވަރާ ކުރައްވާފައިވާ ކަމަށާއި ކޮމިޓީން އެ މަސައްކަތް ކުރިޔަށް ގެންދާނެ ކަމަށް އަސްލަމް ވިދާޅުވެފައިވާ ކަމަށެވެ.

ކޮންމެ މީހަކަށް ވެސް ކޮންމެ ކޮމިޓީއެއްގެ ޗެއާއަކަށް ކަންބޮޑުވާ ކަންކަން ހިއްސާ ކުރެވޭނެ އަދި ކޮމިޓީގައި އެ މަސައްކަތް ކުރިޔަށް ގެންދެވޭނެ ކަމަށް ރޮޒެއިނާ ވިދާޅުވި އެވެ.

ކުއްލި މައްސަލައަކުން ހާސިލް ވަނީ ކޮން ކަމެއް ކަމާއި ކޮމިޓީގައި މަޝްވަރާ ކޮށްގެން ކުރެވޭ ކަންކަމުން ހާސިލް ކުރެވެނީ ކޮން ކަމެއް ކަމާއި ތަޅުމަށް ފޮނުވާ ބިލާ ގަރާރުން ހާސިލް ވަނީ ކޮން ކަމެއްކަން އޮޅޭނެ މެންބަރަކު ނުހުންނާނެ ކަމަށް ވެސް ރޮޒެއިނާ ވިދާޅުވި އެވެ.

"މި ތަނަކަށް ކޮންމެ ދުވަހަކު ހެނދުނު ކުއްލި މައްސަލައެއް ލަނީ އެ މައްސަލަ އާ ގުޅޭ ގޮތުން ސަރުކާރާ ދިމާލަށް އެކި ގޮތް ގޮތުން އެއްޗެހި ކިޔާފައި އެކަން އެ ހިސާބުން ނިންމާލަން. އެ އަކުން ނަތީޖާއެއް ނުނިކުމޭ. ނަތީޖާ ނިކުންނަނީ ނަތީޖާ ނުކުންނަ ގޮތަށް ހުށަހެޅޭ ކަންކަމުން،" އެމްޑީޕީގެ ޑެޕިއުޓީ ޕީޖީ ލީޑަރު ރޮޒެއިނާ ވިދާޅުވި އެވެ.

ގަރާރެއް ހުށަހަޅައިފި ނަމަ އެ ކަން ކޮމިޓީއާ ހަމައަށް ދާ ކަމަށާއި ނަމަވެސް ކުއްލި މައްސަލައަކީ ކޮމިޓީ އާ ހަމައަށް ވެސް ދާ ކަމެއް ނޫން ކަމަށް ރޮޒެއިނާ ވިދާޅުވި އެވެ. އޭގެ ބަދަލުގައި ކޮމިޓީން މި މަސައްކަތް ކުރުމުން ފުލުހުން ހާޒިރު ކޮށްގެން މައްސަލަ ބަލައި ކުރިޔަށް ގެންދެވޭނެ ކަމަށް ވެސް އޭނާ ވިދާޅުވި އެވެ.

"އަޅުގަނޑަށް ވެސް އެނގޭ އޮޕޮޒިޝަން ޕާޓީގެ ހައިސިއްޔަތުން ސަރުކާރަށް ފާޑު ކިޔަން ފުރުސަތު ހޯދަން ލާނެ ކަން މައްސަލަތައް. އެކަމަކު އަޅުގަނޑުމެންނަކީ ވެސް ސަރުކާރަށް ނިސްބަތްވީމަ ޖަވާބު ދާރީ ކުރެވޭ ގޮތަށް އަޅުގަނޑުމެން އެކަން ކުރާނީ،" ރޮޒެއިނާ ވިދާޅުވި އެވެ.