ޔޫރޯ މާކެޓިންގެ 25 މިލިއަން ރުފިޔާގެ ބޮންޑު ދެ މަސް ތެރޭގައި ވިކިއްޖެ

ރާއްޖޭގައި ފުރަތަމަ ފަހަރަށް އަމިއްލަ ކުންފުންޏަކުން ހުޅުވާލި ބޮންޑު، ދެ މަސް ދުވަހުގެ ތެރޭގައި ވިކިއްޖެ އެވެ.

މި ބޮންޑު ވިއްކަން ހުޅުވާލި، ޔޫރޯ މާކެޓިންގެ ލީޑް އޭޖެންޑަކީ ފަސްޓް ނޭޝަނަލް އެވެ. ފަސްޓް ނޭޝަނަލް އިން ވަނީ މި ބޮންޑް ސްޓްރަކްޗާ ކުރުމަށާއި ޑިއުޑިލިޖަންސް ހެދުމާއި ޕްރޮސްޕެކްޓަސް ތައްޔާރުކޮށް، ބޮންޑު ލިސްޓްކުރުމަށް ކުރުމުގެ މަސައްކަތްތައް ކޮށްފަ އެވެ. އަދި ބޮންޑު މާކެޓްކޮށް އިންވެސްޓަރުން ހޯދުމުގެ މަސައްކަތް ކޮށްފައި ވަނީ އެ ކުންފުނިންނެވެ.

ބޮންޑަކީ އިންވެސްޓްމަންޓަށް ފައިސާ ހޯދުމަށް ގެންގުޅޭ އިންސްޓުރޫމަންޓެކެވެ. އެއީ ދިގު މުއްދަތުގައި އިންޓަރެސްޓާ އެކު އަނބުރާ ދައްކާ ގޮތަށް ހޯދާ ފައިސާ އެވެ. ބޭންކް ލޯނުތަކާ ހިލާފަށް، ބޮންޑަށް އެއް އިންވެސްޓަރަށް ވުރެ ގިނަ އިންވެސްޓަރުންގެ އަތުން ވެސް ފައިސާ ހޯދޭނެ އެވެ.

ޔޫރޯ މާކެޓިން އިން ވިއްކަން ހުޅުވާލީ ހަތަރު އަހަރުގެ ތެރޭގައި އަނބުރާ ދައްކާގޮތަށް، 25 މިލިއަން ރުފިޔާގެ ބޮންޑެކެވެ. މި ބޮންޑުގެ އިންޓްރެސްޓް ރޭޓަކީ 7.5 ޕަސެންޓެވެ. މިއީ ރާއްޖޭގެ ގިނަ ބޭންކްތަކުން ލޯނެއް ނެގުމަށްވުރެ ކުޑަ އިންޓްރެސްޓް ރޭޓެކެވެ. ރާއްޖޭގައި ބޭންކްތަކުގެ އިންޓްރެސްޓް ރޭޓުތައް އެވްރެޖުކޮށް އުޅެނީ 10 ޕަސެންޓާއި 15 ޕަސެންޓާ ދެމެދުގަ އެވެ.

ޔޫރޯ މާކެޓިން އިން ބޮންޑު ވިއްކުމަށް ހުޅުވާލީ މިދިޔަ އަހަރުގެ ޑިސެމްބަރު 29 ގައި ވިޔަނަ ޕޯޓަލްގަ އެވެ. އޭގެ ދެ މަސް ފަހުން ބޮންޑު ވިކުމުން އެނގެނީ ރާއްޖޭގެ ކެޕިޓަލް މާކެޓުން ފައިސާ ހޯދުމަށް އަމިއްލަ ކުންފުނިތަކަށް ފަހި ފުރުސަތުތަކެއް އޮތް މިންވަރު ކަމަށް ފަސްޓް ނޭޝަނަލް އިން ބުންޏެވެ.

ފަސްޓް ނޭޝަނަލް އިން ބުނީ، ޔޫރޯ މާކެޓިންގެ ބޮންޑަށް ރާއްޖޭގެ ބޮޑެތި އިންސްޓިޓިއުޝަނަލް އިންވެސްޓަރުންނަށް އަމިއްލަ ކުންފުނިތަކުގައި އިންވެސްޓް ކުރުމުގެ މަގު ފަހިވެ، ރީޓެއިލް އިންވެސްޓަރުންގެ ބޮޑު ތަރުހީބެއް ލިބުނު ކަމަށެވެ.