ދެކުނު އިންޑިއާ ފިލްމެއްގެ މުހިންމު ބައެއް ރާއްޖޭގައި

މިދިޔަ ފެބްރުއަރީ މަހު ނެރުނު މަލަޔާލަމް ފިލްމު "ކްރިސްޓީ" އަކީ އިންޑިއާގެ އަވަށެއްގައި ގްރޭޑް 12 ގައި އުޅުނު ދަރިވަރަކު ޓިއުޝަނަށް ދިޔަ ޓީޗަރާ ހިތާވާ ވާހަކައެއްގެ މައްޗަށް ބިނާކޮށް އުފައްދާފައިވާ ފިލްމެކެވެ.

ޓިއުޝަނަށް ގޮސް އެ ދެ މީހުންގެ ގުޅުން އެކުވެރިކަމުން ފެށި ނަމަވެސް، ފިލްމުގެ މެދެއްހާ ހިސާބުން ރޯއީ (މެތިއު ތޯމަސް) އޭނާގެ ޓީޗަރު ކްރިސްޓީ ޖޯސެފް (މަލަވިކާ މޮހަނަން) ލޯބި ހުށަހަޅަން ދާއިރު އެނގެނީ ކްރިސްޓީއަށް ރާއްޖެއިން ވަޒީފާއެއް ލިބިގެން ފުރަން އުޅޭ ކަމެވެ. އެއީ އދ. ދަނގެތި ސްކޫލުގެ ޓީޗަރަކަށެވެ.

ފިލްމުގައި ގެނެސްދިން "މާލި ޕައްޓު" ލަވައިގާ ކްރިސްޓީ ރާއްޖެއައިސް، ދަނގެތި ސްކޫލުގައި އުޅޭ މަންޒަރުތައް ދައްކާލި އެވެ. އަދި އެ ރަށުގެ ކުދިބޮޑު ގިނަބަޔަކާއި، ހިތްގައިމު ގޮނޑުދޮށާއި، މަގުތައް ވެސް އެ ލަވައިގެ މަންޒަރުތަކުގައި ގެނެސްދެ އެވެ.

ދަނގެތި ސްކޫލުގެ ދަރިވަރުންތަކެއް ވެސް ފެންނަ އެ މަންޒަރުތަކުގައި، ދިވެހިވަންތަ ހެދުމުގައި ފަންގެވިންނަން އިން އަންހެނެއް ވެސް ދައްކާލަ އެވެ.

އެ ލަވަފެށުނީ، ރޯއީ އަށް ކްރިސްޓީއަށް ނުގުޅިގެން، ގެއަށް އައިސް ކޮމްޕިއުޓަރު ދަށުގައި އިނދެ ގޫގުލް މެޕުން ދަނގެތި ހޯދައި، އެތަނުގެ ފޮޓޯތައް ބަލަން ފަށާ ހިސާބުންނެވެ.

އޭގެ ފަހުން ރޯއީގެ އުފަންދުވަހާ ދިމާކޮށް، ކްރިސްޓީ އެނބުރި އިންޑިއާ އަށް ދެ އެވެ. އަދި ދެމީހުންގެ ދެމެދު ވަރަށް ގާތްގުޅުމެއް ވެސް އުފެދުނެވެ.

ފިލްމުގެ ނިމޭ ހިސާބުގައި، ރޯއީ ކްރިސްޓީއާ އެކު ރާއްޖެ އަންނަން އެއާޕޯޓަށް ދެ އެވެ. އަދި އެތަނުން ޖެހޭ މައްސަލައަކުން ކްރިސްޓީ، ރޯއީ ދެކެ ރުޅިއާދެ އެވެ.

ދެމީހުން ވެސް ވިލާއެއާގެ "ފްލައިމީ" މަތިންދާބޯޓެއްގައި ރާއްޖެ އައިސް، އދ. މާމިގިލި އެއާޕޯޓުތެރޭގައި އުޅޭ މަންޒަރުތަކުގައި، ރޯއީ ދަންނަމީހެއް ކަމަށް ވެސް ކްރިސްޓީ ނުހެދުމުން އޭނާ އެކަނިވި އެވެ.

މާމިގިލި އެއާޕޯޓުތެރޭގައި ރޯއީ ރޯން އިންދާ، އެތަނުގައި މަސައްކަތް ކުރާ ދިވެހި މުވައްޒަފުންތަކެއް އޭނާއަށް ވީ ގޮތެއް ބަލަން އުޅޭ މަންޒަރު އެ ފިލްމުގައި ދައްކަ އެވެ. ރޯއީ ވީގޮތް ކިޔައިދިނުމުން، އެތަނުން މުވައްޒަފަކު ގޮސް ކްރިސްޓީއަށް ގޮވައި، ރޯއީ ދެއްކުމަށް ފަހު ދަންނަމީހެއްތޯ އަހަ އެވެ. ނަމަވެސް، ހިތާ ދެކޮޅަށް ކްރިސްޓީ ބުނީ ނުދަންނަ ކަމަށެވެ.

އޭގެ ފަހުން، އެކަމުގެ ހިތާމައިގާ ރޯއީ އިންދާ، އެއާޕޯޓު ސްޓާފެއްގެ ކެރެކްޓާއެއް ފިލްމުގައި އެއާޕޯޓުތެރެއިން އޭނައަށް އެހީވެ އެވެ.

އެކަމަކު، ކްރިސްޓީއާއެކު ދާނެގޮތެއް ނެތި އަދި އެނބުރި އިންޑިއާއަށް ވެސް ދެވޭނެ ގޮތެއް ރޯއީއަކަށް ނެތެވެ. ފިލްމު ނިމުނީ، ރޯއީ އުޅުނު ހާލަށް ކެތް ނުވެގެން، ކްރިސްޓީ އެ އެއާޕޯޓުގެ މެނޭޖްމަންޓާ ވާހަކަ ދައްކައިގެން، ރޯއީ އަށް އެނބުރި އިންޑިއާ އަށް ދެވޭނެ އިންތިޒާމު ހަމަޖައްސައިދީފަ އެވެ.

ރޯއީ އާއި ކްރިސްޓީ ވަކިވާންޖެހުމުން ދެމީހުން ހިތާމަ ކުރާ މަންޒަރު ފެނެ އެވެ. ކްރިސްޓީ މާމަގިލިން ދަނގެއްޗަށް ދާން ދިޔަ ފެރީ މަތީގަ އެވެ. އަދި ރޯއީ އެނބުރި ގައުމަށް ދިޔަ ފްލައިޓު މަތީގަ އެވެ.

މި ފިލްމަކީ އިންޑިއާގެ ޑައިރެކްޓަރު އެލްވިން ހެރީ ފުރަތަމަ ފަހަރަށް ޑައިރެކްޓުކުރި ފިލްމެވެ. އަދި މިއީ 2007 ވަނަ އަހަރު ހިނގާދިޔަ ހަގީގީ ހާދިސާއަކަށް ބިނާކޮށް އުފައްދާފައިވާ ފިލްމެކެވެ. މިދިޔަ ފެބްރުއަރީމަހުގެ 17 ވަނަ ދުވަހު ރިލީޒްކުރި މި ފިލްމު، އިންޑިއާގެ އޯޓީޓީ ޕްލެޓްފޯމް "ސޮނީލިވް" އިން ބެލޭނެ އެވެ.