ޔޫރޯ މާކެޓިންގެ ބޮންޑު: އިންވެސްޓަރުންނަށް އިތުރު ހަތް މިލިއަން ދޫކޮށްފި

ޔޫރޯ މާކެޓިންގެ ބޮންޑުގެ ދެވަނަ ޕޭމަންޓުގެ ގޮތުގައި ހަތް މިލިއަނަށް ވުރެ ގިނަ ރުފިޔާ ބޮންޑުގެ އިންވެސްޓަރުންނަށް ދޫކޮށްފި އެވެ.

ހުޅުމާލޭގައި ކޯލްޑް ސްޓޯރޭޖެއް ހެދުމަށް އެ ކުންފުނިން ބޮންޑެއް މެދުވެރިކޮށް ފައިސާ ހޯދީ ޑިސެމްބަރު 29، 2022، ގަ އެވެ. އެއީ ރާއްޖޭގައި ފުރަތަމަ ފަހަރަށް ޕްރައިވެޓް ޕްލޭސްމެންޓްގައި ލިސްޓުކުރި ބޮންޑެވެ. އެ ބޮންޑު އަނބުރާ ދައްކަން ޖެހެނީ ހަތަރު އަހަރުންނެވެ. އަދި 7.5 ޕަސެންޓުގެ އިންޓްރެސްޓް ރޭޓުގައި ފައިސާ ދައްކަން ޖެހޭނެ އެވެ.

ރާއްޖޭގައި ފުރަތަމަ ފަހަރަށް އަމިއްލަ ކުންފުންޏަކުން ހުޅުވާލި އެ ބޮންޑު ދެ މަސް ދުވަހުގެ ތެރޭގައި ވަނީ އޯވަސަބްސްކްރައިބުވެފަ އެވެ. އެ ބޮންޑު މެދުވެރިކޮށް ޔޫރޯ މާކެޓިން އިން 25 މިލިއަން ރުފިޔާގެ ފައިނޭންސް ހޯދި އެވެ.

ބޮންޑަކީ އިންވެސްޓްމަންޓަށް ފައިސާ ހޯދުމަށް ގެންގުޅޭ އިންސްޓުރޫމަންޓެކެވެ. އެއީ ދިގު މުއްދަތުގައި އިންޓަރެސްޓާ އެކު އަނބުރާ ދައްކާ ގޮތަށް ހޯދާ ފައިސާ އެވެ. ބޭންކް ލޯނުތަކާ ހިލާފަށް، ބޮންޑަށް އެއް އިންވެސްޓަރަށް ވުރެ ގިނަ އިންވެސްޓަރުންގެ އަތުން ވެސް ފައިސާ ހޯދޭނެ އެވެ.

ޔޫރޯ މާކެޓިން އިން މިދިޔަ އަހަރުގެ މާޗް މަހު ވެސް ވަނީ އިންވެސްޓަރުންނަށް ޕީރިއޯޑިކް ޕޭމެންޓްގެ ގޮތުގައި ހަތް މިލިއަން ރުފިޔާ ދޫކޮށްފަ އެވެ.

އެ ބޮންޑު އިޝޫ ކުރުމުގެ ލީޑް އޭޖެންޓަކީ ފަސްޓް ނެޝަނަލް އެވެ. ފަސްޓް ނޭޝަނަލް އިން ވަނީ މި ބޮންޑް ސްޓްރަކްޗާ ކުރުމަށާއި ޑިއުޑިލިޖަންސް ހެދުމާއި ޕްރޮސްޕެކްޓަސް ތައްޔާރުކޮށް، ބޮންޑު ލިސްޓްކުރުމަށް ކުރުމުގެ މަސައްކަތްތައް ކޮށްފަ އެވެ. އެ ކުންފުނިން ވަނީ ޔޫރޯ މާކެޓިންގެ އިތުރުން މެޑްޓެކާއި އައިކެއާ އަށް ވެސް ފައިނޭންސް ހޯދުމުގައި އެހީތެރިވެފަ އެވެ.

ފަސްޓް ނެޝަނަލް މެދުވެރިކޮށް އަމިއްލަ ކުންފުނިތަކަށް ފައިނޭންސް ހޯދުމުގެ ފުރުސަތުތައް އިތުރު ކުރުމުން އަންނަ އިރު މިއީ ރާއްޖޭގެ ފައިނޭންޝަލް ސެކްޓަރު ފުޅާ ކުރުމަށް އެޅިގެންދާ މުހިއްމު ފިޔަވަޅެއް ކަމަށް އެކުންފުނިން ބުންޏެވެ.